រដ្ឋាភិបាលណែនាំពលរដ្ឋឲ្យរក្សាទឹកប្រើប្រាស់សម្រាប់រដូវប្រាំងដែលប្រឈមនឹងបាតុភូត «អែលនីណូ»

ជាតិ

សង្គមជាតិ

រដ្ឋាភិបាលណែនាំពលរដ្ឋឲ្យរក្សាទឹកប្រើប្រាស់សម្រាប់រដូវប្រាំងដែលប្រឈមនឹងបាតុភូត «អែលនីណូ»

17, Jan 2019 , 5:02 pm

រូបភាព

ដោយ:

ភ្នំពេញ៖ នៅរដូវប្រាំងចាប់ពីខែមេសា ដល់ខែឧសភា ឆ្នាំ២០១៩ កម្ពុជានឹងមានបាតុភូត «អែលនីណូ» ដែលបណ្តាលឲ្យអាកាសធាតុក្តៅហួតហែង សីតុណ្ហភាពអាចនឹងហក់ឡើងដល់៤០ ទៅ៤២អង្សា និងមានភ្លៀងកក់ខែ លាយឡំនឹងផ្គររន្ទះ និងខ្យល់កន្ត្រាក់ច្រើន ដែលជាមូលហេតុនាំឲ្យប្រជាកសិករប្រមូលផលដំណាំបានតិចជាងរាល់ឆ្នាំផងដែរ។

បើតាមសេចក្តីណែនាំរបស់រាជរដ្ឋាភិបាល ដែលបញ្ជាក់ពីការព្យាករណ៍របស់ក្រសូងធនធានទឹក និងឧតុនិយម កម្ពុជានឹងទទួលរងឥទ្ធិពល«អែលនីណូ» អាចនឹងនាំឲ្យការងារបង្កបង្កើនផលស្រូវប្រាំង បានតែមួយដង តែប៉ុណ្ណោះ បើទោះបីជាទឹកនៅតាមអាងទឹកដែលបានរក្សាទុក ឬទីកន្លែងដែលមានបឹង ព្រែក ក៏មិនអាចផ្គត់ផ្គង់ដំណាំស្រូវគ្រប់គ្រាន់ឡើយ។

ករណីនេះ រាជរដ្ឋាភិបាល បានណែនាំឲ្យពលរដ្ឋទាំងអស់ ជាពិសេសកសិករ គួរគប្បីរក្សាទឹកសម្រាប់ប្រើប្រាស់ជាប្រចាំថ្ងៃ និងសម្រាប់ដាំដំណាំផ្សេងៗក្រៅពីដំណាំស្រូវ។

ក្នុងសេចក្តីណែនាំដែលចុះហត្ថលេខាដោយសម្តេចនាយករដ្ឋមន្ត្រី បានណែនាំឲ្យអាជ្ញាធរពាក់ព័ន្ធ និងអាជ្ញាធរដែនដី ត្រូវយកចិត្តទុកដាក់រក្សាទឹកឲ្យបានគ្រប់គ្រាន់សម្រាប់ពលរដ្ឋនៅគ្រប់តំបន់ ដើម្បីប្រើប្រាស់ក្នុងរដូវប្រាំង និងត្រៀមកម្លាំងជួយសង្គ្រោះពលរដ្ឋដែលជួបគ្រោះធម្មជាតិ ដូចជាខ្យល់កន្ត្រាក់។

សូមបញ្ជាក់ថា កាលពីឆ្នាំ២០១៨ ឃុំចំនួន៥ នៅខេត្តកំពង់ចាម បានជួបគ្រោះរាំងស្ងួត ដែលប៉ះពាល់ផ្ទៃដីប្រមាណ១៥៣១១ ហិកតា ក្នុងនោះស្រូវវស្សាចំនួន ១៤២៣៧ ហិកតា និងស្រូវប្រាំង ១០៧៤ ហិកតា៕