កីឡាអន្តរជាតិ
អន្តរជាតិ
Asian Cup៖ លីបង់ កូរ៉េខាងជើង អូម៉ង់ និងតួកមេនីស្ថាន រំពឹងឱកាសតិចតួចរបស់ខ្លួននៅយប់នេះ
× ក្រុមកីឡាបាល់ទាត់ជម្រើសជាតិលីបង់ កូរ៉េខាងជើង អូម៉ង់ និងតួកមេនីស្ថាន ត្រូវដណ្តើមគ្នាយកចំណាត់ថ្នាក់ទី៣ល្អបំផុងក្នុងជំនួបលើកទី៣តាមពូលរៀងខ្លួនដើម្បីឈានទៅកាន់វគ្គ១៦ក្រុមចុងក្រោយនៃពានរង្វាន់ AFC Asian Cup 2019។
លីបង់នឹងត្រូវតទល់ជាមួយកូរ៉េខាងជើងក្នុងពូល E នៅថ្ងៃទី១៧ ខែមករា វេលាម៉ោង ៨:៣០នាទីយប់ [ម៉ោងនៅកម្ពុជា] ដើម្បីដណ្តើមយក៣ពិន្ទុ សម្រាប់តំណែងលេខ៣ក្នុងពូល ខណៈក្រុមទាំងពីរមិនទាន់ស្គាល់ឈ្នះដូចគ្នា។
អារ៉ាប៊ិសាអូឌីត និងកាតាដែលកក់កៅអីទៅកាន់វគ្គ១/៨ផ្តាច់ព្រ័ត្ររួចហើយនោះក៏ត្រូវប្រជែងគ្នាយកចំណាត់ថ្នាក់ទី១ពូល E នេះដែរនៅម៉ោងដំណាល់គ្នា។
ដោយឡែកក្នុងពូល F ឯណោះវិញ អូម៉ង់និងតួកមេនីស្ថានក៏ត្រៀមខ្លួនតទល់គ្នានៅវេលាម៉ោង ១១:០០នាទីយប់នេះដែរ ដើម្បីប្រជែងគ្នាយក៣ពិន្ទុសម្រាប់ចំណាត់ថ្នាក់ទី៣ល្អបំផុតប្រចាំពូលនេះ។ ក្នុងពូល F ជប៉ុនត្រូវប៉ះអ៊ូសបេគីស្ថានដើម្បីយកតំណែងកំពូលតារាង ដ្បិតក្រុមទាំងពីឡើងដោយស្វ័យប្រវត្តិរៀងទៅហើយ។
ក្នុងព្រឹត្តិការណ៍ប្រចាំតំបន់អាស៊ីលើកទី១៧នេះ ចំណាត់ថ្នាក់ទី៣ក្នុងពូលទាំង៦ នឹងត្រូវជ្រើសយក៤ក្រុមដែលមានពិន្ទុល្អបំផុត ដើម្បីយកទៅបំពេញបង្គ្រប់១២ក្រុមដែលយកបានចំណាត់ថ្នាក់ទី១ និងទី២តាមពូល សម្រាប់ប្រជែងគ្នានៅវគ្គ១៦ក្រុមចុងក្រោយ។
បើគិតមកដល់ពេលនេះកៅអីលេខ៣ល្អបំផុតនៅសល់តែពីរទៀតប៉ុណ្ណោះ ដោយពីរកៅអីទៀតត្រូវបារ៉ែន និងកៀហ្ស៊ីស៊ីស្ថានយករួចទៅហើយ។ បារ៉ែនយកបាន១កៅអី ដ្បិតពួកគេឈរលេខ៣ពូល A ទទួលបានរហូតដល់៤ពិន្ទុ ខណៈកៀហ្ស៊ីស៊ីស្ថានមាន៣ពិន្ទុ ប៉ុន្តែស៊ីសងគ្រាប់បាល់ល្អជាងវៀតណាមដែលជំពាក់គ្រាប់ស៊ុតចូល១គ្រាប់។
លីបង់ កូរ៉េខាងជើង អូម៉ង់ និងតួកមេនីស្ថាន ពួកគេត្រូវធ្វើយ៉ាងណាយកឲ្យបាន៣ពិន្ទុ ហើយត្រូវមានគ្រាប់ល្អជាងវៀតណាមដែលស្ថិតនៅលេខ៣ពូល D ឬល្អជាងប៉ាឡេស្ទីនដែលមាន២ពិន្ទុ ឈរលេខ៣ពូល B និងជំពាក់គ្រាប់ស៊ុត៣គ្រាប់ ដើម្បីយក២កៅអីដែលនៅសល់ទៅកាន់វគ្គ១/៨ផ្តាច់ព្រ័ត្រ ព្រឹត្តិការណ៍ Asian Cup លើកទី១៧នេះ៕
© រក្សាសិទ្ធិដោយ thmeythmey.com