លោក ស៊ី ជិនភីង ដាស់តឿនមន្ត្រីឲ្យកម្ទេចអំពើពុករលួយក្នុងក្របខណ្ឌអនុវត្តច្បាប់

អន្តរជាតិ

លោក ស៊ី ជិនភីង ដាស់តឿនមន្ត្រីឲ្យកម្ទេចអំពើពុករលួយក្នុងក្របខណ្ឌអនុវត្តច្បាប់

18, Jan 2019 , 9:39 pm

រូបភាព

ដោយ:

ប្រធានាធិបតីចិន ស៊ី ជិនភីង បានប្រាប់ទៅកាន់ភ្នាក់ងារតុលាការនិងអនុវត្តច្បាប់ថា ពួកគេត្រូវតែលាងខ្លួនឲ្យបានស្អាត ដោយបោសសម្អាតអំពើពុករលួយ និងហាមការរំលោភអំណាច។ ការដាស់តឿនរបស់មេដឹកនាំចិនរូបនេះ គឺធ្វើឡើងខណៈដែលអាជ្ញាធរក្រុងប៉េកាំងបន្តស៊ើបអង្កេតលើឯកសារស្របច្បាប់មួយចំនួន ដែលបានបាត់ពីតុលាការកំពូលកាលពីប៉ុន្មានឆ្នាំមុន។

ថ្លែងនៅក្នុងជំនួបប្រចាំឆ្នាំកម្រិតខ្ពស់មួយស្តីពីកិច្ចការច្បាប់និងនយោបាយ នៅថ្ងៃពុធទី១៧ មករា លោក ស៊ី ជីនភីង បានប្រាប់ក្រុមមន្ត្រីថា៖ «ត្រូវតែប្រឆាំងដាច់ខាតទៅនឹងការធ្វេសប្រហែសក្នុងការអនុវត្តច្បាប់, ការខុសធ្លោយរបស់តុលាការ, ល្មើសច្បាប់ស្របពេលកំពុងអនុវត្តច្បាប់ និងអំពើពុករលួយជាដើម»។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Xinhua ។

បន្ថែមពីការដាស់តឿននេះ លោក ស៊ី ក៏បានឲ្យយោបល់ថា ភ្នាក់ងារតុលាការនិងអនុវត្តច្បាប់ត្រូវតែតម្រង់កាំបិតទៅកាន់ខ្លួនឯង, កោសជាតិពុលចេញពីឆ្អឹងរបស់ពួកគេ ហើយចុងក្រោយលុបបំបាត់ពួកដង្កូវក្នុងសាច់។ ការព្រមានរបស់លោកស៊ីនេះ គឺធ្វើឡើងក្រោយពីគណៈកម្មការកិច្ចការច្បាប់និងនយោបាយកណ្តាលនៃបក្សកុម្មយនីសចិនកាលពីសប្តាហ៍មុន បានបើកការស៊ើបអង្កេតរួមគ្នាដ៏កម្រមួយជាមួយក្រុមប្រឆាំងអំពើពុករលួយ ជុំវិញរឿងបាត់ឯកសារច្បាប់មួយចំនួនពីតុលាការកំពូលចិន។

ឯកសារទាំងនោះត្រូវបានបាត់ក្នុងឆ្នាំ២០១៦។ វាជាប់ពាក់ព័ន្ធទៅនឹងជម្លោះកិច្ចសន្យារដ៏រ៉ាំរៃមួយរវាង ក្រុមហ៊ុនឯកជនមួយ និងសហគ្រាសរបស់រដ្ឋ ជុំវិញសិទ្ធិកាន់កាប់ទីតាំងខូងយករ៉ែធ្យូងថ្មមួយ ក្នុងខេត្ត Shaanxi ដែលគិតជាទំហំទឹកប្រាក់ដល់ទៅ ៥៦,១៥ ពាន់លានដុល្លារ។ នេះបើយោងតាមការចុះផ្សាយរបស់កាសែត South China Morning Post ។ តុលាការកំពូលបានបដិសេធការលើកឡើងពីការបាត់បង់ឯកសារនេះ ប៉ុន្តែភ្លាមៗនោះខ្លួនបានបើកការស៊ើបអង្កេតផ្ទៃក្នុងមួយ ក្រោយពីមានការរិះគន់ពីភាពមិនប្រក្រតីក្នុងប្រព័ន្ធតុលាការ។

គួរបញ្ជាក់ថា ក្នុងឆ្នាំ២០១៤ លោក ស៊ី ជិនភីង បានប្តេជ្ញាលុបបំបាត់ចោលនូវអំពើពុករលួយ និងឆ្កឹះ ពួកដង្កូវក្នុងសាច់ចេញពីក្របខណ្ឌតុលាការ និងការអនុវត្តច្បាប់។ គិតមកទល់ពេលនេះ មានមន្ត្រីជាន់ខ្ពស់ជាច្រើននាក់ ដែលរងគ្រោះដោយសារយុទ្ធនាការនេះ។

ក្នុងចំណោមនោះ លោក ចូវ យ៉ុងខាង អតីតសមាជិកគណៈកម្មាធិការអចិន្ត្រៃយ៍ការិយាល័យនយោបាយ របស់គណៈកម្មាធិការមជ្ឈិមបក្ស គឺជាមន្ត្រីមានតំណែងខ្ពស់ជាងគេ ដែលរងគ្រោះដោយសារយុទ្ធនាការរបស់លោក ស៊ី ។ ជាអតីតរដ្ឋមន្ត្រីសន្តិសុខសាធារណៈ និងជាមេប៉ូលិសជាតិផងនោះ លោក ចូវ កំពុងអនុវត្តទោសជាប់ពន្ធនាគារអស់មួយជីវិត។ មន្ត្រីសំខាន់ៗក្នុងក្រសួងនេះ និងមន្ត្រីខ្លះទៀតដែលជាប់ទាក់ទងលោក ចូវ ក៏ត្រូវកាត់ទោសធ្ងន់ៗដែរ៕