អាជ្ញាធរ ប្រកាសពីការចល័តអាវុធនិងរថពាសដែក ដើម្បីសាទរថ្ងៃបង្កើតកងទ័ពជើងគោក

ជាតិ

សង្គមជាតិ

អាជ្ញាធរ ប្រកាសពីការចល័តអាវុធនិងរថពាសដែក ដើម្បីសាទរថ្ងៃបង្កើតកងទ័ពជើងគោក

19, Jan 2019 , 8:40 am

រូបភាព

រូបពីកងរាជអាវុធរាជធានីភ្នំពេញ

ដោយ: ឡាយ សុភាវតី

នៅថ្ងៃទី១៩ ខែមករា ឆ្នាំ២០១៩នេះ នឹងមានការចល័តអាវុធនិងរថពាសដែក ពីក្រុងតាខ្មៅ ខេត្តកណ្ដាល ទៅបញ្ជាការដ្ឋានកងទ័ពជើងគោក ដើម្បីអបអរសាទរខួបគម្រប់២០ឆ្នាំ នៃថ្ងៃបង្កើតបញ្ជាការដ្ឋានកងទ័ពជើងគោក។ នេះបើយោងតាមរដ្ឋបាលរាជធានីភ្នំពេញ ដែលបានចេញសេចក្ដីជូនដំណឹងនៅថ្ងៃទី១៧មករា ឆ្នាំ២០១៩។

រដ្ឋបាលរាជធានីភ្នំពេញ បានចេញសេចក្ដីជូនដំណឹងដល់ប្រជាពលរដ្ឋទាំងអស់ក្នុងរាជធានីភ្នំពេញថា នៅថ្ងៃទី២៤មករា ឆ្នាំ២០១៩ បញ្ជាការដ្ឋានកងទ័ពជើងគោក នឹងប្រារព្ធពិធីខួបគម្រប់២០ឆ្នាំ នៃការបង្កើតបញ្ជាការដ្ឋានទ័ពជើងគោក ស្ថិតក្នុងសង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។

នៅថ្ងៃទី១៩ ខែមករា ឆ្នាំ២១០៩នេះ បញ្ជាការដ្ឋានអង្គរក្ស ត្រូវចល័តអាវុធ និងរថពាសដែកពីក្រុងតាខ្មៅ ខេត្តកណ្ដាល ទៅទីតាំងប្រារព្ធពិធី ធ្វើដំណើរតាមផ្លូវព្រែកហូរ មហាវិថីសម្ដេចហ៊ុន សែន (ផ្លូវ៦០ម៉ែត្រ) បន្តកាត់ផ្លូវ២១៧ (ផ្លូវរោងចក្រកែវ) ផ្លូវព្រៃស ឆ្លងផ្លូវជាតិលេខ៣ តាមផ្លូវប្រទះប្រឡាង ឆ្លងផ្លូវដែកបត់ស្ដាំតាមផ្លូវបេតុង តំបន់សេដ្ឋកិច្ចពិសេស ដល់ផ្លូវជាតិលេខ៤ បត់ស្ដាំងឆ្ពោះទៅបញ្ជាការដ្ឋានកងទ័ពជើងគោក។ ក្រោយពេលប្រារព្ធពិធីខួបគម្រប់២០ឆ្នាំចប់ បញ្ជាការដ្ឋានអង្គរក្សនឹងចល័តអាវុធ និងរថពាសដែកពីទីតាំងប្រារព្ធពិធីតាមតម្រាយផ្លូវដដែល ចូលទៅបញ្ជាការដ្ឋានអង្គរក្សវិញ។

រដ្ឋបាលរាជធានីភ្នំពេញ បានជម្រាបជូនដំណឹងដល់ ប្រជាពលរដ្ឋរស់នៅក្នុងរាជធានីភ្នំពេញ ពិសេសប្រជាពលរដ្ឋដែលរស់នៅតាមដងផ្លូវខាងលើ កុំឲ្យមានការភ្ញាក់ផ្អើលចំពោះការចល័តអាវុធ និងរថពាសដែកនេះ៕