ជាតិ
សេដ្ឋកិច្ច
មន្ត្រីជាន់ខ្ពស់ក្រសួងពាណិជ្ជកម្ម៖ ការយកពន្ធអង្ករ មិនជាប់ពាក់ព័ន្ធ EBA ទេ
× ភ្នំពេញ៖ បញ្ហាគិតពន្ធលើថ្លៃអង្ករកម្ពុជា នាំចូលទីផ្សារសហភាពអឺរ៉ុប កំពុងក្លាយជាប្រធានបទក្តៅ ដែលមជ្ឈដ្ឋានទូទៅកំពុងគិតថា សហភាពអឺរ៉ុបដកប្រពន្ធអនុគ្រោះពន្ធពីកម្ពុជា (Everything But Arms)។ ការគិតបែបនេះជារឿងយល់ច្រឡំប៉ុណ្ណោះ ព្រោះការយកពន្ធលើថ្លៃអង្ករកម្ពុជានេះ គ្មានពាក់ព័ន្ធអ្វីលើប្រព័ន្ធអនុគ្រោះពន្ធឡើយ។
រដ្ឋលេខាធិការក្រសួងពាណិជ្ជកម្ម លោក សុខ សុភ័ក្ត្រ បានពន្យល់ថា វិធានការដែលសហភាពអឺរ៉ុប ដាក់លើលើកម្ពុជានេះ វាមិនមែនពាក់ព័ន្ធលើការអនុគ្រោះពន្ធទេ ពោលគឺការយកពន្ធនេះ អនុវត្តលើពន្ធដែលកម្ពុជាត្រូវបង់ឲ្យគយអឺរ៉ុប ដែលមានចែងនៅក្នុងច្បាប់ជាធរមានស្រាប់។ ត្រង់ចំណុចនេះលោក សុខ សុភ័ក្ត្រ ពន្យល់ដោយលើកឧទាហរណ៍ថា បើកម្ពុជានាំអង្ករទៅទីផ្សារអឺរ៉ុប ដោយគិតពន្ធ១០០ដុល្លារក្នុងមួយតោននោះ បានន័យថា វិធានការកម្រិតពន្ធថ្មីនេះ គេនឹងអនុវត្តតម្លៃពន្ធបូកបន្ថែមលើពន្ធអង្ករ ដែលកម្ពុជាត្រូវអនុវត្តស្រាប់។
ឆ្លើយនឹងសំនួររបស់អ្នកព័ត៌មាន នៅក្នុងសន្និសីទកាសែតជុំវិញការយកពន្ធអង្ករកម្ពុជាពីសំណាក់សហភាពអឺរ៉ុប លោក សុភ័ក្ត្រ ពន្យល់បន្ថែមដូច្នេះថា«បើយើងនាំអង្ករទៅអឺរ៉ុប ហើយពន្ធយើងនាំអង្ករចេញទៅអឺរ៉ុប ១០០ដុល្លារក្នុងមួយតោន គេដាក់វិធាននេះ គឺគេបូកលើពន្ធដែលមានស្រាប់។ តែយើងនៅក្រោមEBA (ពន្ធ)យើងសូន្យបាត់ទៅហើយ អ៊ីចឹងគេបូកបន្ថែមពីលើសូន(តម្លៃពន្ធសូន្យ)ហ្នឹង ដូច្នេះវាមិនមែនមកពីEBAទេ ហើយនិយាយឲ្យខ្លីទៅមិនមែនEBAទេ»។
ដើម្បីកុំឲ្យមានយល់ច្រឡំនោះ រដ្ឋលេខាក្រសួងពាណិជ្ជកម្មរូបនេះ បានបញ្ជាក់ទៀតថា ករណីគិតពន្ធអង្ករលើកម្ពុជានេះ មិនមែនស្ថិតនៅក្នុងរឿងនយោបាយ ដែលតម្រូវឲ្យសហភាពអឺរ៉ុប ចាត់វិធានការគិតពន្ធអង្ករលើកម្ពុជា ដូចការលើកឡើងឡើយ។ បើតាមលោក សុភ័ក្ត្រ មូលហេតុដែលមានការគិតពន្ធអង្ករលើកម្ពុជានេះ ដោយសារតែខាងគណៈកម្មការសហភាពអឺរ៉ុប រៀបចំបង្កើតបច្ចេកទេស(បន្ទាត់ពន្ធគយ)ទៅបំភ័ន្តឲ្យស្របតាមបញ្ញតក្នុងស្រុករបស់ពួកគេ ដើម្បីធ្វើយ៉ាងម៉េចទាញអង្ករកម្ពុជា ធៀបទៅដូចអង្ករអ៊ីតាលីផលិតលក់ ហើយឲ្យបង់ពន្ធដូចគ្នា ។ ដោយសារតែបញ្ហានេះហើយ ទើបធ្វើឲ្យមជ្ឈដ្ឋានទូទៅយល់ច្រឡំថា សហភាពអឺរ៉ុបដកប្រព័ន្ធអនុគ្រោះពន្ធលើផ្នែកអង្ករពីកម្ពុជា ខណៈដែលអង្ករកម្ពុជា ក៏ជាមុខទំនិញមួយ ដែលស្ថិតក្រោមការអនុគ្រោះពន្ធពីសហភាពអឺរ៉ុបដែរ។
ការសម្រេចយកពន្ធលើអង្ករនេះ ត្រូវគិតចាប់ពីថ្ងៃទី១៨ខែមករានេះតទៅ តែការដកហូតពន្ធនេះត្រូវបន្ធូរបន្ថយតាមដំណាក់កាលក្នុងរយៈពេល៣ឆ្នាំ។ ឆ្នាំដំបូងគិតពន្ធ ១៧៥អឺរ៉ូ (ប្រហែល២០០ដុល្លារ) ក្នុងមួយតោន ឆ្នាំទី២មកទៀត ពន្ធនេះធ្លាក់មកត្រឹម ១៥០អឺរ៉ូ និង ១២៥អឺរ៉ូនៅឆ្នាំទី៣។ ការយកពន្ធនេះ គឺអនុវត្តសម្រាប់អង្ករនាំចេញពីកម្ពុជា និងប្រទេសមីយ៉ាន់ម៉ា។
ការសម្រេចយកពន្ធនេះ ធ្វើឡើងបន្ទាប់ពីគណៈកម្មការសហភាពអឺរ៉ុបបានបើកការស៊ើបអង្កេតជុំវិញសំណុំរឿងអង្ករនេះ ក្រោយពីមានបណ្ដឹងរបស់ប្រទេសអ៊ីតាលី និងមានការគាំទ្រពីប្រទេសមួយចំនួន ដែលបានចោទថាអង្ករកម្ពុជា និងមីយ៉ាន់ម៉ាដែលនាំចូលសហភាពអឺរ៉ុប បានធ្វើឲ្យប៉ះពាល់អ្នកផលិតនៅប្រទេសទាំងនោះ។
អង្ករកម្ពុជានាំចូលទីផ្សារអឺរ៉ុប មានតម្លៃទាបជាងអង្កររបស់អ៊ីតាល៣ទៅ៤ដង ដែលជាមូលហេតុនាំឲ្យអង្កររបស់អ៊ីតាលី ជាប្រទេសផ្គត់ផ្គង់អង្ករនៅអឺរ៉ុបដ៏ធំមួយនេះ បាត់បង់ទីផ្សារ។ ដូច្នេះរដ្ឋាភិបាលអ៊ីតាលី គឺមិនសប្បាយចិត្តចំពោះកម្ពុជាឡើយ។ នេះជាការលើកឡើងរបស់លោក ឈាង វុន អ្នកនាំពាក្យគណបក្សកាន់អំណាចនៅរដ្ឋសភាកម្ពុជា ដែលធ្លាប់រិះគន់លោកស្រី Federica Mogherini រដ្ឋមន្ត្រីការបរទេសសហភាពអឺរ៉ុប ដែលជាជនជាតិអ៊ីតាលី ហើយតែងតែលើករណីបញ្ហាអនុគ្រោះពន្ធកម្ពុជា ដាក់ក្នុងកិច្ចប្រជុំគណៈកម្មការអឺរ៉ុប ដើម្បីសងសឹកនឹងកម្ពុជា ដែលដណ្ដើមបានទីផ្សារអង្ករពីអ៊ីតាលី៕
© រក្សាសិទ្ធិដោយ thmeythmey.com