ជាតិ
នាយករដ្ឋមន្ត្រីខ្មែរ នឹងទៅជួបមេដឹកនាំចិន ដើម្បីពង្រឹងសេដ្ឋកិច្ច ពាណិជ្ជកម្ម និងការវិនិយោគ ជំនួបរវាងនាយករដ្ឋមន្រ្តីកម្ពុជានិងប្រធានាធិបតីចិននាពេលកន្លងមក
× សម្តេចនាយករដ្ឋមន្ត្រី ហ៊ុន សែន បានជូនដំណឹងជាថ្មី ពីការបំពេញទស្សនកិច្ចទៅកាន់ប្រទេសចិន ដែលនឹងត្រូវចេញដំណើរនៅថ្ងៃទី២០ ខែមករា ឆ្នាំ២០១៩។ ក្នុងដំណើរទស្សនកិច្ចនេះ នាយករដ្ឋមន្ត្រីកម្ពុជា មានគម្រោងជួបលោក ស៊ី ជិនពីង ប្រធានាធិបតីចិន និងលោក លី ឃឺឈាង នាយករដ្ឋមន្ត្រីចិន។
តាមរយៈសារលើទំព័រហ្វេសប៊ុកនាថ្ងៃនេះ ប្រមុខរដ្ឋាភិបាលកម្ពុជា បានសរសេរថា ជំនួបដ៏សំខាន់នេះ គឺដើម្បីពង្រឹងចំណងមិត្តភាព និងកិច្ចសហប្រតិបត្តិការ ក្នុងនាមជាប្រទេសដៃគូយុទ្ឋសាស្ត្រគ្រប់ជ្រុងជ្រោយ។ មេដឹកនាំកម្ពុជា បានបញ្ជាក់យ៉ាងដូច្នេះថា៖«នៅក្នុងឱកាសនោះ យើង នឹងមានកិច្ចពិភាក្សាលើការពង្រឹងវិស័យសេដ្ឋកិច្ច ពាណិជ្ជកម្ម និងវិនិយោគផងដែរ»។
ក្រៅពីនេះ ជំនួបរវាងមេដឹកនាំកម្ពុជានិងមេដឹកនាំចិន ក៏នឹងមានការចុះហត្ថលេខាលើអនុស្សារណៈនិងកិច្ចព្រមព្រៀងមួយចំនួនផងដែរ។ មេដឹកនាំកម្ពុជា លើកឡើងបែបនេះថា៖«មិត្តចិនមានទំនាក់ទំនងល្អដូចជាបងប្អូន និងបានជួយកម្ពុជាយើងយ៉ាងច្រើនចាប់តាំងពីជំនាន់សម្តេចតាមកទល់សព្វថ្ងៃនេះ។ កម្ពុជា សូមអរគុណមិត្តចិន ចំពោះការជួយជ្រោមជ្រែងទាំងឡាយ ដែលបានធ្វើឲ្យកម្ពុជារីកចម្រើនមកទល់សព្វថ្ងៃ»។
សូមបញ្ជាក់ថា ទស្សនកិច្ចរបស់ប្រមុខរដ្ឋាភិកម្ពុជានៅប្រទេសចិន នឹងត្រូវបញ្ចប់នៅថ្ងៃទី២៣ ខែមករា៕
© រក្សាសិទ្ធិដោយ thmeythmey.com