ជាតិ
នយោបាយជាតិ
សកម្មជនម្នាក់នៃអតីតបក្សប្រឆាំង ត្រូវឃុំខ្លួន ក្រោមបទប្រមាថរដ្ឋាភិបាល លោក គង់ ម៉ាស់ សកម្មជននៃអតីតគណបក្សប្រឆាំង។ រូបពីគណនីហ្វេសប៊ុក Ly Sovichea
×
លោក គង់ ម៉ាស់ សកម្មជននៃអតីតគណបក្សប្រឆាំង ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ សម្រេចយកទៅឃុំខ្លួននៅពន្ធនាគារព្រៃសជាបណ្តោះអាសន្ន កាលថ្ងៃទី១៩ ខែមករា ឆ្នាំ២០១៩ ក្រោមបទចោទ «ជេរប្រមាថជាសាធារណ: និងញុះញង់ ឲ្យប្រព្រឹត្តបទឧក្រិដ្ឋនិងបទបជ្ឈិមជាអាទិ៍»។
សកម្មជននៃអតីតគណបក្សប្រឆាំងរូបនេះ ត្រូវបានសមត្ថកិច្ច ឃាត់ខ្លួន កាលពីថ្ងៃទី១៦ ខែមករា ឆ្នាំ២០១៩ ក្រោយពីលោក បង្ហោះរូបនិងវីដេអូ លើគណនីហ្វេសប៊ុក ដោយអមជាមួយនឹងសារ ដែលមើលទៅមានលក្ខណប្រមាថរដ្ឋាភិបាលនិងញុះញង់ឲ្យមហាជនស្អប់រដ្ឋាភិបាល។
យ៉ាងណា លោក សំ សុគង់ មេធាវីរបស់លោក គង់ ម៉ាស់ បានច្រានចោលចំពោះការចោទប្រកាន់នេះ។ លោក បកស្រាយថា កូនក្តីរបស់លោក គ្រាន់តែចង់ប្រើសិទ្ធិបញ្ចេញមតិ និងចូលរួមក្នុងជីវភាពនយោបាយក្នុងនាមជាប្រជាពលរដ្ឋខ្មែរ ដែលត្រូវបានការពារដោយរដ្ឋធម្មនុញ្ញ។ លោក សង្កត់ធ្ងន់យ៉ាងដូច្នេះថា៖«គាត់គ្មានគោលដៅអីទៅញុះញង់ ឬផ្តួលរំលំរដ្ឋាភិបាលទេ»។
លោកមេធាវីប្រាប់សារព័ត៌មានថ្មីៗតាមទូរសព្ទថា លោក នឹងទៅជួបកូនក្តី ថ្ងៃ២៣ ខែមករា ដើម្បីពិភាក្សាពីការដាក់បណ្តឹងទៅសាលាឧទ្ធរណ៍ ដើម្បីសុំជំទាសនឹងការសម្រេចនេះ៕
Tag:
មេធាវី
តុលាការ
គង់ ម៉ាស់
CNRP
© រក្សាសិទ្ធិដោយ thmeythmey.com