អត្ថបទពាណិជ្ជកម្ម
ទីផ្សារស្ករត្នោតខ្មែរកំពុងរីកដុះដាលខ្លាំង! ក្រុមហ៊ុន Signatures of Asia បន្តចុះកិច្ចសន្យាប្រមូលទិញស្ករពីកសិករកំពង់ស្ពឺ
× កំពង់ស្ពឺ៖ ពិធីចុះហត្ថលេខាទិញស្ករត្នោតក្នុងក្របខ័ណ្ឌផលិតកម្មកសិកម្មតាមកិច្ចសន្យា បានធ្វើឡើងកាលពីថ្ងៃទី១៨ ខែមករា ឆ្នាំ២០១៩កន្លងទៅ ដោយមានការអញ្ជើញចូលរួមពីអភិបាលរងស្រុកឧដុង្គ អ្នកស្រី យ៉ាន ចនចាន់វិច្ឆិកា លោក ឈៀង តុលា ប្រធានមន្ទីរកសិកម្មខេត្តកំពង់ស្ពឺ, លោក ហង់ សុវណ្ណ អនុប្រធាននាយកដ្ឋានកសិ-ឧស្សាហកម្ម លោក អៀ ឯកសា អនុប្រធាននាយកដ្ឋានអភិវឌ្ឍន៍ លោក ប្រាក់ សេរីវឌ្ឃ នាយកអង្គការ វិទ្យាស្ថានស្រាវជ្រាវ និងអភិវឌ្ឍន៍ជនបទកម្ពុជា និងសហគមន៍កសិកម្ម, លោក ចាន់ ពេជ្រ ប្រធានគ្រប់គ្រងទូទៅនៃក្រុមហ៊ុន Signatures of Asia, ព្រមទាំងអាជ្ញាធរស្រុក-ឃុំ និងអង្គការស្ថាប័នមួយចំនួនទៀត។
លោក ចាន់ ពេជ្រ នាយកគ្រប់គ្រង ក្រុមហ៊ុន Signatures of Asia បានអោយដឹងថា៖«ថ្ងៃនេះបានចុះហត្ថលេខាទិញស្ករត្នោតកំពង់ស្ពឺទៀតហើយ បន្ទាប់ពីបានចុះហត្ថលេខានៅខេត្តកំពង់ធំកាលពីសប្តាហ៍មុនថ្មីៗនេះ។
ក្រុមហ៊ុនលោកបានចុះហត្ថលេខាទិញស្ករត្នោតពីសហគមន៍កសិកម្មត្នោតកំពង់ស្ពឺបួនឆ្នាំមកហើយសម្រាប់នាំចេញទៅទីផ្សារអន្តរជាតិ។ ដោយឡែកឆ្នាំនេះ ក្រុមហ៊ុនត្រូវការស្ករត្នោតសរីរាង្គចំនួន១៦០តោនទៀត ពីខេត្តកំពង់ស្ពឺ សម្រាប់ផ្គត់ផ្គង់ទីផ្សារក្នុងស្រុក និងក្រៅប្រទេស ក្នុងក្របខ័ណ្ឌផលិតកម្មកសិកម្មតាមកិច្ចសន្យា ដែលនាំផលប្រយោជន៍ ដល់កសិករដែលជាអ្នកផលិតស្ករត្នោតលក់ បានតម្លៃខ្ពស់សមរម្យ និងធានាបានដល់ អ្នកប្រើប្រាស់ ស្ករត្នោតសុទ្ធពិតប្រាកដមិនក្លែងក្លាយ។
ក្រុមហ៊ុន Signatures of Asia ដែលជាក្រុមហ៊ុនខ្មែរក្នុងស្រុកមួយ កំពុងតែធ្វើការយ៉ាងសកម្មជួយដល់កសិករក្រីក្រនៅកម្ពុជា និងក៏ជាក្រុមហ៊ុនដ៏ធំមួយក្នុងចំណោមក្រុមហ៊ុននាំចេញអង្ករទៅកាន់ទីផ្សារអន្តរជាតិ ក្នុងនោះក៏មានអង្ករសរីរាង្គ ស្ករត្នោតសរីរាង្គផងដែរដោយមានកសិកររាប់ម៉ឺននាក់កំពុងទទួលផលពីការលក់កសិផលខាងលើជូនក្រុមហ៊ុននេះ។
គួរកត់សម្គាល់ដែរថា ក្រុមហ៊ុន Signatures of Asia មានដៃគូសហការច្រើន ដើម្បីជួយដល់វិស័យស្ករត្នោតនេះ មានដូចជាអង្គការវិទ្យាស្ថានស្រាវជ្រាវ និងអភិវឌ្ឍន៏ជនបទកម្ពុជា (CIRD) គម្រោងប្រឆាំងភាពក្រីក្រ IAP-SNV ដែលគម្រោងនេះ ជួយពង្រឹងបច្ចេកទេសផលិតកម្មស្ករត្នោតដល់កសិករ និងក្រុមហ៊ុន ការបង្កើតគំរូអាជីវកម្មទំនើបរួមគ្នាដោយគិតពីសង្គម បរិស្ថាន និងជួយបង្កើនប្រាក់ចំណូលដល់កសិករក្រីក្រ ផ្តល់ការយល់ដឹងអំពីយ៉េនឌ័រ និងការអភិវឌ្ឍន៍ដោយមាននិរន្តរភាព។
លោក ចាន់ ពេជ្រ ក៏បានឲ្យដឹងដែរថា ក្រុមហ៊ុនលោកទទួលបានការបញ្ជាទិញកើនឡើង ពីទីផ្សារអន្តរជាតិក្នុងឆ្នាំនេះ។ លោកក៏សង្កេតឃើញថា ស្ករត្នោតត្រូវបានគេនិយមប្រើប្រាស់ នៅទ្វីបអឺរ៉ុប ដោយសារពេលបរិភោគវាមានកម្រិតជាតិស្ករក្នុងឈាមទាប ដែលអាចប្រើប្រាស់បានទាំងអ្នកមានជំងឺទឹកនោមផ្អែម និងអ្នកដែលមានកម្រិតជាតិស្ករខ្ពស់ក្នុងឈាម។ មិនតែប៉ុណ្ណោះ វាក៏មានសារធាតុរ៉ែ និងវីតាមីនជាច្រើនប្រភេទផងដែរ មិនដូចស្ករសដែលគេកំពុងប្រើប្រាស់សព្វថ្ងៃនោះទេ។
ក្រុមហ៊ុន Signatures of Asia ដែលកំពុងអភិវឌ្ឍន៍ស្ករត្នោតខ្មែរ ឲ្យមានស្តង់ដារសរីរាង្ គដែលទទួលស្គាល់ពីអន្តរជាតិ គឺបានជួយបង្រៀនកសិករឲ្យចេះផលិតតាមបទដ្ឋានអនាម័យ សុវត្ថិភាពខ្ពស់ដល់អ្នកប្រើប្រាស់ ការវេចខ្ចប់ស្អាត ទំនើប។ កត្តាទាំងនេះ បានទាក់ទាញអ្នកប្រើប្រាស់ក្នុងស្រុក និងក្រៅស្រុកប្រើប្រាស់ស្ករត្នោតពិតមិនក្លែងក្លាយ និងមានរសជាតិឈ្ងុយឆ្ងាញ់ និងបានជួយឲ្យកសិករមានចំណូលខ្ពស់ ថែរក្សាដើមត្នោត ដែលដើមត្នោតក៏ជាអត្តសញ្ញាណរបស់ជាតិខ្មែរ7 និងមុខរបរដែលជាកេដំណែលដូនតា សម្រាប់កូនចៅជំនាន់ក្រោយទៀត។
សូមបញ្ជាក់ផងដែរថា៖ បន្ទាប់ពីបានចុះហត្ថលេខានៅខេត្តកំពង់ធំ កំពង់ស្ពឺរួចរាល់ហើយ ក្រុមហ៊ុន Signatures of Asia គ្រោងនិងបន្ត ចុះហត្ថលេខាទិញស្ករត្នោតពីសហគមន៍កសិកម្ម ស្ករត្នោតខេត្តស្វាយរៀង និងកំពុងឆ្នាំងនាពេលឆាប់ៗខាងមុខនេះ៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com