អន្តរជាតិ
ហ្វីលីពីន៖ ប្រជាជនមូស្លីមលើកោះមិនដាណាវ ធ្វើប្រជាមតិដើម្បីទទួលបានស្វ័យភាព
× ប្រជាជនហ្វីលីពីនលើកោះមិនដាណាវ នៅថ្ងៃទី២១ ខែមករា បានទៅបោះឆ្នោតក្នុងប្រជាមតិមួយដើម្បីទទួលបានស្វ័យភាពកាន់តែទូលាយក្នុងតំបន់ដែលពោរពេញដោយអំពើហិង្សា ភាពក្រីក្រ និងចលនាឥស្លាមជ្រុលនិយមនោះ។ ប្រជាមតិនេះ គឺជាលទ្ធផលនៃដំណើរការសន្តិភាពរវាងរដ្ឋាភិបាលក្រុងម៉ានីល និងក្រុមឧទ្ទាមផ្ដាច់ខ្លួនម៉ូរ៉ូ។ មេដឹកនាំចលនាឧទ្ទាមជឿថា ប្រជាជននៅមិនដាណាវនឹងគាំទ្រផែនការសន្តិភាពនេះ។
អ្នកបោះឆ្នោតជាង២,៨លាននាក់ បាននាំគ្នាទៅបោះឆ្នោតក្នុងប្រជាមតិដើម្បីសម្រេចពីស្វ័យភាព ក្រោមការពង្រឹងសន្តិសុខយ៉ាងខ្លាំងរបស់ប៉ូលិសហ្វីលីពីនចំនួនពីរម៉ឺននាក់។ ក្នុងប្រជាមតិដែលត្រូវបានទន្ទឹងរង់ចាំជាច្រើនឆ្នាំមកនេះ អ្នកបោះឆ្នោតត្រូវសម្រេចចិត្តថា ពួកគេគាំទ្រផែនការរបស់រដ្ឋាភិបាលហ្វីលីពីននិងរណសិរ្សរំដោះឥស្លាមម៉ូរ៉ូ (MILF) ដើម្បីបង្កើតតំបន់រដ្ឋបាលគ្រប់គ្រងដោយខ្លួនឯង ឬហៅថា បាងសាម៉ូរ៉ូ ឬអត់។
ប្រសិនបើប្រជាជនក្នុងតំបន់ភាគត្បូងនេះយល់ព្រម រដ្ឋាភិបាលកណ្ដាល នឹងតែងតាំងរដ្ឋាភិបាលតំបន់មួយនៅកោះមិនដាណាវដែលដឹកនាំដោយក្រុមឧទ្ទាម។ រដ្ឋាភិបាលអន្តរកាលនៃតំបន់ស្វយ័តនឹងមានអំណាចលើវិស័យនីតិប្រតិបត្តិ នីតិបញ្ញត្តិ និងវិស័យពន្ធផង។ ប៉ុន្តែក្រុងម៉ានីលនឹងបន្តគ្រប់គ្រងវិស័យការពារជាតិ សន្តិសុខ ការបរទេស និងគោលនយោបាយរូបិយវត្ថុ ហើយប៉ូលិសក៏ស្ថិតក្នុងដៃរដ្ឋាភិបាលកណ្ដាលដដែល តែនឹងមានការសម្របសម្រួលគ្នាជាមួយរដ្ឋាភិបាលតំបន់។
លើសពីនោះ ក្រោមច្បាប់ដែលអនុម័តកាលពីឆ្នាំ២០១៨ រដ្ឋាភិបាលប្រធានាធិបតី រ៉ូឌ្រីហ្គោ ឌូទើតេ នឹងផ្ដល់ទឹកប្រាក់ចំនួន៩៥០លានដុល្លារទៅកាន់រដ្ឋាភិបាលស្វយ័តក្រោមរូបភាពជាមូលនិធិអភិវឌ្ឍក្នុងរយៈពេល១០ឆ្នាំទៅមុខ ក៏ដូចជាការបែកចែងប្រាក់ចំណេញពន្ធដែលប្រមូលបានក្នុងតំបន់នេះ។ ក្នុងករណីប្រជាមតិទទួលភ្លើងខៀវ ក្រុមឧទ្ទាម MILF ក៏ត្រូវរំសាយអ្នកប្រយុទ្ធរបស់ខ្លួនមួយភាគបី ដែលស្មើនឹង៣ម៉ឺននាក់។
ប្រជាមតិនៅមិនដាណាវ កើតចេញពីដំណើរការសន្តិភាពនៅទសវត្សរ៍១៩៩០ ប៉ុន្តែមិនបានបញ្ចូលក្រុមផ្ដាច់ខ្លួនជ្រុលនិយមខ្លាំងឡើយ។ រដ្ឋាភិបាលម៉ានីល និងក្រុមឧទ្ទាម MILF ជឿថា រដ្ឋាភិបាលតំបន់ថ្មីដែលមានស្ថិរភាព នឹងទាក់ទាញការវិនិយោគក្នុងតំបន់ដែលសម្បូរដោយអហិង្សាសម្លាប់មនុស្សរាប់ម៉ឺននាក់ និងបញ្ឈប់ការជ្រើសរើសសមាជិករបស់ក្រុមផ្ដាច់ខ្លួនផង។
មេដឹកនាំ MILF លោក Murad Ebrahim បានប្រាប់ទូរទស្សន៍ CNN Philippines នៅថ្ងៃទី២១ ខែមករា ថា ការបោះឆ្នោត «យល់ព្រម» នឹងឈ្នះ ប្រសិនបើគ្មានការលួចបន្លំ ឬការគំរាមកំហែងអ្វីនោះ។ ប្រជាមតិនេះ ក៏ជាលើកប្រជាប្រិយភាពលោក ឌូទើតេ ផង ទោះជាលោកមិនបានជួយអ្វីធំដុំក្ដី។ នេះក៏ព្រោះតែដំណើរការសន្តិភាពនេះ ត្រូវបានជំរុញដោយអតីតប្រធានាធិបតីមុនៗ តែជាប់គាំងនៅត្រឹមសភា។ មកដល់អាណត្តិលោក ឌូទើតេ ការបង្កើតច្បាប់ស្ដីពីស្វ័យភាពតំបន់ភាគខាងត្បូងអាចឆ្លងផុតសភា និងឲ្យមានប្រជាមតិនៅថ្ងៃទី២១ ខែមករាតែម្ដង៕
Tag:
ហ្វីលីពីន
រ៉ូឌ្រីហ្គោ ឌូទើតេ
© រក្សាសិទ្ធិដោយ thmeythmey.com