ជាតិ
បទយកការណ៍ / បទសម្ភាសន៍
សេដ្ឋកិច្ច
លោក លឹម ហេង ប្រាប់គន្លឹះដល់រដ្ឋាភិបាល ដើម្បីឲ្យអ្នកមានខ្មែរ និងទេសចរងាកមក«Shopping»ក្នុងប្រទេស រូបខាងស្ដាំបានពីក្រុមហ៊ុន Cambodia Airports
× ភ្នំពេញ៖ ក្នុងស្ថានភាពសព្វថ្ងៃ អ្នកមានធនធាននៅកម្ពុជាជាច្រើន បានចេញទៅទិញសម្ភារប្រើប្រាស់ផ្ទាល់ខ្លួនថ្លៃៗ ឬនិយាយឲ្យចំគឺដើរ Shopping នៅក្រៅប្រទេស។ ដូចនេះទោះរដ្ឋយកពន្ធ ក៏មិនសូវបានចំណូលប៉ុន្មានដែរ ព្រោះមិនសូវមានអ្នកនាំចូលមកដែរ ដោយសារអ្នកមានៗ បានចេញទៅទិញនៅបរទេស។ អនុប្រធានសភាពាណិជ្ជកម្មកម្ពុជា លោក លឹម ហេង បានផ្ដល់គំនិតថា រដ្ឋាភិបាលគួរតែអនុគ្រោះ ឬលើកលែងពន្ធទំនិញទាំងនោះ ដូចជា កាបូបម៉ាកល្បី នាឡិកា ទឹកអប់ ជាដើម ដើម្បីឲ្យកម្ពុជាសម្បូរផ្សារទំនិញរួចពន្ធ ហើយវានឹងបង្វែរឲ្យអ្នកមាននៅកម្ពុជាងាកមក Shopping ក្នុងស្រុកវិញ។ ធ្វើបែបនេះបាន វានឹងជួយទាក់ទាញទេសចរអន្តជាតិបន្ថែមទៀត ហើយផ្ដល់ប្រយោជន៍សេដ្ឋកិច្ចលើផ្នែកបង្កើតការងារ ការដឹកជញ្ជូន ការយកពន្ធក្នុងស្រុក ជាដើម។
ដើម្បីជ្រាបច្បាស់ សូមស្ដាប់កិច្ចសម្ភាសរវាងលោក ញ៉ុង ហេង នៃសារព័ត៌មានថ្មីៗ និងលោក លឹម ហេង អនុប្រធានសភាពាណិជ្ជកម្មកម្ពុជា ដូចតទៅនេះ៖
មុនផ្ដល់កិច្ចសម្ភាសជូនសារព័ត៌មានថ្មីៗ លោក លឹម ហេង បានសរសេរលើគណនីហ្វេសប៊ុករបស់ខ្លួនដូច្នេះថា៖«យើងកំពុងទទួលបានការអនុគ្រោះពន្ធពីសហគមន៍អឺរ៉ុប និងអាមរិក។ ជាកិច្ចតបស្នងវិញ រដ្ឋាភិបាលគួរពិចារណាអនុគ្រោះ ឬលើកលែងពន្ធទំនិញមួយចំនួននាំចូលពីអឺរ៉ុប ក៏ដូចជាអាមេរិក លើទំនិញដូចជាកាបូបម៉ាកល្បី នាឡិកា ទឹកអប់ និងទំនិញមួយចំនួនទៀត ដែលខ្ញុំគិតថាយើងបានចំណូលពន្ធពីនេះតិចតួចប៉ុណ្ណោះ ដូច្នេះយើងគួរបង្កើតទីផ្សាររួចពន្ធក្នុងស្រុកយើង ដើម្បីទាក់ទាញទេសចរ មកទិញទំនិញម៉ាកល្បីនៅតំបន់ទេសចរណ៍ល្បីក្នុងប្រទេសយើង។ វាជួយបង្កើតការងារ ការដឹកជញ្ជូន ការកៀងគរចំណូលពន្ធផ្ទៃក្នុង និងផលចំណេញផ្សេងៗជាច្រើនទៀត»។ លោកបន្ថែមថា៖«អ្វីដែលគួរឲ្យស្ដាយនោះ គឺសព្វថ្ងៃនេះអ្នកមាននៅស្រុកខ្មែរទាំងជនបរទេស និងខ្មែរ បាននាំគ្នាទៅទិញទំនិញម៉ាកល្បីៗ ថ្លៃៗនៅប្រទេសថៃ សិង្ហបុរី អាមេរិក ឬអឺរ៉ុប»៕
© រក្សាសិទ្ធិដោយ thmeythmey.com