ជាតិ
សេដ្ឋកិច្ច
EBA៖ ក្រុមអ្នករកស៊ីខ្មែរ និងបរទេសលើកពីកង្វល់ប្រាប់មេពាណិជ្ជកម្ម EU លោក គិត ម៉េង និងលោក Arnaud Darc ស្ថិតក្នុងចំណោមពាណិជ្ជករ ដែលសរសេរលិខិតទៅកាន់លោកស្រី Cecilia Malmstrom
× សភាពាណិជ្ជកម្មអឺរ៉ុបប្រចាំនៅកម្ពុជា (Eurocham) រួមជាមួយសមាគម សហភាព និងក្រុមអ្នករកស៊ីខ្មែរ និងបរទេសជាង៣០អង្គភាព បានរួមគ្នាសរសេរលិខិតទៅកាន់លោកស្រី Cecilia Malmstrom ប្រធានគណៈកម្មាធិការពាណិជ្ជកម្មសហភាពអឺរ៉ុប ដើម្បីបង្ហាញពីកង្វល់របស់ខ្លួនទាក់ទងនឹងការពិចារណាដកគម្រោងអនុគ្រោះពន្ធ «គ្រប់មុខទំនិញលើកលែងតែអាវុធ» (EBA) របស់កម្ពុជានៅក្នុងទីផ្សារសហគមន៍អឺរ៉ុប។
លិខិតដែលចុះហត្ថលេខារួមគ្នាដោយពាណិជ្ជករធំៗទាំងខ្មែរ និងបរទេស ដែលក្នុងមានលោក Arnaud Darc ប្រធានសភាពាណិជ្ជកម្មអឺរ៉ុបប្រចាំកម្ពុជា និងលោក គិត ម៉េង ប្រធានសភាពាណិជ្ជកម្មកម្ពុជា ជាដើមនោះ បានលើកឡើងថា គម្រោងដកប្រព័ន្ធ EBA នឹងបង្ករគ្រោះឲ្យខូចខាតសេដ្ឋកិច្ចកម្ពុជាដ៏ធ្ងន់ធ្ងរ ហើយបង្អាក់ដំណើរការប្រឹងប្រែងរបស់កម្ពុជានារយៈពេលប៉ុន្មានទសវត្សរ៍ចុងក្រោយនេះ។
ក្រៅពីបង្ហាញពីការបារម្ភផ្សេងៗទាក់ទងនឹងការបាត់បង់ការងារពលរដ្ឋខ្មែរច្រើនលាននាក់ ជាពិសេសស្ត្រីជនបទ ក្នុងវិស័យវាយនភណ្ឌ ក្រុមអ្នករកស៊ីខ្មែរ និងបរទេសសំណូមពរដល់គណកម្មាធិការអឺរ៉ុប និងបណ្តារដ្ឋជាសមាជិក បន្តការគាំទ្រក្នុងការអភិវឌ្ឍន៍កម្ពុជា តាមរយៈកិច្ចសន្ទនាបែបស្ថាបនា និងសកម្មភាពសហប្រតិបត្តិការជាមួយរដ្ឋាភិបាលកម្ពុជា៕
© រក្សាសិទ្ធិដោយ thmeythmey.com