កីឡាអន្តរជាតិ
អន្តរជាតិ
Asian Cup៖ ម្ចាស់ការពារជើងឯក អូស្ត្រាលីឈានទៅវគ្គ១/៤ ក្រោយប៉េណាល់ទីឈ្នះអ៊ូសបេគីស្ថាន កីឡាករអូស្ត្រាលី (លឿង) ប្រជែងយកបាល់ជាមួយកីឡាករអ៊ូសបេគីស្ថាន ក្នុងការប្រកួត១២០នាទីដែលគ្មានការស៊ុតបញ្ចូលទី។ រូបថត AFC Asian Cup
× អូស្ត្រាលី ទទួលបានកៅអីទៅកាន់វគ្គ១/៤ផ្តាច់ព្រ័ត្រ ដោយលទ្ធផលបាល់ប៉េណាល់ទី ៤-២ លើអ៊ូសបេគីស្ថាន បន្ទាប់ពីក្រុមទាំងពីរបញ្ចប់ការប្រកួត១២០នាទី ដោយគ្មានការស៊ុតបាល់បញ្ចូលទី។
អ្នកចាំទី Mat Ryan ដែលលេងឲ្យក្លិប Brighton & Hove Albion នៃក្របខណ្ឌ Premier League បានរារាំងឱកាសរបស់កីឡាករអ៊ូសបេគីស្ថាន Islom Tukhtakhujaev និង Marat Bikmaev។ ៤គ្រាប់របស់អូស្ត្រាលីសម្រេចបានដោយ Mark Milligan, Robbie Kruse, Apostolos Giannou, Mathew Leckie ខណៈការទាត់របស់ Aziz Behich ត្រូវរារាំងដោយអ្នកចាំទីអ៊ូសបេគីស្ថាន Ignatiy Nesterov។ រីឯ២គ្រាប់បង្គ្រប់កិច្ចរបស់អ៊ូបេគីស្ថានសម្រេចបានដោយ Otabek Shukurov និង Ikromjon Alibaev។
ក្នុងការប្រកួតទាំងមូល អូស្ត្រាលីគ្រប់គ្រងបាល់រហូតដល់ទៅ៦០,៧ភាគរយឯណោះ ប៉ុន្តែក្រុមកង់ហ្គូរូមួយនេះ មិនមានវាសនាទម្លាយសំណាញ់ទីអ៊ូសបេគីស្ថានឡើយ រហូតឈានដល់ការកាត់ក្តីដោយការទាត់បាល់ប៉េណាល់ទី។
ជ័យជម្នះនេះ នាំឲ្យអូស្ត្រាលីឈានទៅវគ្គ១/៤ផ្តាច់ព្រ័ត្រ ជាមួយនឹងក្តីសង្ឃឹមឈ្នះពានប្រចាំទ្វីបអាស៊ី២លើកជាប់គ្នា។ អ៊ូសបេគីស្ថាន ដែលបានលេខ៤កាលពីឆ្នាំ២០១១ ត្រូវហាលអាវនៅវគ្គ១៦ក្រុមចុងក្រោយតាមថៃ អូម៉ង់ ហ្ស៊កដានី និងអារ៉ាប៊ីសាអូឌីត៕
© រក្សាសិទ្ធិដោយ thmeythmey.com