ដើមឆ្នាំថ្មីនេះ ONE Championship បានរៀបចំកម្មវិធី ONE: ETERNAL GLORY ដែលមានការប្រកួតយ៉ាងអស្ចារ្យនៅទីក្រុងហ្សាការតា ប្រទេសឥណ្ឌូណេស៊ី កាលពីថ្ងៃទី ១៩ ខែមករា។ ទស្សនិកជនឥណ្ឌូណេស៊ី ទទួលបានទស្សនីយភាពដ៏រំភើប ដ្បិតមានជើងខ្លាំងលំដាប់ពិភពលោកដល់ទៅ ១២គូ រាប់ទាំងវត្តមានពន្លកថ្មីក្នុងពិភពក្បាច់គុនដែលបង្ហាញខ្លួននាព្រឹត្តិការណ៍នោះ។
១. បញ្ចេញមុខម្ចាស់ខ្សែក្រវាត់ពិភពលោកទម្ងន់ ៥២គីឡូក្រាម
អ្នកប្រដាល់ជប៉ុន Saruta ធ្លាប់បានបញ្ចេញស្នាដៃអស្ចារ្យក្នុងកម្មវិធីជាមួយគ្នានឹងកីឡាករតំណាងកម្ពុជា ឯម សុវណ្ណារី និង ចាន់ រតនា កាលពីថ្ងៃទី៧ ខែធ្នូ កន្លងទៅផងដែរ។ កាលនោះ Saruta បានឈ្នះដោយពិន្ទុលើកីឡាករAlex Silva ប្រចាំក្លិប Evolve។
បន្ទាប់ពី Saruta តស៊ូយ៉ាងខ្លាំងក្លាជាមួយដៃគូដ៏ពិបាករូបនោះមក រូបគេត្រូវបានផ្គូផ្គងឲ្យដណ្តើមខ្សែក្រវាត់ភ្លាមៗ។
ថ្វីបើ Pacio របស់ក្រុម Lakay ព្យាយាមអស់ពីសមត្ថភាពដើម្បីការពារខ្សែក្រវាត់ខ្លួនយ៉ាងណាក៏ដោយ ប៉ុន្តែដោយមានសំពាធខ្ពស់ និងក្បាច់ចាប់បោកមានប្រសិទ្ធភាពជាង ទើបធ្វើឲ្យចៅក្រមកាត់ក្តីសម្រចឲ្យ Saruta ជាម្ចាស់ខ្សែក្រវាត់តែម្តង។
២. ត្រកូល The Lee Clan អាចយកជ័យជម្នះបានក្នុងព្រឹត្តិការណ៍នេះ
តារាប្រចាំក្លិប Evolve កីឡាករ Christian Lee និងបងថ្លៃរបស់ខ្លួនគឺ Bruno Pucci មិនអាចមិនសប្បាយចិត្តជាងការប្រកួតលើកនោះទេ។
ពីរនាក់បងប្អូនថ្លៃនេះ ត្រូវឡើងប្រកួតក្នុងនាមគូពិសេសនារាត្រីនោះ។ Pucci ប៉ះជាមួយអតីតម្ចាស់ខ្សែក្រវាត់ពិភពលោក Kotetsu Boku។
Pucci ដែលមានឈ្មោះជាជើងខ្លាំងខាង BJJ No-Gi World Champion ជាអ្នកសម្រុកចូលចាប់ជើងក្រោមបម្រុងផ្តួលខាង Boku ឲ្យខ្នងដល់ដី។ បន្ទាប់ពីជ្រលរគ្នាចុះឡើងៗមក «Puccibull» ក៏អាចចាប់ Boku ផ្ទប់ដល់ដីមែន ហើយបានក្លេររឹតករជាប់ រហូតដល់អាជ្ញាកណ្តាលបញ្ឈប់តែម្តង។ ទាំងលើកនេះ Pucci បានសាងប្រវត្តិឈ្នះមុនចប់ទឹកចំនួន ៧ដង តែចាញ់ ៣ដងដែរ។
រីឯបងថ្លៃរបស់គេ Christian Lee បានបង្ហាញសមត្ថភាពក្បាច់គុនដ៏កក្រើកម្តងទៀត ដោយបំបាក់ជើងខ្លាំងរបស់ក្រុម Lakay គឺ Edward Kelly។
Lee ពូកែខាងក្បាច់ចាប់បោក ធ្វើឲ្យគេមានប្រៀបក្នុងការផ្តួលគូប្រកួតដល់ដី តែពាក់កណ្តាលទឹកទី១ប៉ុណ្ណោះ Lee បានគាបពីលើ Kelly ជាប់ រួចក៏ប្រើកណ្តាប់ដៃធ្ងន់ៗដាល់ចំៗជាច្រើនកន្លែង ធ្វើឲ្យអាជ្ញាកណ្តាលបញ្ឈប់ការប្រកួតតែម្តង។
ឆ្នាំ ២០១៩ នេះពិតជារំជើបរំជួលសម្រាប់ត្រកូល Lee នេះមែន ដោយសារបងស្រី Angela Lee ដែលជាម្ចាស់ខ្សែក្រវាត់ ONE Atomweight World Champion នឹងមានការប្រកួតដណ្តើមយកខ្សែក្រវាត់មួយប្រភេទទៀតគឺ ONE Strawweight World Title នៃព្រឹត្តិការណ៍
ONE: A NEW ERA នៅឯទីក្រុងតូក្យូ ប្រទេសជប៉ុនឆាប់ៗនេះ។
៣. មានការបង្ហាញមុខជើងខ្លាំងចំណូលថ្មី
ONE: ETERNAL GLORY ឃើញថាមានកីឡាករចំណូលថ្មីជាច្រើននាក់ នឹងចាប់ផ្តើមបង្ហាញមុខក្នុងសង្វៀនក្បាច់គុនដ៏ធំនេះសម្រាប់ឆ្នាំ ២០១៩។
កីឡាករចិន Niu Kang Kang ប្រើពេលតែ ៣១វិនាទីប៉ុណ្ណោះក្នុងការផ្តួលម្ចាស់ផ្ទះឥណ្ឌូណេស៊ី Sunoto Peringkat
រីឯខាងកូរ៉េខាងត្បូង Won Il Kwon វិញ បានវិវឌ្ឍន៍ខ្លួនយ៉ាងអស្ចារ្យដោយផ្តួល Anthony Engelen បានសម្រេច ក្នុងវិនាទី៦៧ នៃទឹកទី១។
ក្រៅពីនេះមានការប្រកួតវគ្គ ONE's all-striking league Super Series បានធ្វើឲ្យមានសំឡេងរន្ទឺពេញអាគារ Istora Senayan Arena ដោយសារជើងឯករបស់អង់គ្លេស Jonathan Haggerty ប្រកួតគ្នាជាមួយ Joseph Lasiri មកពីអ៊ីតាលី យ៉ាងខ្លាំងក្លារហូតដល់ទឹកទី៣។
ដំបូងស្មានថា ខាងអង់គ្លេសអាចផ្តួលគូប្រកួតខាងអ៊ីតាលីទៅហើយ ដោយសារគាត់បានប្រើស្នៀតកាប់កែងដ៏មុតស្រួចរបស់ខ្លួន ជាមួយការទាត់ផ្ទួនៗជាច្រើនសារ ប៉ុន្តែគួរឲ្យភ្ញាក់ផ្អើលគឺខាងអ៊ីតាលី បានតស៊ូងើបប្រយុទ្ធវិញ។
ក្រោយពីការប្រទាញប្រទុងគ្នាធ្វើឲ្យទស្សនិកជនដកភ្នែកមិនរួចមក ចុងក្រោយចៅក្រមបានសម្រេចចិត្តជាឯកច្ឆន្ទ ឲ្យ Haggerty ជាអ្នកទទួលជ័យជម្នះនៃការប្រកួតនេះ។
ជាមួយការបញ្ចេញសមត្ថភាពគ្រប់បែបយ៉ាងរបស់កីឡាករទាំងជើងចាស់ និងចំណូលថ្មី ONE Championship ពិតជាបើកឆាក ២០១៩ ជាមួយភាពជោគជ័យធំធេងពិតមែន៕
អត្ថបទ៖ Matias Andres