កីឡាជាតិ
ជាតិ
កម្ពុជានឹងរៀបចំការប្រណាំងកង់អន្តរជាតិលើកដំបូង ដោយឆ្លងកាត់ខេត្តជាប់សមុទ្រចំនួន៤
× កម្ពុជា នឹងរៀបចំព្រឹត្តិការណ៍ប្រណាំងកង់អាជីពលំដាប់អន្តរជាតិជាលើកដំបូង ដែលមានកីឡាករកីឡាការិនីអាជីពលំដាប់អន្តរជាតិទូទាំងពិភពលោកជាច្រើនចូលរួម។ ការប្រណាំងកង់ ដែលឆ្លងកាត់ខេត្តជាប់សមុទ្រទាំង៤របស់កម្ពុជានេះ គឺដើម្បីបង្ហាញពីទិដ្ឋភាពតំបន់ឆ្នេរដ៏ស្រស់ស្អាតរបស់កម្ពុជា ក៏ដូចជាផ្តល់បទពិសោធ និងចម្រាញ់រកធនធានស៊ីហ្គេមឆ្នាំ២០២៣។
លោក ថោង ខុន រដ្ឋមន្ត្រីក្រសួងទេសចរណ៍បានបញ្ជាក់ថា កម្ពុជានឹងសហការជាមួយគណៈកម្មការរៀបចំព្រឹត្តិការណ៍ប្រណាំងកង់លំដាប់ពិភពលោករបស់បារាំង Tour de France ដើម្បីរៀបចំព្រឹត្តិការណ៍ប្រណាំងកង់អាជីពលំដាប់អន្តរជាតិនៅកម្ពុជាជាលើកដំបូងនៅឆ្នាំ២០២០។ ក្រៅពីផ្សព្វផ្សាយនិងទាក់ទាញភ្ញៀវទេសចរណ៍អន្តរជាតិឲ្យមកកម្ពុជា ព្រឹត្តិការណ៍នេះ ក៏រៀបចំដើម្បីពង្រឹងសមត្ថភាពកីឡាករកីឡាការិនីកម្ពុជា សម្រាប់ត្រៀមឆ្ពោះទៅកាន់ស៊ីហ្គេមឆ្នាំ២០២៣ ផងដែរ។
«នៅឆ្នាំ២០២០យើងនឹងរៀបចំឲ្យមានការប្រណាំងកង់អាជីពអន្តរជាតិមួយនៅតំបន់ឆ្នេរសមុទ្រ ដែលមានអ្នកចូលរួមពី៨០ទៅ១០០នាក់មកពីប្រទេសទូទាំងពិភពលោក។ ការប្រណាំងនេះ គឺដើម្បីបង្ហាញពីទេសភាពដ៏ស្រស់ស្អាតនៃតំបន់ឆ្នេររបស់កម្ពុជា និងផ្តល់ជាបទពិសោធដល់អ្នកជិះកង់អាជីពកម្ពុជា សម្រាប់ត្រៀមស៊ីហ្គេមឆ្នាំ២០២៣»។ នេះជាការប្រសាសន៍របស់លោក ថោង ខុន ពេលផ្តល់បទសម្ភាសដល់អ្នកសារព័ត៌មានក្នុងអំឡុងពេលរៀបចំព្រឹត្តិការណ៍ Angkor Ultra Trail កាលពីពេលថ្មីៗ។
ព្រឹត្តិការណ៍ប្រណាំងកង់អន្តរជាតិនេះ នឹងឆ្លងកាត់ខេត្តជាប់មាត់សមុទ្រចំនួន៤ ដោយចេញដំណើរពីតំបន់ទេសចរណ៍គីរីសាគរក្នុងខេត្តកោះកុង ឆ្ពោះទៅខេត្តកែប រួចបន្តដំណើរទៅភ្នំបូកគោក្នុងខេត្តកំពត និងបញ្ចប់នៅខេត្តព្រះសីហនុ។ កម្ពុជានឹងរៀបចំព្រឹត្តិការណ៍នេះជារៀងរាល់ឆ្នាំរហូតដល់ឆ្នាំ២០២៣ ដែលកម្ពុជាធ្វើជាម្ចាស់ផ្ទះកីឡាស៊ីហ្គេម។ នេះបើតាមការបញ្ជាក់របស់រដ្ឋមន្ត្រីក្រសួងទេសចរណ៍ខាងលើ។
លោក ថោង ខុន ដែលជាប្រធានគណៈកម្មាធិការជាតិអូឡាំពិកកម្ពុជាផងនោះរំពឹងថា ព្រឹត្តិការណ៍នេះ នឹងជួយផ្សព្វផ្សាយពីតំបន់ទេសចរណ៍ឆ្នេរសមុទ្រកម្ពុជាឲ្យពិភពលោកស្គាល់កាន់តែច្បាស់ និងទាក់ទាញភ្ញៀវទេសចរឲ្យមកកម្សាន្តនៅកម្ពុជាកាន់តែច្រើន៕
Tag:
ប្រណាំងកង់
លោក ថោង ខុន
SEA Games
© រក្សាសិទ្ធិដោយ thmeythmey.com