អន្តរជាតិ
អតីតមន្ត្រីការទូតនៅចិននិងបញ្ញវន្ត១៤៣នាក់ ស្នើចិនដោះលែងជនជាតិកាណាដាពីរនាក់
× អតីតអ្នកការទូតដែលធ្លាប់បម្រើការនៅទឹកដីចិន និងបញ្ញវន្តចំនួន១៤៣នាក់ បានផ្ញើលិខិតមួយទៅកាន់ប្រធានាធិបតីចិន ស៊ី ជិនភីង ដោយស្នើឲ្យដោះលែងជនជាតិកាណាដាពីរនាក់ ដែលកំពុងជាប់ឃុំខ្លួន។ ការចាប់ខ្លួនជនជាតិកាណាដាទាំងពីរនាក់ ធ្វើឲ្យទំនាក់ទំនងការទូតចិន និងកាណាដាធ្លាក់ចុះខ្លាំង និងមានការឆ្លើយឆ្លងពាក្យសម្ដីគ្នាទៅមកផង។ សម្រាប់អ្នកទាំង១៤៣នាក់ ភាពល្អក់កករនេះ នឹងបង្កើតទៅការមិនទុកចិត្តគ្នា ហើយមានលទ្ធផលអាក្រក់ផង។
ក្នុងលិខិតសរសេរជាភាសាចិន និងអង់គ្លេស បញ្ញវន្តចំនួន១១៦នាក់ និងអតីតមន្ត្រីការទូតចំនួន២៧នាក់មកពីប្រទេសចំនួន១៩ បានស្នើឲ្យមានការដោះលែងលោក Michael Kovrig អតីតមន្ត្រីទូតកាណាដានៅប៉េកាំង និងពាណិជ្ជករម្នាក់ទៀតឈ្មោះ Michael Spavor ។ ជនជាតិកាណាដាទាំងពីរ កំពុងជាប់ឃុំខ្លួនតាំងពីថ្ងៃទី១០ ខែធ្នូ ឆ្នាំ២០១៨ មក ក្រោមហេតុផលថា ធ្វើសកម្មភាពប៉ះពាល់សន្តិសុខជាតិរបស់ចិន។
ហត្ថលេខីទាំង១៤៣នាក់បានប្រាប់ប្រធានាធិបតីចិន ស៊ី ជិនភីង ថា ជនជាតិកាណាដាទាំងពីរ សុទ្ធតែបានធ្វើការដើម្បីជំរុញការស្វែងយល់ពីប្រទេសចិន និងលើកកម្ពស់ទំនាក់ទំនងទៅកាន់ពិភពលោកខាងក្រៅផង។ ដូចនេះ ចំណាត់ការរបស់ក្រុងប៉េកាំង មិនមែនជារឿងគួរឲ្យស្វាគមន៍ឡើយ ហើយថែមទាំងជាការប្រថុយប្រថានរបស់ចិនទៅទៀត។
បើតាមសំបុត្រចំហដដែលនេះ អតីតមន្ត្រីការទូតបរទេសដែលធ្លាប់ធ្វើការនៅប៉េកាំង និងអ្នកជំនាញទាំងឡាយ ក៏ព្រមានដែរថា សកម្មភាពរបស់ចិនធ្វើឲ្យពួកគេត្រូវប្រយ័ត្នក្នុងការធ្វើដំណើរទៅកាន់ចិន ឬធ្វើការនៅទឹកដី និងទំនាក់ទំនងជាមួយដៃគូចិនផង។ ការណ៍នេះ នឹងនាំឲ្យមានការជួបសន្ទនាកាន់តែតិចតួច ការមិនទុកចិត្តរីកធំ ហើយប៉ះពាល់ដល់ការគ្រប់គ្រងការខ្វែងគំនិតគ្នា ក៏ដូចជាការស្វែងរកចំណុចរួមទៀតផង។ លទ្ធផលចុងក្រោយវិញ ទាំងចិន ទាំងពិភពលោកនឹងជួបបញ្ហាដូចគ្នា។
លោក Kovrig និងលោក Spavor ត្រូវបានចាប់ខ្លួនជាបន្តបន្ទាប់ ក្រោយអាជ្ញាធរកាណាដាឃាត់ខ្លួននាយកហិរញ្ញវត្ថុក្រុមហ៊ុន Huawei តាមសំណើរបស់អាមេរិកកាលពីដើមខែធ្នូ។ ក្រោយមក អ្នកជំនួញជនជាតិនេះត្រូវបានដោះលែងឲ្យនៅក្រៅឃុំបណ្ដោះអាសន្នសិន តែមិនអាចចាកចេញពីកាណាដាឡើយ។ ការឃាត់ខ្លួននេះ ធ្វើឲ្យចិនខឹងសម្បារយ៉ាងខ្លាំង និងព្រមានចាត់វិធានការលើកាណាដាវិញផង ហើយទីបំផុតក៏មានការចាប់ខ្លួនជនជាតិកាណាដាវិញតែម្ដង។
បន្ថែមពីលើការឃុំខ្លួនជនជាតិកាណាដាទាំងពីរ ចិនក៏ទើបសម្រេចចិត្តកាត់ទោសប្រហារជីវិតជនជាតិកាណាដាម្នាក់ទៀតជុំវិញការរត់ពន្ធគ្រឿងញៀនច្រើនជាង២០០គីឡូក្រាមឯណោះ។ នាយករដ្ឋមន្ត្រីកាណាដាបានស្នើឲ្យសម្ព័ន្ធមិត្តជួយខ្លួនក្នុងទំនាស់ជាមួយចិន តែក្រសួងការបរទេសចិនលើកឡើងថា ការឲ្យភាគីផ្សេងមកពាក់ព័ន្ធ មិនអាចដោះស្រាយបញ្ហាបានទេ។ ក្រុងប៉េកាំងចាត់ទុករឿងរ៉ាវទាំងអម្បាលម៉ានជាកំហុសក្រុងអូតាវ៉ា ដែលត្រូវកែប្រែ បើចង់ឲ្យស្ថានការណ៍ល្អឡើងវិញ៕
© រក្សាសិទ្ធិដោយ thmeythmey.com