ទាហានងើបបះបោរប្រឆាំងរដ្ឋាភិបាលវ៉េណេស៊ុយអេឡារបស់លោក ម៉ាឌូយរ៉ូ ត្រូវបង្ក្រាបទាំងស្រុង

អន្តរជាតិ

ទាហានងើបបះបោរប្រឆាំងរដ្ឋាភិបាលវ៉េណេស៊ុយអេឡារបស់លោក ម៉ាឌូយរ៉ូ ត្រូវបង្ក្រាបទាំងស្រុង

22, Jan 2019 , 9:39 pm

រូបភាព

ដោយ: ថ្មីៗ

ទាហានមួយក្រុមមានគ្នា ២៧នាក់ត្រូវបានចាប់ខ្លួនភ្លាម បន្ទាប់ពីពួកគេប្រកាសអំពាវនាវឲ្យមានការចូលរួមគាំទ្រចលបះបោរប្រឆាំងនឹងរបបដឹកនាំលោក នីកូឡា ម៉ាឌុយរ៉ូ នៅថ្ងៃចន្ទទី ២១ ខែមករា។ ក្រុមទាហានទាំងនេះក៏បានវាយប្រហារលើមន្ទីរយោធាមួយកន្លែងនៅរដ្ឋធានីការ៉ាកាសផងដែរ មុននឹងត្រូវបង្ក្រាប។

ក្រសួងការការពារជាតិវ៉េណេស៊ុយអេឡាបានប្រកាសថា ចលនាទាហានងើបបះបោរប្រឆាំងនឹងរដ្ឋាភិបាលត្រូវបានបង្ក្រាប ហើយទាហានដែលពាក់ព័ន្ធ ២៧នាក់ក៏ត្រូវបានចាប់ខ្លួនអស់ដែរ។

បើតាមទីភ្នាក់ងារព័ត៌មាន AFP រដ្ឋមន្ត្រីការពារជាតិ Vladimir Padrino ទាហានដែលងើបបះបោរនោះត្រូវបានចាប់ខ្លួននៅថ្ងៃចន្ទ បន្ទាប់ពីពួកគេវាយប្រហារលើទីបញ្ជាការយោធាមួយកន្លែងនៅភាគខាងជើងរដ្ឋធានីការ៉ាកាស និងប៉ុស្តិ៍សន្តិសុខមួយកន្លែងទៀតដែរ។

ក្រុមនេះបានរំដោះអ្នកទោសបួននាក់ និងលួចបានសព្វាវុធមួយចំនួនដែរ។ ប៉ុន្តែក្នុងការបង្ក្រាបនេះ ខាងក្រុមយោធាបានរឹបអូសយកមកវិញនូវអាវុធទាំងអស់រួចរាល់ដែរ។

រដ្ឋមន្ត្រីការពារជាតិ Padrino បានបញ្ជាក់ដូច្នេះ៖«ក្នុងពេលចាប់ខ្លួន អាវុធដែលបាត់នោះត្រូវបានរឹបអូសមកវិញអស់ហើយ ហើយក្រុមបះបោរទាំងនោះបានផ្តល់ព័ត៌មានសំខាន់ៗមួយចំនួនដែរដល់ភ្នាក់ងារចារកម្ម និង តុលាការយោធា។ ពួកនឹងត្រូវប្រឈមនឹងចំពោះមុខច្បាប់»។

តាមពិតទៅ ដឹកនាំក្រុមបះបោរនេះបានបង្ហោះវីដេអូឃ្លីបមួយដែរដោយអំពាវនាវឲ្យសាធារណជនចូលរួមគាំទ្រចលនាប្រឆាំងរបបដឹកនាំបច្ចុប្បន្នផងដែរ។ មេដឹកនាំក្រុមបះបោរខាងលើនេះប្រកាសប្រាប់ពលរដ្ឋវ៉េណេស៊ុយអេឡាក្នុងវីដេអូដូច្នេះ៖« យើងជាកងទ័ពមានវិជ្ជាជីវៈ ដែលកងកម្លាំងការពារជាតិប្រឆាំងរបបដឹកនាំបច្ចុប្បន្ន។ ខ្ញុំត្រូវការជំនួយពីអ្នកទាំងអស់គ្នា ហើយសូមនាំចេញតវ៉ាតាមផ្លូវ»។

បើតាមប្រធានសភាធម្មនុញ្ញដែលជាដៃស្តាំលោក ម៉ាឌុយរ៉ូ លោក Diosdado Cabello មេដឹកនាំក្រុមទាហានបះបោរនោះត្រូវបានកំណត់អត្តសញ្ញាណហើយ ហើយគេមានឈ្មោះថា Luis Bandres Figueroa ដែលមានឋានន្តរស័ក្តិថ្នាក់ពលបាលឯក។

ក្នុងពេលដែលចលនាបះបោរកើតឡើង គេឃើញមានប្រជាជនជាច្រើនដែលនាំគ្នាប្រមូលផ្តុំគ្នាតវ៉ានៅក្បែរទីតាំងកើតហេតុ។ ពួកគេបិទផ្លូវ ហើយនិងដុតសំរាមដើម្បីបង្ហាញការគាំទ្រដល់ទាហានដែលងើបបះបោរ។ ប៉ុន្តែក្រុមយោធាគាំទ្ររដ្ឋាភិបាលប្រើប្រាស់ឧស្ម័នបង្ហូរទឹកភ្នែកដើម្បីបំបែកបាតុករនេះ។ បាតុករខ្លះបានស្រែកថា ពួកគេចង់បានសេរីភាព និងចង់ឲ្យលោក ម៉ាឌុយរ៉ូ ចាកចេញពីតំណែងផង។

ប្រធានរដ្ឋសភាដែលក្តោបក្តាប់ដោយសមាជិកបក្សប្រឆាំងលោក Juan Guaido ដែលចេញមុខតតាំងនឹងលោក ម៉ាឌុយរ៉ូ ជាចំហនោះបានប្រកាសគាំទ្រកងទ័ពដែលងើបបះបោរនឹងរបបដឹកនាំបច្ចុប្បន្ន។ លោកក៏បានធានាផ្តល់ការលើកលែងទោសដល់រាល់កងកម្លាំងទាំងអស់ដែលផ្តាច់ខ្លួន ដើម្បីចូលរួមក្នុងយុទ្ធនាការស្តារប្រជាធិបតេយ្យនិងរដ្ឋធម្មនុញ្ញក្នុងប្រទេសផង។

លោក ម៉ាឌុយរ៉ូ បានស្បថចូលកាន់តំណែងជាប្រធានាធិបតីវ៉េណេស៊ុយអេឡាសម្រាប់អាណត្តិទីពីរកាលពីថ្ងៃទី ១០ខែមករា បន្ទាប់ពីឈ្នះឆ្នោតខែឧសភាឆ្នាំមុន ទោះជាមិនមានការទទួលស្គាល់ពីសហគមន៍អន្តរជាតិក៏ដោយ។ ទោះបីជាសេដ្ឋកិច្ចរលំរលាយក៏ដោយ ហើយប្រជាជនរាប់លាននាក់ភៀសខ្លួនក៏ដោយចុះ ម៉ាឌុយរ៉ូ នៅតែទទួលបានការស្មោះស្មោះ និងគាំទ្រឥតងាករេពីក្រុមយោធាដដែល។ ដរាបណានៅមានកងទ័ពគាំទ្រលើសលុប ការផ្លាស់ប្តូររបបដឹកនាំនោះមិនអាចនឹងកើតឡើយនៅវេណេស៊ុយអេឡា៕