ភ្នំពេញ៖ «កម្ពុជានឹងមិនដោះដូរអធិបតេយ្យជាតិ ដើម្បីជំនួយជាដាច់ខាត»។ នេះជាសម្តីរបស់លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ដែលថ្លែងនៅក្នុងកិច្ចប្រជុំចង្អៀតរដ្ឋមន្ត្រីការបរទេសអាស៊ាន ដែលបានប្រព្រឹត្តិទៅកាលពីថ្ងៃទី១៧-១៨ ខែមករា ឆ្នាំ២០១៩ នៅខេត្តឈៀងម៉ៃ ប្រទេសថៃ។
ក្នុងកិច្ចប្រជុំចង្អៀតនេះ រដ្ឋមន្ត្រីការបរទេសថៃ បានលើកយកមូលបទ «ការជំរុញភាពជាដៃគូសម្រាប់ចីរភាព » ដើម្បីពិភាក្សាគ្នា ដោយធ្វើយ៉ាងណាកសាងសហគមន៍អាស៊ានឲ្យរឹងមាំ តាមរយៈការអនុវត្តចក្ខុវិស័យអាស៊ានឆ្នាំ២០២៥ ។ ជាពិសេសផែនការលម្អិតសហគមន៍សន្តិសុខ-នយោបាយអាស៊ាន ,សមាហរណកម្មអាស៊ាន ,ការកាត់បន្ថយគម្លាតអភិវឌ្ឍ និងការតភ្ជាប់អាស៊ាន។
ភាពចាំបាច់ក្នុងការបន្តពង្រឹងមជ្ឈភាពអាស៊ាន និងតួនាទីនាំមុខអាស៊ាននៅក្នុងនិមាបន្មកម្មតំបន់ ដែលកំពុងវិវត្តន៍ និងទំនាក់ទំនងជាមួយភាគីខាងក្រៅ។ រដ្ឋមន្ត្រីការបរទេសអាស៊ានបានទទួលស្គាល់ពីការប្រកួតប្រជែង ដែលកើនឡើរវាងមហាអំណាចធំៗនៅក្នុងតំបន់ និងផលប៉ះពាល់ដែលអាចមានដល់មជ្ឈភាពអាស៊ាន។ ត្រង់ចំណុចរដ្ឋមន្ត្រីការបរទេសកម្ពុជា លោក ប្រាក់ សុខុន បាននិយាយថា អាស៊ានគួរបង្កើនកិច្ចខិតខំប្រឹងប្រែងបន្ថែមក្នុងការកសាងសហគមន៍មួយ ដោយត្រូវបន្តទំនាក់ទំនងជិតស្និទ្ធជាមួយដៃគូខាងក្រៅរបស់អាស៊ាន ដើម្បីបម្រើផលប្រយោជន៍ដ៍ល្អប្រសើរនៃសន្តិភាព និងវិបុលភាពនៅក្នុងតំបន់ និងអន្តរជាតិ។
លោក ប្រាក់ សុខុន បានបន្ថែមថា ភាពរឹងមាំនៃការកសាងសហគមន៍អាស៊ាន គឺពឹងផ្អែកលើការពង្រីកកិច្ចខិតខំប្រឹងប្រែងរបស់ប្រទេសសមាជិកអាស៊ានទាំងអស់ ក្នុងការសម្របគោលនយោបាយអភិវឌ្ឍថ្នាក់ជាតិ ឲ្យស្របនឹងរបៀបវារៈនៃការអភិវឌ្ឍក្នុងតំបន់និងពិភពលោក ដើម្បីទទួលបានអត្ថប្រយោជន៍ពីការបំពេញបន្ថែមឲ្យគ្នាទៅវិញទៅមក។ និយាយពីចំណុចអាស៊ាននេះហើយ រដ្ឋមន្ត្រីការបរទេសអាស៊ាន ក៏លើកពីគោលការណ៍លើកតម្កើងពីភាពជាដៃគូទូលំទូលាយអាស៊ាន-សហភាពអឺរ៉ុប ទៅជាកម្រិតដៃគូយុទ្ធសាស្ដ្រ ក្រោមការបន្តចរចាលើចំនុចលម្អិត និងកាលបរិច្ឆេទច្បាស់លាស់។
ត្រង់ចំណុចនេះលោក ប្រាក់ សុខុន បានលើកពីការព្រួយបារម្ភចំពោះការប្រើប្រាស់វិធីសាស្ដ្រស្ដង់ដាពីររបស់លោកខាងលិច សម្រាប់ជ្រើសរើសយកតែចំនុចណាដែលសមស្រប និងផ្ដល់ប្រយោជន៍ដល់ប្រទេសដែលខ្លាំងជាង។«ប្រទេសកម្ពុជានឹងមិនដោះដូរអធិបតេយ្យជាតិ ដើម្បីជំនួយជាដាច់ខាត កម្ពុជាបានឆ្លងកាត់ភាពលំបាក ពីអតីតកាលរួចហើយ »។ នេះជាការសង្កត់ធ្ងន់របស់រដ្ឋមន្ត្រីការបរទេសកម្ពុជា ចំពោះមុខការទូតអាស៊ាន។
អមជាមួយការប្ដេជ្ញាចិត្តនេះ លោក ប្រាក់ សុខុន បង្ហាញការសោកស្ដាយទៅលើការសម្រេចចិត្ដរបស់គណៈកម្មការអឺរ៉ុបនាពេលថ្មីៗនេះ ចំពោះការដាក់ចេញនូវវិធានការយកពន្ធនាំចូលអង្ករពីប្រទេសកម្ពុជា និងមីយ៉ាន់ម៉ា កាលពីថ្ងៃទី១៦ ខែមករា ឆ្នាំ២០១៩។ ក្រៅពីបញ្ហាកម្ពុជា និងមីយ៉ាន់ម៉ា កិច្ចប្រជុំរដ្ឋមន្ត្រីការបរទេសអាស៊ាន ក៏បានកត់សម្គាល់អំពីការព្រួយបារម្ភ ចំពោះការបិទមិនឲ្យប្រេងដូងរបស់ប្រទេសឥណ្ឌូនេស៊ី និងម៉ាឡេស៊ី ទៅកាន់ទីផ្សារអឺរ៉ុបផងដែរ។
សហភាពអឺរ៉ុបបានសម្រេចយកពន្ធលើអង្ករនេះ គិតចាប់ពីថ្ងៃទី១៨ខែមករានេះតទៅ តែការដកហូតពន្ធនេះត្រូវបន្ធូរបន្ថយតាមដំណាក់កាលក្នុងរយៈពេល៣ឆ្នាំ។ ឆ្នាំដំបូងគិតពន្ធ ១៧៥អឺរ៉ូ (ប្រហែល២០០ដុល្លារ) ក្នុងមួយតោន ឆ្នាំទី២មកទៀត ពន្ធនេះធ្លាក់មកត្រឹម ១៥០អឺរ៉ូ និង ១២៥អឺរ៉ូនៅឆ្នាំទី៣។ ការយកពន្ធនេះ គឺអនុវត្តសម្រាប់អង្ករនាំចេញពីកម្ពុជា និងប្រទេសមីយ៉ាន់ម៉ា។
ការសម្រេចយកពន្ធនេះ ធ្វើឡើងបន្ទាប់ពីគណៈកម្មការសហភាពអឺរ៉ុបបានបើកការស៊ើបអង្កេតជុំវិញសំណុំរឿងអង្ករនេះ ក្រោយពីមានបណ្ដឹងរបស់ប្រទេសអ៊ីតាលី និងមានការគាំទ្រពីប្រទេសមួយចំនួន ដែលបានចោទថាអង្ករកម្ពុជា និងមីយ៉ាន់ម៉ាដែលនាំចូលសហភាពអឺរ៉ុប បានធ្វើឲ្យប៉ះពាល់អ្នកផលិតនៅប្រទេសទាំងនោះ៕