កីឡាជាតិ
ជាតិ
វិសាខាជោគជ័យក្នុងអំឡុងហ្វឹកហាត់នៅថៃ តែគ្រូបង្វឹកថា ក្រុមនៅខ្សោយតំបន់ប្រយុទ្ធ
លោក ហុក សុជិវ័ន្ត គ្រូបង្វឹកក្រុមវិសាខា(អាវក្រហម)ផ្តល់បទសម្ភាសដល់អ្នកសារព័ត៌មានក្នុងអំឡុងហ្វឹកហាត់នៅថៃ, រូបភាពពីហ្វេសប៊ុកក្លិបបាល់ទាត់វិសាខា
×![]()
ក្រុមបាល់ទាត់វិសាខាបានទៅបោះជុំរុំហ្វឹកហាត់រយៈពេល១២ថ្ងៃនៅប្រទេសថៃ ដើម្បីពង្រឹងសមត្ថភាពត្រៀមមុនបើករដូវកាលថ្មីនៃក្របខណ្ឌលីកនិងពានសម្តេច ហ៊ុន សែន។ គ្រូបង្វឹកក្រុមវិសាខាបានអះអាងថា កូនក្រុមខ្លួនមានសមត្ថភាព និងឆន្ទៈខ្ពស់ក្នុងការប្រកួត តែពួកគេនៅមានចំណុចខ្វះខាតក្នុងតំបន់ប្រយុទ្ធ។
ក្នុងអំឡុងពេលបោះជុំរុំហ្វឹកហាត់នៅប្រទេសថៃ ក្រុមបាល់ទាត់វិសាខាទទួលបានជោគជ័យយ៉ាងត្រចះត្រចង់ តាមរយៈមិនដែលស្គាល់ចាញ់សម្រាប់ជំនួបមិត្តភាព៥លើកជាក្រុមមានមូលដ្ឋាននៅថៃ និងមកពីម៉ាឡេស៊ី។ ក្នុងនោះបានយកឈ្នះអតីតក្រុមរបស់កីឡាករ ចាន់ វឌ្ឍនាកា Pahang FA ៣-១, ឈ្នះក្រុម RSU FC ៥-០, ឈ្នះ MOF Customs United ១-០, ឈ្នះ Air Force United ១-០ និងស្មើ ១-១ ជាមួយ MOF Customs United ក្នុងជំនួបលើកទី២។
ទោះបីយ៉ាងនេះក្តី លោក ហុក សុជីវ័ន្ត គ្រូបង្វឹកក្រុមវិសាខាហាក់មិនទាន់ពេញចិត្តនឹងទម្រង់លេងរបស់ក្រុមនៅឡើយទេ បន្ទាប់ពីលោកសង្កេតឃើញថា ក្រុមនៅមានចំណុចខ្វះខាតត្រង់តំបន់ប្រយុទ្ធ។ ប៉ុន្តែគ្រូបង្វឹករូបនេះប្តេជ្ញាថា លោកនឹងខិតស្វែងរកវិធីសាស្ត្រធ្វើយ៉ាងណាឲ្យតំបន់ប្រយុទ្ធរបស់ក្រុមកាន់តែប្រសើរឡើងថែមទៀត។
«ក្នុងអំឡុងពេលហ្វឹកហាត់នៅទីនេះ(ថៃ) ចំណុចមួយដែលយើងនៅស្ទើរ គឺតំបន់ប្រយុទ្ធយើងមិនទាន់ស៊ីចង្វាក់គ្នាល្អ១០០ភាគរយនៅឡើយទេ។ នៅកម្ពុជា យើងពិបាកស្វែងរកកីឡាករខ្មែរលេងក្នុងតំបន់ប្រយុទ្ធស៊ីចង្វាក់គ្នាណាស់ បើធៀបនឹងកីឡាករកូរ៉េខាងជើង ពួកគេយល់ចិត្តគ្នាច្រើន។ យើងនឹងព្យាយាមធ្វើយ៉ាងណាឲ្យពួកគាត់លេងយល់ចិត្តគ្នាឲ្យកាន់តែច្រើនជាងនេះ»។ នេះជាការលើកឡើងរបស់លោក ហុក សុជីវ័ន្ត។
តែយ៉ាងណាគ្រូបង្វឹករូបនេះបានចាត់ទុកលទ្ធផលខាងលើជាជោគជ័យមួយលើសការរំពឹងទុករបស់ខ្លួន។ លោកបានបន្ថែមថា៖«ពួកគាត់បានធ្វើលើសពីអ្វីដែលយើងបានគ្រោងទុកមុនមកបោះជុំរុំនៅថៃ ពិសេសក្នុងជំនួបជាមួយក្រុមខ្លាំងៗដូចជា Pahang FA, Customs និង Air Force ជាដើម។ យើងពិបាកមែនទែនក្នុងការសម្រេចឲ្យកីឡាករចូលលេង ព្រោះទាំងកីឡាករវ័យក្មេង និងចាស់សុទ្ធតែបានបង្ហាញឆន្ទៈថា ពួកគេមានសមត្ថភាពលេងបានគ្រប់ពេល»។
សម្រាប់អ្នកចាត់ទូទៅក្រុមវិសាខាលោក ហុក សុចិត្រា ក្រៅពីទទួលបានបទពិសោធក្នុងការលេងបាល់ទាត់ ការបោះជុំរុំនេះ ជួយបង្កើនទំនុកចិត្ត និងកសាងទំនាក់ទំនងល្អរវាងកីឡាករក្នុងក្រុមឲ្យកាន់តែល្អប្រសើរទាំងការហ្វឹកហាត់ ប្រកួត និងរស់នៅលក្ខណជាក្រុម។
«គោលបំណងរបស់យើង គឺចង់ឲ្យពួកគាត់យល់ពីគ្នា កុំឲ្យយល់ថា ពួកគេមកពីក្លិបនេះឬក្លិបនោះទៀត។ មួយវិញទៀត គឺដើម្បីបង្កើនសមត្ថភាពយល់ដឹងពីការហ្វឹកហាត់ និងប្រកួត។ ព្រោះនៅថៃមានក្រុមមានសមត្ថភាព និងបទពិសោធខ្លាំងជាងយើងច្រើន។ ដូច្នេះវាជាឱកាសជួយឲ្យពួកគេអាចយល់ដឹងពីការលេងជាមួយគ្នា និងជាមួយក្រុមមានសមត្ថភាពខ្លាំង»។ នេះជាការបញ្ជាក់របស់លោក ហុក សុចិត្រា។
ការបោះជុំរុំហ្វឹកហាត់រយៈពេល១២ថ្ងៃនៅប្រទេសថៃនេះ គឺដើម្បីពង្រឹងសមត្ថភាពត្រៀមប្រជែងដណ្តើមជើងឯកពានរង្វាន់ក្របខណ្ឌលីកកំពូល និងពានរង្វាន់សម្តេច ហ៊ុន សែន ប្រចាំឆ្នាំ២០១៩៕
Tag:
បាល់ទាត់
ហុក សុជីវ័ន្ត
វិសាខា
© រក្សាសិទ្ធិដោយ thmeythmey.com
