សហភាពអឺរ៉ុបទទូចឲ្យប្រទេសជាសមាជិកទាំងអស់ឲ្យចាត់វិធានការបង្ក្រាបលើរាល់កម្មវិធីផ្តល់ទិដ្ឋាការពិសេស ឬ «ទិដ្ឋាការមាស» ដល់អ្នកវិនិយោគបរទេសទៀត។ អឺរ៉ុបបារម្ភថា ការផ្តល់ទិដ្ឋាការពិសេសនេះជំរុញឲ្យមានអំពើពុករលួយ និងការលាងលុយកខ្វក់កាន់តែខ្លាំងនៅតំបន់អឺរ៉ុបថែមទៀត។
«ការផ្តល់ទិដ្ឋាការមាស» ដល់អ្នកវិនិយោគជាជនបរទេសក្លាយជាបញ្ហាសម្រាប់អឺរ៉ុប។ ស្ថាប័នជំនាញសហភាពអឺរ៉ុបបានព្រមានថា នីតិវិធីផ្តល់ទិដ្ឋាការពិសេសនេះនាំឲ្យកើនឡើងបញ្ហាពុករលួយ និងការលាងលុយកខ្វក់ដែរ។
មន្ត្រីអឺរ៉ុបបានប្រាប់ទីភ្នាក់ងារព័ត៌មាន AFPថា គណៈកម្មការអឺរ៉ុបនឹងបោះពុម្ភរបាយការណ៍លើកដំបូងមួយអំពាវនាវឲ្យប្រទេសសមាជិកចាត់វិធានការរឹតត្បិតសកម្មភាពផ្តល់សញ្ជាតិ ឬសិទ្ធិរស់នៅ ឲ្យក្រុមអ្នកជំនួញបរទេសដែលមានទ្រព្យស្តុកស្តម្ភ ជាពិសេសចិន រុស្ស៊ី និងអាមេរិកដើម្បីជាថ្នូរនឹងទុនវិនិយោគនោះ។
មន្ត្រីអឺរ៉ុបដែលមិនបានបង្ហាញអត្តសញ្ញាណនេះបានបញ្ជាក់ថា របាយការណ៍ដែលនឹងត្រូវបោះពុម្ភផ្សាយនេះរកឃើញថា រាល់នីតិវិធីដែលអនុវត្តដោយប្រទេសអឺរ៉ុបក្នុងគោលដៅទាញទុនវិនិយោគនេះ បង្កផលអាក្រក់ច្រើន ជាពិសេសពាក់ព័ន្ធនឹងបញ្ហាសន្តិសុខជាតិ ការលាងលុយ និងការគេចពន្ធជាដើម។
មន្ត្រីដដែលនោះបានពន្យល់បន្ថែមថា ក្រុមអ្នកវិនិយោគបរទេសដែលស្នើសិទ្ធិរស់នៅ និងសញ្ជាតិនៅអឺរ៉ុប មិនស្ថិតក្រោមការត្រួតពិនិត្យប្រវត្តិរូប និង សន្តិសុខគ្រប់គ្រាន់ឡើយ។ ហេតុដូច្នេះហើយ វាពិបាកខ្លាំងណាស់ក្នុងការទប់ស្កាត់បញ្ហាដែលរាប់ខាងលើនេះ។
ប្រទេសមួយចំនួនដូចជា ម៉ាល់តា, ស៊ីប និងប៊ុលហ្គារី សុទ្ធតែទម្លាប់ផ្តើមសញ្ជាតិដល់អ្នកជំនួញបរទេសដែលស្តុកស្តម្ភ។ កាលណាមានសញ្ជាតិពួកគេអាចធ្វើដំណើរដោយសេរីទៅកាន់ប្រទេសភាគច្រើនក្នុងចំណោមប្រទេសទាំង ២៨ក្នុងសហភាពអឺរ៉ុប។ រដ្ឋខ្លះទៀតផ្តល់សិទ្ធិស្នាក់នៅដល់អ្នកនិយោគបរទេស។
របាយការណ៍ដដែលរកឃើញថា ប្រទេសជាច្រើននៅអឺរ៉ុបប្រើប្រាស់នីតិវិធីពិសេសនេះដើម្បីផ្តល់លិខិតឆ្លងដែនទៅកាន់មនុស្សប្រហែល ៦០០០នាក់ និងផ្តល់សិទ្ធិស្នាក់នៅដល់មនុស្ស ១០ម៉ឺននាក់ក្នុងរយៈពេលមួយទសវត្សរ៍ចុងក្រោយនេះ។ ជាថ្នូរមកវិញ គេអាចទាញបានទុនវិនិយោគដោយផ្ទាល់ប្រហែល ២៩ពាន់លានដុល្លារអាមេរិកឯណោះ។
ជុំវិញការចាត់វិធានការដោះស្រាយ បើសិនជារដ្ឋអឺរ៉ុបមិនមានលទ្ធភាព ឬគ្មានឆន្ទៈរឹតបន្តឹងចំណាត់ការ និងអនុវត្តច្បាប់បានតឹងរ៉ឹងដើម្បីដោះស្រាយបញ្ហានេះ និងអាចធានាបានតម្លាភាពទេ គណៈកម្មការអឺរ៉ុបនឹងចេញវិធានការ បើសិនជាចាំបាច់។
កាលពីខែតុលាកន្លងទៅ អង្គការអន្តរជាតិដូចជា អង្គការតម្លាភាពអន្តរជាតិ និង Global Witness បានទិតៀនបណ្តារដ្ឋអឺរ៉ុបដែរ ចំពោះការអនុវត្តលក្ខខណ្ឌអនុគ្រោះពិសេសដល់អ្នកវិនិយោគជាថ្នូរនឹងលុយវិនិយោគ។ គេចាត់ទុកថា សញ្ជាតិ និងសិទ្ធិស្នាក់នៅអឺរ៉ុប មិនខុសពីទំនិញប្រណិត តែអាចយកលុយទិញបាន៕