ប្រធានាធិបតីកូរ៉េខាងត្បូង បដិសេធព័ត៌មាន ប្រធានាធិបតីអាមេរិកទារថ្លៃចំណាយលើកងទ័ពអាមេរិក

អន្តរជាតិ

ប្រធានាធិបតីកូរ៉េខាងត្បូង បដិសេធព័ត៌មាន ប្រធានាធិបតីអាមេរិកទារថ្លៃចំណាយលើកងទ័ពអាមេរិក

25, Jan 2019 , 8:39 pm

រូបភាព

ដោយ:

រដ្ឋាភិបាលក្រុងសេអ៊ូល បានបង្ហាញពីការខកចិត្ត និងបដិសេធទាំងស្រុងទៅលើព័ត៌មាន ដែលចុះផ្សាយថា អាមេរិក បានទាមទារឲ្យកូរ៉េខាងត្បូង បង់ប្រាក់ជាច្រើនលានដុល្លារអាមេរិកសម្រាប់ការដាក់ទ័ពអាមេរិកនៅក្នុងទឹកដីខ្លួន។ ក្រុងសេអ៊ូល ថែមទាំងចាត់ទុកព័ត៌មានប្រភេទនេះ ថាជាការប្រមាថធ្ងន់ធ្ងរដល់ថ្នាក់ដឹកនាំប្រទេស។

ថ្មីៗនេះ មានការលេចឡើងពីសារព័ត៌មានមួយចំនួន ដែលបាននិយាយថា ប្រធានាធិបតីអាមេរិក លោក Donald Trump បានធ្វើសំណើមួយទៅកាន់សមភាគីកូរ៉េខាងត្បូង លោក Moon Jae-in ដើម្បីឲ្យកូរ៉េខាងត្បូងបង់ប្រាក់ចំនួន មួយពាន់លានដុល្លារ សម្រាប់ការចំណាយលើការដាក់កងទ័ពអាមេរិកដែលឈរជើងរក្សាសន្តិភាពនៅក្នុងទឹកដីកូរ៉េខាងត្បូង។ នេះបើយោងតាមភ្នាក់ងារព័ត៌មាន Yonhap ។

ព័ត៌មាននេះ ពិតប្រាកដណាស់ថា ធ្វើឲ្យកូរ៉េខាងត្បូង មិនអាចទទួលបានយកបានឡើយ។ « មិនមែនគ្រាន់តែចំពោះករណីប្រធានាធិបតីអាមេរិកនោះទេ ក៏ប៉ុន្តែគ្រប់មេដឹកនាំរបស់ប្រទេសនៃពិភពលោក មិនដែលនិយាយភាសាបែបនេះឡើយ» ។ នេះ គឺជាការឆ្លើយតបរបស់ប្រធានាធិបតីកូរ៉េខាងត្បូងទៅនឹងសារព័ត៌មាន តាមរយៈអ្នកនាំពាក្យរបស់ខ្លួន។

អ្នកនាំពាក្យរូបនេះ បានសង្កត់ធ្ងន់ថា ការចុះផ្សាយព័ត៌មានបែបនេះ អាចចាត់ទុក ជាការប្រមាថដ៏ធ្ងន់ធ្ងរមួយលើលោកប្រធានាធិបតីអាមេរិក Donald Trump។ តាមអ្នកនាំពាក្យ លោកប្រធានាធិបតី Moon និងលោកប្រធានាធិបតី Trump តែងតែពិភាក្សាគ្នាពីកិច្ចព្រមព្រៀងពាណិជ្ជកម្មសេរី និងការចែករំលែកនៃកម្មវិធីចំណាយលើវិស័យការពារជាមួយគ្នា ក៏ប៉ុន្តែមេដឹកនាំទាំងពីរ មិនដែលលម្អិតដល់ចំនួនជាក់លាក់ និងលក្ខខណ្ឌនៃការចំណាយអ្វីឡើយ។

គួរជម្រាបផងដែរថា ក្រោយពីបញ្ចប់សង្គ្រាមនៅឧបទ្វីបកូរ៉េឆ្នាំ១៩៥០-១៩៥៣ អាមេរិក នៅតែបន្តដាក់បញ្ឈរជើងកងទ័ពរបស់ខ្លួននៅក្នុងទឹកដីកូរ៉េខាងត្បូង ដែលជាសម្ព័ន្ធមិត្តចាក់ទឹកមិនលិចរបស់ខ្លួនដើម្បីធានាពីសន្តិសុខ និងសុវត្ថិភាព ជាពិសេសដើម្បីទប់ស្កាត់ការវាយប្រហារណាមួយពីកូរ៉េខាងជើង។

តាម Yonhap អាមេរិក បានដាក់កងទ័ពរបស់ខ្លួននៅកូរ៉េខាងត្បូង ប្រមាណជិតបីម៉ឺននាក់ ហើយឆ្នាំ២០១៨ ដែលទើបតែបញ្ចប់ទៅថ្មីៗនេះ កូរ៉េខាងត្បូង បានចំណាយថវិកាអស់ប្រមាណជាង ៨០០ លានដុល្លារអាមេរិក សម្រាប់ការជួយសម្រួលបន្ទុកយោធានេះ៕