​ក្រោយ​បិទ​អស់​រយៈពេល ៣៥​ថ្ងៃ ដែលជា​រយៈពេល​វែង​ជាងគេ​ក្នុង​ប្រវត្តិសាស្ត្រ​អាមេរិក រដ្ឋាភិបាល​សហព័ន្ធ​ទាំងស្រុង​ត្រូវ​បើក​ដំណើរការ​ឡើងវិញ​។ ការបើក​ឡើងវិញ​នេះ​ធ្វើឡើង​ក្រោយ​ពេលដែល​លោក ដូ​ណា​ល់ ត្រាំ ព្រម​ចុះហត្ថលេខា​លើ​វិធាន​ការផ្តល់​កញ្ចប់​ថវិកា​ដល់ទី​ភ្នាក់ងារ​ដែល​ត្រូវ​បិទ​ដំណើរការ ដោយ​ទុក​រឿង​លុយ​ថ្លៃ​ជញ្ជាំង ៥,៧​ពាន់​លាន​ដុល្លារ​មួយ​ឡែក​សិន​។  
 

​យោងតាម​ទីភ្នាក់ងារ​ព័ត៌មាន AFP ថ្វីបើ​រដ្ឋាភិបាល​ទាំងស្រុង​ចាប់ផ្តើម​ដំណើរ​ដំណើរការ​ជា​ប្រក្រតី​ក៏ពិតមែន កញ្ចប់​ថវិកា​កំណត់​ក្នុង​ដំណោះស្រាយ​ដែលមាន​ការឯកភាព​គ្នា​នេះ មាន​រយៈពេល​ប្រើប្រាស់​បណ្តោះអាសន្ន​ប៉ុណ្ណោះ​ពោលគឺ​ត្រឹម​ថ្ងៃ ១៥ ខែកុម្ភៈ​។​
 

​លោក ត្រាំ បានទាមទារ​ថវិកា ៥,៧ ពាន់​លាន​ដុល្លា​សម្រាប់​សង់​ជ​ញ្ជាំ​ព្រំដែន​ជាមួយ​ម៉ិ​ក​ស៊ិ​ក​ជា​ថ្នូរ​នឹង​ការបើក​រដ្ឋាភិបាល​ទាំងស្រុង​ឡើងវិញ​។ ប៉ុន្តែ​ដល់​ចុង​សប្តាហ៍​ប្រធានាធិបតី​រូបនេះ​ហាក់​ប្តូរ​ជំហរ​បន្តិច​ដោយ​ព្រម​អនុញ្ញាត​ឲ្យ​មានការ​អនុវត្ត​វិធានការ​បណ្តោះអាសន្ន​នេះ​ដើម្បី​បើកផ្លូវ​ឲ្យ​មាន​ចរចា​។ 
 

​ក្នុងពេល​បើក​រដ្ឋាភិបាល​ទាំងស្រុង​បណ្តោះអាសន្ន​នេះ សមាជិកសភា​ទាំងពីរ​បក្ស​ប្រញាប់ប្រញាល់​ជជែក​ពិភាក្សាគ្នា​ពី​កិច្ចព្រមព្រៀង​សមស្រប​មួយ​សម្រាប់​គ្រប់គ្រង​បញ្ហា​ជនអន្តោប្រវេសន៍​។ សភា​អាមេរិក​នឹង​បង្កើត​គណៈកម្មការ​ចម្រុះ​មួយ​ដែលមាន​សមាជិកសភា​តំណាង និង​ព្រឹទ្ធសភា​មកពី​បក្ស​ទាំងពីរ​ដើម្បី​រក​ដំណោះស្រាយ​រួម​លើ​បញ្ហា​សន្តិសុខ​ព្រំដែន​នេះ​ផង​។ 
 

​យ៉ាងណាក៏ដោយ លោក ត្រាំ នៅតែ​លើកឡើង​ជាថ្មី​ពី​ការទាមទារ​ជញ្ជាំង​ព្រំដែន ឬ​យ៉ាងហោចណាស់​មានការ​សង់​រនាំង​ដែកថែប ហើយ​លោក​ក៏​គំរាម​ឲ្យ​មាន​ការបិទ​រដ្ឋាភិបាល​ដោយ​ផ្នែក​ឡើងវិញ​ទៀត ឬក៏​អាច​ប្រកាស​ដាក់​រដ្ឋ​ក្នុង​ភាពអាសន្ន​តែម្តង បើសិនជា​សភា​មិនអាច​បង្កើត​កិច្ចព្រមព្រៀង​ដែល​លោក ចង់បាន​ទេនោះ​។ 
 

​ដោយឡែក​ការព្រម​ទទួលយក​ចំណាត់​ការបើក​រដ្ឋាភិបាល​ទាំងស្រុង​បណ្តោះអាសន្ន​នេះ​ធ្វើ​ឲ្យ​មាន​ពាក្យរិះគន់​ប្រធានាធិបតី ដ្បិតថា​លោក​អះអាង​ជារឿយៗ​ថា​លោក​មិន​ចុះ​ហត្ថ​លេខ​លើ​វិធានការ​នេះ​ទេ បើ​មិនបាន​លុយ​សង់​ជញ្ជាំង​។ អ្នកខ្លះ​ចាត់ទុកថា សកម្មភាព​នេះ​បង្ហាញថា លោក ត្រាំ លើក​ទង់ជ័យ​ស​ហើយ​។ 
 

​ឃើញ​ការរិះគន់ លោក ត្រាំ ប្រញាប់​សរសេរ​សារ​បង្ហោះ​តាម​គណនី twitter ខ្លួន​ភ្លាម​តែម្តង​ដោយ​ទាត់ចោល​រាល់​ការរិះគន់​ថា​លោក បរាជ័យ និង​ព្រម​ចុះចាញ់​រឿង​ទារលុយ​សង់​ជញ្ជាំង​។ លោក ត្រាំ អះអាង​ដូច្នេះ​៖« វា​មិនមែនជា​ការចុះចាញ់​ឡើយ​។ វា​ជាការ​យកចិត្តទុកដាក់​លើ​មនុស្ស​រាប់លាន​នាក់​ដែល​កំពុង​រង​ការឈឺចាប់​ខ្លួន​ដោយសារ​ការបិទ​រដ្ឋាភិបាល ហើយ​គេ​គួរ​យល់ថា ២១​ថ្ងៃ​ទៀត បើសិនជា​គ្មាន​កិច្ចព្រមព្រៀង​មួយ​សមស្រប​ទេ រឿង​ល្អមើល​នឹង​ចាប់ផ្តើម​ជាថ្មីទៀត​»​។​

I wish people would read or listen to my words on the Border Wall. This was in no way a concession. It was taking care of millions of people who were getting badly hurt by the Shutdown with the understanding that in 21 days, if no deal is done, it’s off to the races!

— Donald J. Trump (@realDonaldTrump) January 26, 2019