អន្តរជាតិ
ហ្វីលីពីន បារម្ភក្រុមហ៊ុនចិនអាចកាន់កាប់ផែសមុទ្រអតីតមូលដ្ឋានទ័ពអាមេរិកនៅ Subic Bay
× រដ្ឋាភិបាលក្រុងម៉ានីល កំពុងតែស្វះស្វែងរកដំណោះស្រាយទាន់ពេល និងសក្តិសមបំផុតមួយ បន្ទាប់ពីក្រុមហ៊ុនក្នុងស្រុកធំមួយ ដែលមានទីតាំងក្នុងផែសមុទ្រជាអតីតមូលដ្ឋានទ័ពអាមេរិក Subic Bay ក្បែរសមុទ្រចិនខាងត្បូង បានប្រកាសក្ស័យធន ហើយគេបារម្ភថា ក្រុមហ៊ុនចិននឹងមានឱកាសទិញយកក្រុមហ៊ុននេះ។ បណ្តាអ្នកនយោបាយហ្វីលីពីន ចាប់ផ្តើមព្រួយបារម្ភ ដ្បិតថា បើក្រុមហ៊ុនចិនទិញ និងគ្រប់គ្រង វាអាចបង្កជាបញ្ហាស្មុគស្មាញសម្រាប់សន្តិសុខហ្វីលីពីន។
ក្រុមហ៊ុនសាងសង់នាវា Hanjin Heavy Industries and Construction Philippines ដែលជាសាខារោងចក្រសាងសង់នាវារបស់កូរ៉េខាងត្បូង នៅក្នុងខែមករានេះ បានប្រកាសក្ស័យធន បន្ទាប់ពីខកខានមិនបានសងបំណុលជាង៤០០លានដុល្លារទៅឲ្យធនាគារហ្វីលីពីន។ ក្រុមហ៊ុន ដែលមានទីតាំងនៅតំបន់ឆ្នេរ Subic Bay ហ្វីលីពីននេះ បានប្រតិបត្តិការជាច្រើនឆ្នាំមកហើយ។
តាមការចុះផ្សាយរបស់សារព័ត៌មាន CNBC ទីតាំងរបស់ក្រុមហ៊ុនសាងសង់នាវា គឺជាអតីតមូលដ្ឋានទ័ពអាមេរិក ដែលស្ថិតក្បែរតំបន់មានជម្លោះអធិបតេយ្យសមុទ្រចិនខាងត្បូងរវាងចិន និងហ្វីលីពីនផងដែរ។ ការបរាជ័យក្នុងរបររកស៊ីដ៏ធំមួយក្នុងទឹកដីហ្វីលីពីន រហូតដល់ការប្រកាសគ្មានលទ្ធភាពសងបំណុល ក៏កំពុងតែក្លាយជាក្តីបារម្ភធំមួយ ដ្បិតកម្មករក្នុងស្រុកជាច្រើននាក់ ក៏កំពុងតែប្រឈមនឹងភាពអត់ការងារធ្វើទៀតផង។
តាមប្រភពព័ត៌មានដដែលនោះ ក្រុមហ៊ុន បានស្នើរដ្ឋាភិបាលហ្វីលីពីនឲ្យជួយស្វែងរកអ្នកវិនិយោគដើម្បីបន្តប្រតិបត្តិការរោងចក្រសាងសង់កប៉ាល់មួយនេះ ជាពិសេសនោះ ជួយស្រោចស្រង់បុគ្គលិក ដែលភាគច្រើនជាប្រជាជនក្នុងស្រុកជាច្រើននាក់ដែលបម្រើការងារនៅទីនោះ។ ភ្លាមៗជាមួយនឹងការប្រកាសក្ស័យធននេះ ក៏មានក្រុមហ៊ុនចិនមួយចំនួន បានបង្ហាញចំណាប់អារម្មណ៍ចង់ទិញយកផងដែរ។
ជុំវិញបញ្ហានេះ រដ្ឋាភិបាលហ្វីលីពីន ក៏មិនបានស្ងៀមដែរ ហើយព្យាយាមស្វះស្វែងរកមធ្យោបាយសមស្របមួយដើម្បីទប់ស្កាត់ក្រុមហ៊ុនចិនទិញយកតំបន់នោះ។ តាម CNBCដដែល មន្ត្រីជាន់ខ្ពស់ហ្វីលីពីន ដែលរួមទាំងរដ្ឋមន្ត្រីការពារជាតិផងនោះ បានបង្ហាញពីក្តីបារម្ភពីវត្តមានរបស់ក្រុមហ៊ុនចិននៅតំបន់ ថាតើមានចេតនាគ្រាន់តែមកធ្វើពាណិជ្ជកម្មឬយ៉ាងណានោះ។
ហើយនោះក៏ព្រោះតែហ្វីលីពីន និងចិន ក៏កំពុងតែមានរឿងជម្លោះអធិបតេយ្យនៃសមុទ្រចិនខាងត្បូង ដែលក្បែរនឹងតំបន់នោះស្រាប់ នៅមិនទាន់បានដោះស្រាយគ្នា។
គួរជម្រាបថា តំបន់ឆ្នេរ Subic Bay មានទំហំប្រហែលប្រទេសសិង្ហបុរី។ ពីមុនតំបន់នេះ ត្រូវបានប្រើប្រាស់ជាមូលដ្ឋានទ័ពរបស់អេស្ប៉ាញ និងក្រោយមករបស់អាមេរិកដែលត្រូវបានគេចាត់ទុកថាជា មូលដ្ឋានទ័ពធំបំផុតមួយរបស់អាមេរិកដែរ។ ចាប់ពីបិទដំណើរការមូលដ្ឋានយោធានេះនៅទសវត្សរ៍ឆ្នាំ១៩៩០មក រដ្ឋាភិបាលហ្វីលីពីន ក៏បានសម្រេចប្រែក្លាយតំបន់នេះឲ្យទៅជាតំបន់សេដ្ឋកិច្ចពិសេសវិញ៕
Tag:
ហ្វីលីពីន
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com