កីឡាការិនីខ្មែរ-បារាំង Phai Laurie ម្ចាស់ជើងឯកលើវិញ្ញាសារត់ចម្ងាយ៣២គីឡូម៉ែត្រ នាព្រឹត្តិការណ៍ Angkor Ultra Trail ចង់ធ្វើជាកីឡាការិនីជម្រើសជាតិ និងតំណាងកម្ពុជាក្នុងការប្រកួតលើឆាកអន្តរជាតិ។ ការក្លាយជាកីឡាការិនីជម្រើសជាតិកម្ពុជា វាជាក្តីស្រមៃ ដែលកីឡាការិនវ័យ៣២ឆ្នាំរូបនេះ បានប៉ងតាំងពីក្មេង។ លោក វ៉ាត់ ចំរើន អះអាងថា Phai Laurie អាចក្លាយជាកីឡាការិនីជម្រើសជាតិបាន ទាល់តែនាងមានសមត្ថភាព និងកំណត់ត្រាល្អជាងកីឡាការិនីកម្ពុជា។
ដោយមានឳពុកជាជនជាតិខ្មែរ ដែលបានភៀសខ្លួនទៅរស់នៅនិងរៀបការជាមួយស្ត្រីជនជាតិបារាំង បានជំរុញឲ្យកីឡាការិនីខ្មែរ-បារាំង Phai Laurie ចង់តំណាងប្រទេសកំណើតឳពុករបស់នាង ក្នុងការប្រកួតនានាលើឆាកអន្តរជាតិ។ កីឡាការិនីវ័យ៣២ឆ្នាំរូបនេះ រីករាយនឹងធ្វើជាកីឡាការិនីអត្តពលកម្មជម្រើសជាតិកម្ពុជា បើមានការអនុញ្ញាត ឬស្នើពីថ្នាក់ដឹកនាំកីឡាកម្ពុជា។ បើសិន Laurie អាចក្លាយជាកីឡាការិនីជម្រើសជាតិមែននោះ មានន័យថា នាងបានសម្រេចគោលបំណងដែលប៉ងតាំងពីក្មេង។
ក្នុងបទសម្ភាសជាមួយអ្នកសារព័ត៌មានកីឡាការិនីរូបនេះបានរៀបរាប់ដូច្នេះថា៖«វាជាក្តីសុបិនរបស់ខ្ញុំ បើសិនអាចក្លាយជាកីឡាការិនីជម្រើសជាតិកម្ពុជា ហើយខ្ញុំរីករាយនឹងធ្វើជាកីឡាការិនីតំណាងឲ្យកម្ពុជា។ ខ្ញុំ ក៏រីករាយផងដែរ បើសិនបានជួយអភិវឌ្ឍន៍វិស័យកីឡាអត្តពលកម្មកម្ពុជាឲ្យកាន់តែរីកចម្រើន»។ Laurie រំពឹងថា ថ្នាក់ដឹកនាំកីឡា ពិសេសគណៈកម្មាធិការជាតិអូឡាំពិកកម្ពុជាមើលឃើញពីការប្រឹងប្រែងរបស់នាង និងជួយឲ្យនាងបានសម្រេចក្តីស្រមៃចង់ក្លាយជាកីឡាការិនីតំណាងកម្ពុជា។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា កម្ពុជាគាំទ្រនិងស្វាគមន៍ជានិច្ចសម្រាប់វត្តមានរបស់កីឡាការិនីរូបនេះក្នុងក្រុមជម្រើសជាតិកម្ពុជា។ ប៉ុន្តែ លោកទាមទារឲ្យកីឡាការិនីខ្មែរ-បារាំងរូបនេះខិតខំប្រឹងប្រែងអភិវឌ្ឍន៍សមត្ថភាពធ្វើយ៉ាងណា ឲ្យមានកំណត់ត្រាល្អក្នុងកម្រិតដែលអាចទទួលយកបាន។
«គាត់(Laurie)ត្រូវខិតខំធ្វើយ៉ាងណាឲ្យកំណត់ត្រា(Record)ចូលក្នុងស្តង់ដារណាមួយ បើសិនគាត់ចូលក្នុងស្តង់ដារណាមួយភ្លាមយើងនឹងទទួលយកគាត់ភ្លាម។ បើគាត់អាចធ្វើបាន២ម៉ោង៣០នាទី ឬក្រោមនេះ គឺគាត់អាចចូលរួមរត់ក្នុងព្រឹត្តិការណ៍ម៉ារ៉ាតុនលំដាប់អន្តរជាតិនិងពិភពលោកបាន ហើយយើងក៏ទទួលយកគាត់ផងដែរ»។ លោក វ៉ាត់ ចំរើន លើកបែបនេះ ហើយបន្ថែមថា កម្ពុជាបានទាក់ទងជាប់ជានិច្ច ដើម្បីតាមដានពីកំណត់ត្រារបស់នាង។ បច្ចុប្បន្ន Laurie មានកំណត់ត្រា២ម៉ោង៣២នាទីក្នុង Record នៃព្រឹត្តិការណ៍ម៉ារ៉ាតុនអន្តរជាតិ។
រដ្ឋលេខាធិការក្រសួងទេសចរណ៍រូបនេះបានបន្ថែមទៀតថា កាលពីពីរឆ្នាំមុនកីឡាការិនីខ្មែរ-បារាំង Phai Laurie រួមជាមួយឳពុកបានមកជួបពិភាក្សាជាមួយលោក ពាក់ព័ន្ធនឹងការស្នើសុំចូលធ្វើជាកីឡាការិនីជម្រើសជាតិនេះ។ ពេលនោះលោកបានឆ្លើយតបថា លោកគាំទ្រនិងបើកចំហជានិច្ច ហើយលោកជំរុញឲ្យកីឡាការិនីរូបនេះ ត្រូវខិតខំប្រឹងប្រែងអភិវឌ្ឍន៍សមត្ថភាពឲ្យកាន់តែប្រសើរថែមទៀត។
កាលពីថ្ងៃទី១៩ ខែមករា ឆ្នាំ២០១៩ កីឡាការិនី Phai Laurie បានលើកបង្ហាញទង់ជាតិកម្ពុជានៅមុខកីឡាករកីឡាការិនីអន្តរជាតិមកពីបណ្តាប្រទេសប្រមាណជាង៤០ ក្រោយឈ្នះជើងឯកលើវិញ្ញាសារត់ចម្ងាយ៣២គីឡូម៉ែត្រប្រចាំព្រឹត្តិការណ៍ Angkor Ultra Trail ប្រចាំឆ្នាំ២០១៩ បន្ទាប់ពីនាងប្រើពេល២ម៉ោង៤៤នាទី៣៨វិនាទី។ ជោគជ័យនេះ ជាសញ្ញាល្អមួយក្នុងការឈានទៅសម្រេចក្តីស្រមៃចង់ក្លាយជាកីឡាការិនីជម្រើសជាតិសម្រាប់ Laurie ដែលធ្លាប់ឈ្នះជើងឯកប្រចាំព្រឹត្តិការណ៍នេះពីរកន្លងមក។
ជាមួយការបង្ហាញអារម្មណ៍រំភើបរីករាយ ដែលបានមកចូលរួមរត់នៅលើទឹកដីកម្ពុជាសាជាថ្មី កីឡាការិនីខ្មែរ-បារាំងរូបនេះបានបញ្ជាក់ថា នាងមានមោទកភាពមែនទែន ដែលបានរត់តំណាងឲ្យកម្ពុជា និងលើកទង់ជាតិកម្ពុជា។ «ខ្ញុំមានមោទកភាពណាស់ ដែលលើកទង់ជាតិប្រទេសកំណើតឳពុកខ្ញុំ ដែលគាត់បានភៀសខ្លួនពីទឹកដីកម្ពុជាទៅរស់នៅប្រទេសបារាំងតាំងពីអាយុ២៥ឆ្នាំ»។ នេះជាការឆ្លើយតបនឹងសំណួររបស់អ្នកសារព័ត៌មាន ដែលសួរថា Laurie ថា ហេតុអ្វីនាងលើកទង់ជាតិកម្ពុជា៕