អន្តរជាតិ
វៀតណាម-ថៃ ប្តេជ្ញាបង្កើនទំហំពាណិជ្ជកម្មទ្វេភាគីឲ្យបាន ២០ ពាន់លានដុល្លារត្រឹមឆ្នាំ២០២០
រូបភាព vov.vn
×![]()
រដ្ឋាភិបាលក្រុងហាណូយ និងរដ្ឋាភិបាលក្រុងបាងកក បានព្រមព្រៀងគ្នាក្នុងការចាត់វិធានការជំរុញ និងបង្កើនកិច្ចសហប្រតិបត្តិការដើម្បីសម្រេចឲ្យបានទំហំពាណិជ្ជកម្មទ្វេភាគី ២០ ពាន់លានដុល្លារ ត្រឹមឆ្នាំ២០២០។ ការប្តេជ្ញាចិត្តរបស់សមាជិកអាស៊ានទាំងពីរ ធ្វើឡើងស្របពេលអាស៊ានក៏កំពុងតែបន្តធ្វើសមាហរណកម្មគ្រប់វិស័យជាមួយនឹងគ្នាផងដែរ។ 
តាមរយៈកិច្ចប្រជុំរយៈពេលពីរថ្ងៃនៅក្នុងក្រុងបាងកកនៅចុងសប្តាហ៍មុន ឧបនាយករដ្ឋមន្ត្រី និងជារដ្ឋមន្ត្រីការបរទេសវៀតណាម លោក Phạm Bình Minh និងរដ្ឋមន្ត្រីការបរទេសថៃ លោក Don Pramudwinai បានឯកភាពគ្នាក្នុងការបង្កើតលក្ខខណ្ឌអនុគ្រោះសម្រាប់ការធ្វើធុរកិច្ចរបស់ប្រទេសទាំងពីរដើម្បីបង្កើនការវិនិយោគ និងកិច្ចសហប្រតិបត្តិការធុរកិច្ច ក៏ដូចជាជំរុញសកម្មភាពនាំចេញនិងនាំចូលរវាងប្រទេសទាំងពីរ។ នេះបើយោងតាមការចុះផ្សាយរបស់ភ្នាក់ងារព័ត៌មាន Vietnam News។
តាមប្រភពព័ត៌មានដដែលនោះ តំណាងប្រទេសទាំងពីរ ក៏បានព្រមព្រៀងក្នុងកិច្ចសហប្រតិបត្តិការលើកកម្ពស់ និងចែករំលែកពីការស្រាវជ្រាវពាក់ព័ន្ធស្រូវអង្ករ ដែលរាប់បញ្ចូលទាំងសង្វាក់ផលិតកម្ម និងការនាំចេញទៀតផង។ ភាគីទាំងពីរ បានសង្កត់ធ្ងន់ពីសារៈសំខាន់ពីការពង្រឹងកិច្ចសហប្រតិបត្តិការ នៃការតភ្ជាប់អនុតំបន់ ជាក់ស្តែងលើការតភ្ជាប់ផ្លូវ ការដឹកនាំជញ្ជូនតាមទឹក ដែនអាកាស រវាងវៀតណាម និងថៃ ក៏ដូចជាក្នុងចំណោមប្រទេសអាស៊ាន។
បន្ថែមពីការជំរុញឲ្យកាន់តែមានកិច្ចសហប្រតិបត្តិការពាណិជ្ជកម្មនោះ ភាគីទាំងពីរ ក៏បានប្តេជ្ញាបន្តលើកកម្ពស់ និងពង្រីកកិច្ចសហប្រតិបត្តិការលើវិស័យអប់រំ វប្បធម៌ ការផ្លាស់ប្តូរប្រជាជននិងប្រជាជន ដែលរួមបញ្ចូលទាំងការបង្កើនការបង្រៀនភាសាវៀតណាម និងភាសាថៃ នៅក្នុងប្រទេសនីមួយៗទៀតផង។
គួរជម្រាបផងដែរ នៅឆ្នាំ២០១៩នេះ ថៃ គឺជាប្រធានវិលជុំរបស់អាស៊ាន ដែលមានតួនាទីស្នូលក្នុងការសម្របសម្រួល និងកាច់ចង្កូតការងាររបស់អាស៊ាន ហើយអ្នកបន្តវេនពោលគឺនៅឆ្នាំ២០២០ វៀតណាម នឹងកាន់តំណែង។ លើចំណុចនេះ ភាគីទាំងពីរ ក៏សន្យាធ្វើការជាមួយនឹងប្រទេសសមាជិកដើម្បីលើកកម្ពស់តួនាទីស្នូលរបស់អាស៊ាន និងធានាពីសន្តិភាព សន្តិសុខ និងសុវត្ថិភាពនៅក្នុងតំបន់ រួមទាំងការដោះស្រាយបញ្ហាសមុទ្រចិនខាងត្បូងផងដែរ៕
Tag:
វៀតណាម
ថៃ
© រក្សាសិទ្ធិដោយ thmeythmey.com
