នៅតាមបណ្តាញសង្គមថ្មីៗនេះកំពុងផ្អើលបង្ហោះរូប 10YearChallenge ដែលមនុស្សជុំវិញពិភពលោកនាំគ្នាបង្ហោះកំរងរូបភាពចំនួនពីរសន្លឹក ដោយរូបទី១តាំងពីឆ្នាំ២០០៩ និងមួយទៀតរូបបច្ចុប្បន្ន។ កីឡាករប្រចាំ ONE Championship និងអ្នកប្រដាល់ល្បីៗកម្ពុជាជាច្រើនរូបទៀត ក៏បានចូលរួមលេងក្នុងកម្មវិធីនេះផងដែរ។
អ្នកលេងគុនចម្រុះប្រចាំស្ថាប័នប្រដាល់ ONE Championship និងអ្នកលេងគុនខ្មែរល្បីៗជាច្រើនរូបរួមមានកីឡាករ កែវ រំចង់, ចាន់ រតនា, ខុន ស៊ីចាន់, សំ ថារ័ត្ន, នៅស្រីពៅ និង ឯម សុវណ្ណារី ជាដើម បាននាំគ្នាលេងកម្មវិធី 10 Year Challenge ដើម្បីប្រៀបធៀបមុខមាត់កាលពី១០ឆ្នាំជាមួយមុខមាត់បច្ចុប្បន្ន។ ក្រៅពីកីឡាករ ដែលបានរៀបរាប់ឈ្មោះខាងលើ ក៏មានកីឡាករនិងមហាជនជាច្រើនរូបទៀតដែរ បានចូលរួមលេងកម្មវិធីប្រៀបធៀមមុខមាត់នេះ។
១. ខុន ស៊ីចាន់
ខុន ស៊ីចាន់ ជើងឯក KWC Flyweight Champion កាលពីមុនជាអ្នកលេងគុនខ្មែរម្នាក់ដែរ ប៉ុន្តែមិនទាន់ចាប់យកក្បាច់គុនចម្រុះ ហើយបានប្រកួតអន្តរជាតិនៅឡើយទេ។ នៅថ្ងៃសុក្រ ទី២២ ខែកម្ភៈ ខាងមុខ ស៊ីចាន់ នឹងត្រលប់ចូលប្រកួតនៅ ONE Championship ម្តងទៀត ដោយប៉ះជាមួយកីឡាករឥណ្ឌូនេស៊ី Rudy Augustian ក្នុងទម្ងន់៦១គីឡូក្រាម នៅប្រទេសសិង្ហបុរី ក្នុងព្រឹត្តិការណ៍ ONE: CALL TO GREATNESS។
២. នៅ ស្រីពៅ
នៅ ស្រីពៅ កីឡាការិនីពន្លកថ្មីជើងឯក Kun Khmer World Champion ចាប់ផ្តើមហាត់ប្រដាល់តាំងពីអាយុ១៦ឆ្នាំ បានសាងកេរ្តិ៍ឈ្មោះល្បីខ្លាំងឡើងៗរហូតមានឱកាសបញ្ចេញស្នាដៃជាលើកដំបូងនៅសង្វៀនប្រដាល់ធំជាងគេទូទាំងពិភពលោក។ ១០ឆ្នាំមុន នាងគ្រាន់តែជាក្មេងស្រីម្នាក់ មិនធ្លាប់ទាំងគិតចង់កាន់ហ្គង់ផង តែឥឡូវកំពុងត្រៀមខ្លួនក្នុងការប្រកួតដ៏ធំជាងគេក្នុងជីវិតនាង គឺការប្រកួតគុនចម្រុះនៅទីក្រុងបាងកក ថ្ងៃសៅរ៍ ទី១៦ ខែកុម្ភៈ ក្នុងព្រឹត្តិការណ៍ ONE: CLASH OF LEGENDS។
៣. ចាន់ រតនា
ជើងចាស់គុនខ្មែរដ៏ល្បីឈ្មោះ ចាន់ រតនា ក្នុងរយៈពេល១០ឆ្នាំនេះមានការផ្លាស់ប្តូរច្រើនណាស់។ ពីមុន រតនា មានទម្ងន់ធ្ងន់ជាងធម្មតាមិនមានឱកាសប្រកួតនៅ ONE Championship ក្នុងទម្ងន់៦១គីឡូក្រាមឡើយ។ តែក្រលេកមើលកាលពីថ្ងៃទី៧ ខែធ្នូ ចាន់ រតនា បានត្រលប់ចូលក្នុងទ្រុងម្តងទៀតជាមួយការបង្ហាញសមត្ថភាពដ៏អស្ចារ្យធ្វើឲ្យកក្រើកសង្វៀនធំ ដោយបានផ្តួលខ្លាកំណាចឥណ្ឌូនេស៊ី Abro Fernandes បានសម្រេច។
៤. ឯម សុវណ្ណារី
កីឡាការិនីកូនកាត់ខ្មែរ-អាមេរិក ឯម សុវណ្ណារី កាលពីមុនជាក្មេងស្រីពូកែអៀនម្នាក់ ប៉ុន្តែនាងចាប់ផ្តើមតាំងចិត្តឈប់ខ្មាស រហូតដល់ឥឡូវក្លាយជាអ្នកប្រដាល់ស្រីរះថ្មីម្នាក់ក្នុងឆ្នាំ២០១៩នេះ។ នាការប្រកួតដាក់ទ្រុងនៅទីក្រុងកូឡាឡាំពួរ កាលពីដើមខែធ្នូ នាងបានសាងជ័យជន្នះដ៏ធំធេង ដោយបានផ្តួលកីឡាការិនីជើងខ្លាំងជនជាតិអ៊ុយក្រែន Iryna Kyselova បានយ៉ាងងាយ។
បើយើងមើលរូបភាពកាលពី១០ឆ្នាំមុនរបស់នាងវិញ ប្រហែលមិននឹកស្មានថា នាងអាចទៅធ្វើទៅបានដល់សព្វថ្ងៃឡើយ។ តែយ៉ាងណា សុវណ្ណារី បានជម្នះភាពភ័យខ្លាចនិងអៀនខ្មាស់ ហើយត្រៀមបន្តដំណើរជីវិតក្នុងអាជីពអ្នកប្រដាល់ឲ្យកាន់តែអស្ចារ្យថែមទៀតនៅឆ្នាំ២០១៩នេះ។
៥. សំ ថារត្ន័
១០ឆ្នាំមុន នរណាទៅស្មានបានថា សំ ថារត្ន័ អាចក្លាយជាអតីតកីឡាការិនីប្រដាល់ឲ្យ ONE Championship ហើយក្លាយទៅជាតួកុនដ៏មានប្រជាប្រិយម្នាក់ដូចសព្វថ្ងៃ។ ថារត្ន័ ត្រូវបានគេស្គាល់ថា ជាតារាប្រដាល់ស្រីដ៏មានទេព្យកោសល្យ១រូប។ ហើយនាងយកក្បាច់គុនធ្វើជាស្ពាន ដើម្បីចាប់យកអាជីពជាតារាសម្តែង។ ហើងសង្កេតឃើញថាថ្មីៗនេះ នាងមមាញឹកជាមួយការធ្វើដំណើរទៅក្រៅប្រទេស ដើម្បីផ្សព្វផ្សាយរឿង«Surviving Bokator» នៅសហរដ្ឋអាមេរិក។
កញ្ញាកូនកង្កែបនេះ មានប្រវត្តិប្រកួតនៅ ONE ២ដងឈ្នះទាំងពីរដង យើងសង្ឃឹមថានាងអាចត្រលប់ចូលការប្រកួតតំណាងស្ត្រីកម្ពុជាឲ្យកាន់តែកក្រើកឆាកអន្តរជាតិតម្តងទៀត។
៦. កែវ រំចង់
កំឡុងពេល១០ឆ្នាំ តារាគុនខ្មែរដ៏មានប្រជាប្រិយ កែវ រំចង់ បានមានឈ្មោះបោះសំលេង ដែលកីឡាករផ្សេងៗស្រម៉ៃចង់បាន។ សព្វថ្ងៃ រំចង់ ប្រកួតនៅក្នុងស្រុក ហើយក៏មានបំណងចង់បញ្ចេញសមត្ថភាពនៅ ONE Championship ឲ្យទស្សនិកជនទូទាំងពិភពលោកបានឃើញផងដែរ។ ថ្វីបើទទួលបានជោគជ័យជាច្រើនហូរហែរក៏ដោយ ប៉ុន្តែឆ្នាំ២០១៩នេះ រូបគេរឹតតែប្រឹងហាត់ឲ្យខ្លាំងមួយកំរិតទៀតដើម្បីឲ្យអាជីពរបស់គេកាន់តែល្បីមួយកំរិតទៀត៕