កីឡាជាតិ
ជាតិ
ក្រុមរបស់ ចាន់ វឌ្ឍនាកា ប៉ះក្រុម ធារី ចន្ថាប៊ីន ក្នុងការប្រកួតបើកឆាកលីកកំពូលម៉ាឡេស៊ី កីឡាករ ចាន់ វឌ្ឍនាកា (ឆ្វេង) និង ធារី ចន្ថាប៊ីន ពេលហ្វឹកហាត់ជាមួយក្លិបរៀងៗខ្លួន, រូបភាពពីក្លិប PKNS និង Terengganu
× ការប្រកួតបាល់ទាត់ក្របខណ្ឌកំពូលម៉ាឡេស៊ី Malaysia Super League 2019 បើករដូវកាលថ្មីនៅថ្ងៃទី១ ខែកុម្ភៈ ឆ្នាំ២០១៩ នេះ។ សម្រាប់ជំនួបបើកឆាកដំបូង ក្រុម PKNS របស់កីឡាករ ចាន់ វឌ្ឍនាកា ត្រូវតទល់ជាមួយក្រុម Terengganu របស់កីឡាករ ធារី ចន្ថាប៊ីន ខណៈ Kuala Lumpur ស្វាគមន៍ Pahang FA។
ក្រោយរួមចំណែកមួយគ្រាប់ក្នុងជ័យជម្នះ ២-១ លើក្រុម PKNP នាជំនួបមិត្តភាពកម្តៅសាច់ដុំកាលពីពេលថ្មីៗ ខ្សែប្រយុទ្ធ ចាន់ វឌ្ឍនាកា ត្រូវបន្តជួយក្រុម PKNS ប្រជែងជាមួយក្រុម Terengganu របស់ខ្សែបម្រើខ្មែរ-បារាំង ធារី ចន្ថាប៊ីន នាជំនួបបើកឆាកពានរង្វាន់ Malaysia Super League នៅកីឡដ្ឋាន Sultan Ismail Nasiruddin Shah Stadium។
នេះជាជំនួបដ៏ជក់ចិត្ត ដែលអ្នកគាំទ្រកីឡាបាល់ទាត់កម្ពុជាទន្ទឹងរង់ចាំ បន្ទាប់ពីពួកគេចុះ និងបន្តកិច្ចសន្យាជាមួយក្លិបរៀងៗខ្លួនកាលពីពេលកន្លងទៅ។ ខ្សែបម្រើ ធារី ចន្ថាប៊ីន ដែលបានផ្តេរពីក្លិបអគ្គិសនីកម្ពុជាទៅប្រកបអាជីពជាមួយក្លិប Terengganu នៅឆ្នាំ២០១៨ ត្រូវបានថ្នាក់ដឹកនាំក្លិបនេះ បន្តកិច្ចសន្យាមួយឆ្នាំបន្ថែមដល់រូបគេ។ ចំណែកខ្សែប្រយុទ្ធ ចាន់ វឌ្ឍនាកា បានផ្ទេរពីបឹងកេតទៅចូលរួមជាមួយ PKNS ក្រោមកិច្ចសន្យារយៈពេល១ឆ្នាំ។
ក្រោយត្រឡប់មកពីប្រកបអាជីពជាមួយក្លិបក្របខណ្ឌទី៣ជប៉ុន Fujieda MYFC នៅឆ្នាំ២០១៨ វឌ្ឍនាកា បានចុះកិច្ចសន្យារយៈពេលមួយឆ្នាំលេងឲ្យក្លិបម៉ាឡេស៊ី Pahang FA។ ប៉ុន្តែក្រោយរួមរស់បានពាក់កណ្តាលរដូវកាល កីឡាករមកពីខេត្តកំពតរូបនេះបានចែកផ្លូវគ្នាជាមួយ Pahang FA មកចូលរួមជាមួយទ្រនំចាស់ក្លិបបឹងកេតនៅពាក់កណ្តាលរដូវកាលឆ្នាំ២០១៨។
សម្រាប់ជំនួបឆាកនៅថ្ងៃទី១ ខែកុម្ភៈ ឆ្នាំ២០១៩នេះ ក៏មានការប្រកួតមួយគូទៀតដែរ គឺរវាងក្រុម Kuala Lumpur ជាមួយអតីតក្រុមរបស់ វឌ្ឍនាកា Pahang FA នាកីឡដ្ឋាន KLFA Stadium។ មិនខុសគ្នាពីរដូវកាលមុនឡើយ រដូវកាលនេះ មានក្លិបចូលរួមចំនួន១២៕
Tag:
ចាន់ វឌ្ឍនាកា
ធារី ចន្ថាប៊ីន
Malaysia Super League
© រក្សាសិទ្ធិដោយ thmeythmey.com