ក្រសួងការពារជាតិ ចាត់ទុករបាយការណ៍អាមេរិក ជាការញុះញង់បែបវិទ្ធង្សនា

ជាតិ

នយោបាយជាតិ

ក្រសួងការពារជាតិ ចាត់ទុករបាយការណ៍អាមេរិក ជាការញុះញង់បែបវិទ្ធង្សនា

02, Feb 2019 , 10:58 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ អាមេរិក កំពុងមានចេតនាអាក្រក់ ដែលចង់បំផ្លិចបំផ្លាញភាពឯករាជ្យរបស់កម្ពុជា។ នេះជាការលើកឡើងរបស់ក្រសួងការពារជាតិ ដោយបានច្រានចោលរបាយការណ៍អាមេរិក ដែលនិយាយថា រដ្ឋាភិបាលកម្ពុជានឹងកែរដ្ឋធម្មនុញ្ញ បើកផ្លូវឲ្យមានវត្តមានកងទ័ពបរទេសនៅក្នុងប្រទេស។

ក្រសួងការពារជាតិ ចាត់ទុករបាយការណ៍មន្ទីចារកម្មជាតិអាមេរិក ដែលបានផ្សព្វផ្សាយនេះ ជាការញុះញង់គ្មានមូលដ្ឋានបែបវិទ្ធង្សនា ដើម្បីបង្កឲ្យមានការភាន់ច្រឡំដល់សាធារណមតិជាតិ និងអន្តរជាតិ មកលើឯកភាពរបស់ប្រទេសកម្ពុជា។

សេចក្តីថ្លែងការណ៍ក្រសួងការពារជាតិ ចុះថ្ងៃទី១ កុម្ភៈ បានសរសេរដូច្នេះថា៖« របាយការណ៍ ស្ដីពី ការវាយតម្លៃលើការគំរាមកំហែងទូទាំងពិភពលោករបស់សហរដ្ឋអាមេរិក បានឆ្លុះបញ្ចាំងយ៉ាងច្បាស់នូវ ចេតនាអាក្រក់មួយ ក្នុងការជ្រៀតជ្រែកដ៏ធ្ងន់ធ្ងរចំពោះ កិច្ចការផ្ទៃក្នុងរបស់រដ្ឋអធិបតេយ្យ និងជាការប៉ុនប៉ងបំផ្លិចបំផ្លាញលាបពណ៌មកលើ ភាពឯករាជ្យ អព្យាក្រឹត្យអចិន្ត្រៃយ៍ របស់ព្រះរាជាណាចក្រកម្ពុជា ទោះបីជាមាន ការបំភ្លឺផ្លូវច្បាប់ និងបញ្ជាក់ជំហរយ៉ាងច្បាស់លាស់ ម្តងហើយម្តងទៀតពីសំណាក់ រាជរដ្ឋាភិបាលកម្ពុជា ចំពោះវត្តមានកងទ័ពបរទេសក៏ដោយ»។

អមជាមួយការបដិសេធនេះ ក្រសួងការពារជាតិ ក៏បានរំឭកប្រាប់ទៅអាមេរិកវិញថា កម្ពុជាធ្លាប់ឆ្លងកាត់សង្គ្រាមតាំងឆ្នាំ១៩៧០ ហើយក៏ធ្លាប់រងគ្រោះដោយសារតែមានវត្តមានកងទ័ពបរទេសនៅក្នុងទឹកដី ដូច្នេះកម្ពុជាមិនចង់ឲ្យមានសង្គ្រាមវិលមកជាថ្មី ព្រោះតែការកែរដ្ឋធម្មនុញ្ញ ដើម្បីទទួលវត្តមានកងទ័ពបរទេសនោះដែរ។

ជុំវិញបញ្ហានេះ សម្ដេចនាយករដ្ឋមន្ត្រី ហ៊ុន សែន ធ្លាប់បានអះអាងកាលពីពេលថ្មីៗនេះថា ទោះបីកម្ពុជាពេលនេះ មានលទ្ធភាពកែប្រែរដ្ឋធម្មនុញ្ញក៏ដោយ ក៏សម្ដេចមិនកែប្រែច្បាប់កំពូលរបស់ជាតិ ដើម្បីអនុញាតឲ្យមានមូលដ្ឋានទ័ពបរទេស ឬបញ្ជូនយោធាកម្ពុជាទៅក្រៅប្រទេស ក្រៅពីបេសកកម្មជាមួយអង្គការសហប្រជាជាតិនោះឡើយ។

អត្ថបទទាក់ទង

អាមេរិក ព្រមានថា CPP អាចកែធម្មនុញ្ញបើកផ្លូវឲ្យមានកងទ័ពចិននៅកម្ពុជា តែអ្នកនាំពាក្យ ច្រានចោល

អាមេរិក បានចេញរបាយការណ៍វាយតម្លៃថា គណបក្សប្រជាជនកម្ពុជា អាចនឹងធ្វើវិសោធនកម្មរដ្ឋធម្មនុញ្ញ ដែលអាចបើកផ្លូវឲ្យមានវត្តមានកងទ័ពចិននៅកម្ពុជា។របាយការណ៍វាយតម្លៃការគំរាមកំហែងពិភពលោករបស់អាមេរិក ដែលចេញផ្សាយកាលពីថ្ងៃទី២៩ មករា ជាភាសាអង់គ្លេស ហើយមានន័យជាភាសាខ្មែរយ៉ាងដូច្នេះថា៖«ការឈានឆ្ពោះទៅរកភាពផ្ដាច់ការរបស់កម្ពុជា ដែលស្ដែងឡើងតាមរយៈការរក្សាអំណាចរបស់គណបក្សប្រជាជនកម្ពុជា និងការគ្របដណ្ដប់យ៉ាងពេញលេញនៃស្ថាប័ននីតិប្បញ្ញត្តិជាតិ បើកផ្លូវឲ្យមានការធ្វើវិសោធនកម្មរដ្ឋធម្មនុញ្ញ ដែលអាចឲ្យវត្តមានកងទ័ពចិននៅក្នុងប្រទេស»។

ប៉ុន្តែអ្នកនាំពាក្យគណបក្សប្រជាជនកម្ពុជា បានច្រានចោលព័ត៌មានជុំវិញរបាយការណ៍របស់អាមេរិកនេះ។ លោក សួស យ៉ារ៉ា ចាត់ទុកថា ការវាយតម្លៃរបស់អាមេរិកនេះ ជាទស្សនស្រពិចស្រពិល ដោយគ្មានមូលដ្ឋានច្បាស់លាស់ប៉ុណ្ណោះ ខណៈដែលរដ្ឋាភិបាលបានប្ដេជ្ញាចិត្ត មិនឲ្យមានករណីបែបនេះកើតឡើងឡើយ។

រដ្ឋធម្មនុញ្ញកម្ពុជា ឆ្នាំ១៩៩៣ នៅត្រង់ជំពូកទី៤ និយាយអំពីរបបនយោបាយ មាត្រា៥៣ ត្រង់ចំណុចទី៤ បានចែងថា«…ព្រះរាជាណាចក្រកម្ពុជា មិនអនុញ្ញាតឲ្យមានមូលដ្ឋានយោធាបរទេសនៅលើទឹកដីខ្លួន ហើយក៏មិនអនុញ្ញាតឲ្យមានមូលដ្ឋានយោធាខ្លួននៅលើទឹកដីបរទេសដែរ លើកលែងតែក្របខណ្ឌសំណូពររបស់អង្គការសហប្រជាជាតិ»៕