អត្ថបទ៖ Matias Andres
កីឡាការិនី នៅ ស្រីពៅ នឹងអាចយកឈ្នះកីឡាការិនីថៃ Rika Ishige នាការប្រកួតគុនចម្រុះ ONE Championship ក្នុងព្រឹត្តិការណ៍ ONE: CLASH OF LEGENDS នៅទីក្រុងបាងកកប្រទេសថៃ នាថ្ងៃទី១៦ ខែកុម្ភៈ ឆ្នាំ២០១៩។ នេះជាការបង្ហាញក្តីរំពឹងរបស់កីឡាការិនី វី ស្រីខួច ដែលសរសើរ ស្រីពៅ ជាកីឡាការិនីឆាប់ចាប់បានលើកីឡាគុនចម្រុះ។
កីឡាករតំណាងក្លិប Cambodian Top Team នៅ ស្រីពៅ និង ឡៅ ចិត្រា និងបង្ហាញខ្លួនជាលើកដំបូងនៅក្នុងសង្វៀនដ៏ធំលំដាប់ពិភពលោក ONE Championship នៅទីក្រុងបាងកកប្រទេសថៃ នាថ្ងៃទី១៦ កុម្ភៈ ខាងមុខ។ ស្ថិតក្នុងវ័យ២៤ឆ្នាំ កីឡាការិនី នៅ ស្រីពៅ ម្ចាស់ជើងឯកខ្សែក្រវាត់ Kun Khmer World Champion ត្រូវប៉ះជាមួយកីឡាការិនីថៃ Rika Ishige ក្នុងការប្រកួតគុនចម្រុះប្រភេទទម្ងន់៥២គីឡូក្រាម។ ប្រសិនបើ ស្រីពៅ ពិតជាមានសមត្ថភាពយកឈ្នះជើងខ្លាំងថៃរូបនេះបាន នោះអាជីពជាអ្នកប្រដាល់របស់នាងនឹងខ្ពស់កប់ពពកមិនខាន។
បន្ទាប់ពីទទួលបានពានរង្វាន់ជា«អ្នកប្រដាល់ស្រីឆ្នើមប្រចាំឆ្នាំ»ពីការប្រកួត World Lethwei Championship ពន្លកថ្មី ស្រីពៅ កំពុងខិតខំហ្វឹកហាត់យ៉ាងខ្លាំងជាមួយកីឡាករល្បីៗនៅកម្ពុជាជាច្រើនរូប ដើម្បីត្រៀមកសាងកំណត់ត្រាក្នុងអាជីពបន្ថែមទៀត។
កីឡាការិនី វី ស្រីខួច ដែលជាមិត្តជិតស្និទ្ធជាច្រើនឆ្នាំ និងជារាមច្បងក្នុងអាជីពបានជួយជ្រោមជ្រែងយ៉ាងខ្លាំង តាមរយៈការចូលរួមហ្វឹកហាត់ និងចែករំលែកបទពិសោធដែលនាងធ្លាប់ឆ្លងកាត់ដល់ ស្រីពៅ។ លើសពីនេះ នាង បង្ហើបប្រាប់ថា ការហ្វឹកហាត់ជាមួយគ្នានោះដំណើរការទៅយ៉ាងល្អប្រសើរ។
ជាមួយការរំពឹង ស្រីពៅ នឹងអាចយកឈ្នះកីឡាការិនីថៃខាងលើ កីឡាការិនី វី ស្រីខួច បានសរសើរ ស្រីពៅ យ៉ាងដូច្នេះថា៖«ខ្ញុំសរសើរ ស្រីពៅ ត្រង់គាត់ឆាប់ចាប់បានណាស់ ហើយគាត់ខំទាល់តែចេះតែម្តង។ បើឲ្យប្រៀបជាមួយខ្ញុំវិញ គាត់រហ័សជាងខ្ញុំឆ្ងាយ មកពីគាត់មាឌតូចជាង តែបើនិយាយទៅគាត់រហ័សអីចឹងតែម្តង»។
ស្រីខួច ដែលអះអាងរាប់អានគ្នាជាមួយ ស្រីពៅ ដូចបងប្អូនបង្កើតបានរៀបរាប់ថា ទំនាក់ទំនងរវាងពួកគេទាំងពីរ គឺផ្តើមចេញពីការប្រឡូកក្នុងវិស័យកីឡាប្រដាល់រួមគ្នា ដែលស្ទើរមិនមានស្ត្រីចង់ប្រឡូក។ ប៉ុន្តែ ស្រីខួច អះអាងថា ស្រីពៅ មានលក្ខណៈខុសប្លែកពីនាង ត្រង់គេចេះលើកចិត្តជាងនាង។
«ពេលទំនេរពីហាត់ យើងទៅក្រៅដើរលេងជាមួយគ្នា ពេលខ្លះអង្គុយបង្អាប់គ្នាចុះឡើង។ តែតាមពិតទៅ ស្រីពៅ ហើយនឹងខ្ញុំខុសគ្នាបន្តិច ត្រង់គាត់តែងតែលើកទឹកចិត្តខ្ញុំរហូត ឯខ្ញុំវិញមិនសូវចេះទេ! ខ្ញុំនិយាយតាមត្រង់ ខ្ញុំអរគុណគាត់ខ្លាំងណាស់ ពេលខ្ញុំត្រូវការអ្វីក៏គាត់ជួយខ្ញុំដែរ។ ពេលខ្លះយើងអត់មានលុយចាយអី យើងដឹងតែចេញឲ្យគ្នាទៅវិញទៅមក ហើយចេះជួយឲ្យកម្លាំងចិត្តគ្នាជានិច្ច។ ម្នាក់ៗចង់ឃើញគ្នាបានជោគជ័យដូចគ្នា»។ នេះជាការលើកឡើងរបស់កីឡាការិនី វី ស្រីខួច។
កាលពីបីឆ្នាំមុន ស្រីខួច បានឈ្នះការប្រកួតគុនចម្រុះនៅក្នុងព្រឹត្តិការណ៍ ONE: KINGDOM OF WONDER ដែលធ្វើនៅកម្ពុជា។ ចាប់តាំងពីនោះមក ស្រីខួច មិនសូវបានបង្ហាញខ្លួនក្នុងការប្រកួតគុនចម្រុះនោះទេ ប៉ុន្តែនាងនៅតែខិតខំហ្វឹកហាត់ជាប់លាប់ ហើយក៏បានចូលរួមប្រកួតប្រដាល់គុនខ្មែរ និងប្រដាល់សកល។
ដោយសារ នៅ ស្រីពៅ ត្រូវឡើងប្រកួតឆាប់ៗនេះ ស្រីខួច ក៏បានមកហាត់ជាមួយគ្នានៅក្លិប CTT។ ដោយសារ ស្រីខួច ជារាមច្បងនៅ ONE Championship និងមានបទពិសោធច្រើនសម្រាប់ចែករំលែកដល់មិត្តជិតស្និទ្ធរបស់នាង។ នាងបន្ថែមថា៖«ខ្ញុំប្រាប់គាត់ថា កុំគិតច្រើនដូចខ្ញុំ។ ខ្ញុំធ្លាប់វាយក្នុងទ្រុងនៅ ONE Championship បីដងដែរ អីចឹងខ្ញុំមានបទពិសោធច្រើនដែរ។ ពេលប្រកួតម្តងៗ ខ្ញុំចេះតែបារម្ភខ្លាចគេចូលចាប់ អីចឹងខ្ញុំវាយអត់ចេញទេ»។
ក្រៅពីជួយដាស់តឿនផ្នែកស្មារតី ស្រីខួច ក៏បានជួយសិក្សាស្នៀតរបស់ Rika គូប្រកួតរបស់ ស្រីពៅ ផងដែរ។ ប៉ុន្តែនាងជឿជាក់ថា ស្រីពៅ មានប្រៀបច្រើនលើស្នៀតមួយចំនួន។ «ពីរនាក់ខ្ញុំមើលវីដេអូគូប្រកួតរបស់ ស្រីពៅ ឃើញថា ខាងគេពូកែចាប់ក្រោមខ្លាំង អីចឹងខ្ញុំប្រាប់ ស្រីពៅ ថាឲ្យប្រើចំនុចខ្លាំងគាត់ ជាពិសេសខាងប្រើដៃវាយ។ ហើយធ្វើយ៉ាងណាកុំឲ្យគេចូលចាប់បាន»។
ប្រសិនបើ ស្រីពៅ អាចការពារខ្លួនពីការចូលចាប់ក្រោមបានមែន ស្រីខួច មានជំនឿចិត្តថាមិត្តភក្តិនាងនិងយកជោគជ័យមកផ្ទះវិញជាមិនខាន។ «បើនិយាយពីខាងដាល់ ខាងទាត់ជើង ឬប្រដាល់តែម្តង ខ្ញុំគិតថា Rika មិនអាចប្រៀបជាមួយ ស្រីពៅ ទេ!»៕