កីឡាការិនី ONE Championship ខ្មែរ-អាមេរិក ឯម សុវណ្ណារី បានសហការជាមួយអ្នកជំនាញ រៀបរៀងសៀវភៅជីវចលក្បាច់គុនមួយ ដើម្បីរួមចំណែកបញ្ឈប់មតិរិះគន់មួយចំនួនដែលថា ការហាត់ក្បាច់គុនជារឿងហិង្សា។ សៀវភៅ ដែលប្រើតួអង្គសត្វជាគំនូរជីវចលនេះមានចំណងជើងថា«The Talent Quest» វាជាមូលដ្ឋានគ្រឹះជួយជំរុញទឹកចិត្តកុមារ និងឪពុកម្តាយក្មេងៗឲ្យចូលចិត្តវិស័យក្បាច់គុន។ សុវណ្ណារី ប្តេជ្ញាថា នាងនឹងនិពន្ធសៀវភៅជាបន្តបន្ទាប់ បើសិនស្នាដៃទី១ទទួលបានជោគជ័យ។
ដើម្បីរួមចំណែកបញ្ឈប់កុំឲ្យមានការភាន់ច្រឡំ ដែលយល់ថា ការហាត់ក្បាច់គុនជារឿងហិង្សា កីឡាការិនី ឯម សុវណ្ណារី បានសហការជាមួយលោក Yves Edwards អតីតអ្នកប្រដាល់នៅ UFC និងអ្នកនិពន្ធម្នាក់ គឺអ្នកស្រី Brooke James បង្កើតសៀវភៅជីវចលក្បាច់គុនមួយដែលមានចំណងជើងថា«The Talent Quest»។ សៀវភៅនេះ រៀបរាប់ពីដំណើរជីវិតរបស់អ្នកហាត់ក្បាប់គុនតាំងពីនៅក្មេងរហូតដល់ធំ ដែលអាចនិយាយបានថា ជាមូលដ្ឋានគ្រឹះនៃជីវិតរបស់អ្នកហាត់គុន។
ក្នុងសៀវភៅនោះ មានតួអង្គដូចជា ខ្លាឃ្មុំសម្បុរត្នោត Teddy ខ្លាឈ្មោះ Saaja ឆ្កែឈ្មោះ Dozer សត្វស្វាហៅ Bella និងខ្លាឃ្មុំចំបាប់ឈ្មោះ Gregor។ សុវណ្ណារី សង្ឃឹមថា សៀវភៅ«The Talent Quest» នឹងជាគ្រឹះមួយជួយជំរុញស្មារតីក្មេងតូចៗ ក៏ដូចជាឪពុកម្តាយពួកគេ នឹងយល់ពីអត្ថន័យ ហើយចាប់ផ្តើមសម្លឹងរកហាត់ក្បាច់គុន។
កីឡាការិនីខ្មែរ-អាមេរិកខាងលើបានបញ្ជាក់ថា កត្តាដែលជំរុញឲ្យមានការបង្កើតសៀវភៅនេះឡើង បន្ទាប់ពី នាង សង្កេតឃើញនៅមានមតិមួយចំនួន ពិសេសឪពុកម្តាយក្មេងបន្តមានការភាន់ច្រឡំដោយយល់ថា ការហាត់ក្បាច់គុនជារឿងហិង្សា។ កត្តានេះហើយ ទើមមានឪពុកម្តាយចំនួនហាមឃាត់មិនឲ្យកូនៗរបស់គេទៅហាត់គុននោះទេ ព្រោះខ្លាចយកមកបង្ករឿងផ្សេងៗ។
«យើងចង់ធ្វើយ៉ាងម៉េចបំបែកផ្នត់គំនិតរបស់ឪពុកម្តាយក្មេងភាគច្រើន ដែលរិះគន់ក្បាច់គុនថា ជារឿងហិង្សា ពេលដាក់កូនឲ្យរៀនក្បាច់គុនមួយៗ អីចឹងចង់បកទៅបង្ហាញពួកគាត់វិញថា ក្បាច់គុនតាមពិតល្អសម្រាប់ក្មេងៗទេ ជាពិសេសជួយខាងចរិក និងជំនឿចិត្តលើខ្លួនពួកគេដែរ»។ នេះការបង្ហាញគោលបំណងរបស់ ឯម សុវណ្ណារី ក្នុងការបង្កើតសៀវភៅនេះឡើង។
នាងបន្ថែមថា៖«សឹងគ្រប់ពេល គេគិតថា ក្បាច់គុនគឺមិនល្អទេ។ ពេលខ្លះឪពុកម្តាយក្មេងគិតថា វាជាហិង្សាមួយ ឬក្មេងនោះនឹងយកទៅធ្វើបាបគេ ប៉ុន្តែតាមពិតវាផ្ទុយស្រឡះ។ សៀវភៅនេះ នឹងអាចបង្រៀនពីមេរៀនគ្រឹះនៃជីវិត សំខាន់សម្រាប់ក្មេងពេលគេធំឡើង»។
សៀវភៅ«The Talent Quest» ដែលនិយាយពីតួអង្គសត្វតូចៗហ្វឹកហាត់ក្បាច់គុនច្រើនប្រភេទនេះ គឺជាសៀវភៅពុម្ភដំបូងទាក់ទងនឹងដំណើររឿងរបស់ Teddy Saaja Dozer Bella និង Gregor។ សៀវភៅ ដែល សុវណ្ណារី អះអាងប្រើពេលវេលារៀបរៀងច្រើនជាងការគ្រោងទុកមួយនេះ បានបោះពុម្ភរួចរាល់ហើយ និងកំពុងចរាចរលក់នៅតាមហាងសៀវភៅមួយទូទាំងពិភពលោក និងតាមអនឡាញផងដែរ។
«Brooke (អ្នកនិពន្ធ) ផ្ញើរូបភាពនិងគំនូរផ្សេងៗដែលក្មេងៗនៅអូស្ត្រាលីគូចេញពីតួអង្គក្នុងសៀវភៅ! ខ្ញុំរំភើបដល់ភ្លាត់មាត់ថា អូ៎ព្រះអើយ! វាអស្ចារ្យណាស់អ្វីដែលខ្ញុំធ្វើបានទៅដល់ក្មេងៗ ពួកគេថែមទាំងចូលចិត្តខ្លាំងដល់ថ្នាក់ចេះគូរូបតួអង្គគេចូលចិត្តទៀត»។ នេះជាការបង្ហាញអារម្មណ៍រំភើបសប្បាយរីករាយរបស់ សុវណ្ណារី ពេលឃើញពីភាពជោគជ័យលើស្នាដៃដំបូងរបស់ខ្លួន។ ជាមួយនេះ នាង ប្តេជ្ញាថា នឹងបន្តនិពន្ធសៀវភៅជាបន្តបន្ទាប់ទៀត។
ក្នុងឆ្នាំ២០១៩នេះឃើញថា ក្នុងអាជីពជាអ្នកប្រដាល់គុនចម្រុះប្រចាំ ONE Championship ក៏ចាប់ផ្តើមជោគជ័យខ្លាំង រីឯសៀវភៅកូនក្មេង ដែលនាងចូលរួមគូរក៏បានបោះពុម្ភផ្សាយជោគជ័យបណ្តើរៗទៀត។ សុវណ្ណារី បង្ហើបថា ឆ្នាំថ្មីនេះនាងចង់ឡើងប្រកួតយ៉ាងតិចបាន៣ដងក្នុងទ្រុង ធ្វើយ៉ាងណាបានឡើងដល់កំរិត៦២គីឡូក្រាម។
សុវណ្ណារី សព្វថ្ងៃកំពុងខិតខំយ៉ាងខ្លាំងសម្រាប់ទាំងការពង្រឹងសមត្ថភាពត្រៀមបង្ហាញខ្លួនលើសង្វៀន និងខាងគូររូប។ «ខ្ញុំឥឡូវបានហ្វឹកហាត់ពេញដៃពេញជើងវិញហើយ។ យើងចង់បណ្តោយឲ្យសៀវភៅនេះបោះផ្សាយតាមដំណើរសិនទៅ ហើយចាំយើងពិភាក្សាគ្នាថែមទៀតពីវគ្គបន្ត។ តែអត់ទាន់ដឹងច្បាស់ទេ ពេលនេះ យើងគ្រាន់តែរីករាយខ្លាំងដែលសៀវភៅនេះបោះផ្សាយទៅក្រៅបានសម្រេច»។ នេះជាការបន្ថែមរបស់កីឡាការិនី ឯម សុវណ្ណារី។
គួររំលឹកថា កាលពីចុងខែធ្នូ ឆ្នាំ២០១៨ កន្លងទៅ កីឡាការិនីខ្មែរ-អាមេរិក ឯម សុវណ្ណារី បានផ្តួលកីឡាការិនីជើងចាស់របស់អ៊ុយក្រែន Iryna Kyselova ឲ្យបោះបង់ការប្រកួតក្នុងទឹកទី១ នាការប្រកួតគុនចម្រុះក្នុងព្រឹត្តិការណ៍ ONE: Destiny of Championship នៅទីក្រុងកូឡាឡាំពួរប្រទេសម៉ាឡេស៊ី៕