អន្តរជាតិ
ចិន នៅតែជាដៃគូពាណិជ្ជកម្មធំបំផុតរបស់អាស៊ានក្នុងរយៈពេល១០ឆ្នាំជាប់គ្នា
× ទោះបីជាសេដ្ឋកិច្ចពិភពលោក ប្រឈមនឹងភាពមិនប្រាកដប្រជា ដោយសារគោលនយោបាយគាំពារនិយម និងការមិនត្រូវរូវគ្នារបស់មហាអំណាចពិភពលោកក៏ដោយ ទំនាក់ទំនង និងកិច្ចសហប្រតិបត្តិការសេដ្ឋកិច្ច និងពាណិជ្ជកម្មរបស់អាស៊ាន-ចិន នៅតែល្អ និងឆ្ពោះទៅមុខ។ ចិន នៅតែជាដៃគូពាណិជ្ជកម្មធំបំផុតរបស់អាស៊ាន ខណៈអាស៊ាន ក៏នៅតែស្ថិតនៅក្នុងចំណោមដៃគូធំបំផុតរបស់ចិនវិញ។
តាមការបញ្ជាក់របស់អគ្គរដ្ឋទូតចិនប្រចាំអាស៊ាន ដែលត្រូវបានចុះផ្សាយដោយសារព័ត៌មាន Jakarta Post ក្នុងឆ្នាំ២០១៨ ពាណិជ្ជកម្មរវាងចិន និងអាស៊ាន បានកើនឡើង ៤,១ ភាគរយ ដែលស្មើនឹង ៥៨៧,៨៧ ពាន់លានដុល្លារ ធៀបនឹងឆ្នាំ២០១៧។ ទំហំនេះ ធ្វើឲ្យចិន ក្លាយជាដៃគូពាណិជ្ជកម្មធំបំផុតរបស់អាស៊ានក្នុងរយៈពេល១០ឆ្នាំជាប់ៗគ្នា ខណៈអាស៊ាន ក្លាយជាដៃគូពាណិជ្ជកម្មធំបំផុតលំដាប់ទីបីរបស់ចិន បន្ទាប់ពីសហភាពអឺរ៉ុប និងអាមេរិក។
តាមរយៈអត្ថបទចុះផ្សាយដដែលនោះ លោកអគ្គរដ្ឋទូត Huang Xilian បានអះអាងថា អាស៊ាន ក៏ស្ថិតនៅក្នុងចំណោមដៃគូពាណិជ្ជកម្ម ដែលមានកម្រិតកំណើនលូតលាស់លឿនជាងគេ ពោលគឺ ខណៈដែលសេដ្ឋកិច្ចសកល ប្រឈមនឹងការធ្លាក់ចុះ ដោយសារគោលនយោបាយពាណិជ្ជកម្មគាំពារ អាស៊ាន និងចិន នៅតែបន្តរក្សាបានកិច្ចសហប្រតិបត្តិការ និងប្រកៀកស្មាគ្នាលើកកម្ពស់ទំនាក់ទំនងពាណិជ្ជកម្ម។
លោកអគ្គរដ្ឋទូត ក៏បានកត់សម្គាល់ផងដែរថា រយៈពេលចុងក្រោយនេះ ឥណ្ឌូណេស៊ី ដែលត្រូវបានគេហៅថា ជាបងធំអាស៊ាននោះ កាន់តែបង្កើតភាពជិតស្និទ្ធជាមួយនឹងចិន ពិសេសនោះលើទំនាក់ទំនងពាណិជ្ជកម្ម ដែលក្នុងនោះ ក្នុងឆ្នាំ២០១៨ ទំហំពាណិជ្ជកម្មនៃប្រទេសទាំងពីរ បានកើនរហូតដល់២២,២ ភាគរយស្មើនឹង ៧៧,៤ ពាន់លានដុល្លារ។
សូមរម្លឹកបន្តិចថា ចិន បានចាប់ដំណើរការកក្នុងការសុំជាដៃគូសន្ទនារបស់អាស៊ាននៅឆ្នាំ១៩៩១ និងបានក្លាយជាដៃគូសន្ទនាពេញសិទ្ធិនៅឆ្នាំ១៩៩៦។ ចិន បានក្លាយជាដៃគូពាណិជ្ជកម្មធំបំផុតរបស់អាស៊ានចាប់តាំងពីឆ្នាំ២០០៩មក។
តាមរយៈកិច្ចសហប្រតិបត្តិការជាមួយចិន អាស៊ាន និងរដ្ឋអាស៊ាន ក៏ទទួលបានផលប្រយោជន៍ជាច្រើន ពីគម្រោង និងគំនិតផ្តួចផ្តើមដែលបង្កើតឡើងដោយចិនក្នុងដំណើរអភិវឌ្ឍន៍សេដ្ឋកិច្ចរបស់អាស៊ានផងដែរ។ គំនិតផ្តួចផ្តើមទាំងនោះ មានដូចជា គំនិតផ្តួចផ្តើមខ្សែក្រវ៉ាត់មួយ និងវិថីមួយ និងធនាគារវិនិយោគហេដ្ឋារចនាសម្ព័ន្ធអាស៊ី (AIIB) ជាដើម៕
© រក្សាសិទ្ធិដោយ thmeythmey.com