ជាតិ
សង្គមជាតិ
បរទេស៥នាក់និងខ្មែរ២នាក់ ត្រូវបញ្ជូនទៅតុលាការ ក្រោយឆបោកតាមអ៊ីម៉ែល
រូបភាពីនាយដ្ឋានប្រឆាំងបទល្មើសបច្ចេកវិទ្យា
×![]()
ដោយ: ឡាយ សុភាវតី
ជនសង្ស័យទាំង៧នាក់ បានផ្ញើសារទៅជនរងគ្រោះតាមអ៊ីម៉ែល ដោយប្រាប់ថាមានមរតកយ៉ាងច្រើន នឹងប្រគល់ឲ្យជនរងគ្រោះ។ ក្រោយពីទទួលបានពាក្យបណ្ដឹងពីជនរងគ្រោះ នាយដ្ឋានប្រឆាំងបទល្មើសបច្ចេកវិទ្យាបាន បានស្រាវជ្រាវ និងឃាត់ខ្លួនជនសង្ស័យទាំង៧នាក់ កាលពីថ្ងៃទី៣០ ខែមករា ឆ្នាំ២០១៩។
នាយដ្ឋានប្រឆាំងបទល្មើសបច្ចេកវិទ្យា បានបង្ហោះព័ត៌មាននៅលើទំព័រហ្វេសប៊ុករបស់ខ្លួនថា ក្រោយពីទទួលបានពាក្យបណ្ដឹងពីជនរងគ្រោះ សមត្ថកិច្ច ក៏ចុះទៅឃាត់ខ្លួនជនសង្ស័យទាំង៧នាក់។ ជនសង្ស័ទាំងនោះ បានប្រើប្រាស់អ៊ីម៉ែល ផ្ញើសារទៅជនរងគ្រោះថា មានជំងឺធ្ងន់ ហើយមានមរតកយ៉ាងច្រើន ដែលនឹងប្រគល់ឲ្យជនរងគ្រោះ តែតម្រូវឲ្យមានការផ្ញើប្រាក់ឲ្យជាមុនសិន ដើម្បីរៀបចំឯកសារមរតក។
នាយដ្ឋានប្រឆាំងបទល្មើសបច្ចេកវិទ្យា បញ្ជាក់ថា ជនសង្ស័យ ត្រូវបានបញ្ជូនខ្លួនទៅតុលាការពីបទឆបោកតាមប្រព័ន្ធបច្ចេកវិទ្យា នៅថ្ងៃទី២ ខែកុម្ភៈ ឆ្នាំ២០១៩។ ជនសង្ស័យទាំង៧នាក់នោះ មានស្រី២នាក់ ជាជនជាតិខ្មែរ និងប្រុស៥នាក់ទៀត ដែល៣នាក់ជាជនជាតិនីហ្សេរីយ៉ា និង២នាក់ ជាជនជាតិប៉ាគីស្ថាន។
នាយដ្ឋានប្រឆាំងបទល្មើសបច្ចេកវិទ្យា បានដាស់តឿនប្រជាពលរដ្ឋ ឲ្យមានការប្រុងប្រយ័ត្ននូវករណីឆបោក ដែលប្រើប្រាប់ដោយវីធីផ្សេងៗដូចជា ឈ្នះរង្វាន់ និង សាច់ញាតិជួបគ្រោះថ្នាក់ចរាចរណ៍ ជាដើម ដើម្បីផ្ញើលុយឲ្យជនឆបោក៕
© រក្សាសិទ្ធិដោយ thmeythmey.com
