English-Français
ជាតិ
បញ្ចប់អនុបណ្ឌិតសន្តិសុខអន្តរជាតិ និងការពារជាតិពីបារាំង កញ្ញា ដាវ វ័យ២៤ឆ្នាំ ប៉ងធ្វើការនៅក្រសួងមហាផ្ទៃ
×![]()
ភ្នំពេញ៖ ខុសពីនារីដទៃដែលជាទូទៅចូលចិត្តជំនាញរដ្ឋបាល គ្រប់គ្រង ឬគណនេយ្យ, កញ្ញា វ៉ាន់នី សុភីដាវ ចាប់យកជំនាញប្លែកពីគេ។ ស្ថិតក្នុងអាយុ២៤ឆ្នាំ កញ្ញា វ៉ាន់នី សុភីដាវ ទើបបញ្ចប់សញ្ញាបត្រអនុបណ្ឌិតផ្នែកសន្តិសុខអន្តរជាតិ និងការពារជាតិពីសកលវិទ្យាល័យ Jean Moulin Lyon III នៃប្រទេសបារាំងកាលចុងឆ្នាំ២០១៨កន្លងមក។ ជំនាញរបស់កញ្ញា សុភីដាវ ត្រូវនឹងវិស័យសាធាណៈ ជាងវិស័យ ឯកជន ហើយក្រសួងដែលត្រូវនឹងជំនាញរបស់កញ្ញាខ្លាំងជាងគេ គឺក្រសួងមហាផ្ទៃ ក្រសួងការពារជាតិ និងក្រសួងការបរទេស និងកិច្ចសហប្រតិបត្តិការអន្តរជាតិ។ ក្នុងចំណោមក្រសួងទាំងបីនេះ កញ្ញា បានបង្ហាញអាម្មណ៍ថា កញ្ញាមានបំណងចង់បម្រើការនៅក្នុងក្រសួងមហាផ្ទៃច្រើនជាងគេ។ ខាងក្រោមនេះ គឺជាបទសម្ភាសរវាងលោក គី សុខលីម អ្នកសារព័ត៌មាននៃសាព័ត៌មានអេឡិចត្រូនិកថ្មីៗ (Thmeythmey.com) និងកញ្ញា វ៉ាន់នី សុភីដាវ ដូចតទៅ៖
បទសម្ភាសវីដេអូ ជាភាសាបារាំង
ក្នុងសង្គមខ្មែរ នារីភាគច្រើនមិនសូវទទួលបានសញ្ញាបត្រជាន់ខ្ពស់ក្រោយឧត្តមសិក្សាឡើយ។ ប៉ុន្តែ កញ្ញា វ៉ាន់នី សុភីដាវ គឺជាស្ត្រីខ្មែរម្នាក់ក្នុងចំណោមស្ត្រីមួយចំនួនតូចផ្សេងទៀតដែលប្រឹងប្រែងសិក្សារហូតទទួលបានសញ្ញាបត្រក្រោយឧត្តមសិក្ស។ ហើយអ្វីដែលកាន់តែពិសេសទៅទៀតនោះ គឺថា កញ្ញា សុភីដាវ ចាប់យកជំនាញដែលស្ត្រីភាគច្រើនមិនប្រាថ្នាឡើយ។ សញ្ញាបត្រជាន់ខ្ពស់អនុបណ្ឌិតចុងក្រោយរបស់កញ្ញា គឺសន្តិសុខអន្តរជាតិ និងការពារជាតិពីសកលវិទ្យាល័យ Jean Moulin Lyon III នៃប្រទេសបារាំង។ ការសិក្សាអនុបណ្ឌិតចុងក្រោយនេះ គឺកញ្ញាទទួលបានអាហារូបករណ៍ពីរដ្ឋាភិបាលបារាំងឆ្នាំ២០១៧-២០១៨។
មានចំណង់ចំណូលចិត្តសិក្សា ដូច្នេះ កញ្ញា វ៉ាន់នី សុភីដាវ បានចំណាយយុវភាពរបស់នាងយ៉ាងច្រើនសម្រាប់ការសិក្សា។ មុនទទួលបានសញ្ញាបត្រជាន់ខ្ពស់អនុបណ្ឌិត ផ្នែកសន្តិសុខអន្តរជាតិ និងការពារជាតិពីសកលវិទ្យាល័យ Jean Moulin Lyon III នៃប្រទេសបារាំង, កញ្ញា វ៉ាន់នី សុភីដាវ បានបញ្ចប់សញ្ញាបត្របរិញ្ញាបត្រសន្តិសុខផ្ទៃក្នុងនៅសកលវិទ្យាល័យ Lyon IIIផងដែរ។ ហើយមុននេះ បន្តិច កញ្ញា បានបញ្ចប់បរិញ្ញាបត្រផ្នែកវិជ្ជាជីវៈគតិយុត្តិនៅសកលវិទ្យាល័យ Lyon II នៅក្នុងប្រទេសបារាំង។
មុននឹងទៅសិក្សានៅក្នុងប្រទេសបារាំង កញ្ញា វ៉ាន់នី សុភីដាវ បានបញ្ចប់ការសិក្សាបរិញ្ញាបត្រច្បាប់ថ្នាក់បារាំងពីសកលវិទ្យាល័យនិតិសាស្ត្រ និងវិទ្យាសាស្ត្រសេដ្ឋកិច្ច។ ជំនាញរបស់កញ្ញា សុភីដាវ ត្រូវនឹងវិស័យសាធាណៈ ជាងវិស័យ ឯកជន ហើយក្រសួងដែលឆ្លើយតបទៅនឹងជំនាញរបស់កញ្ញាច្រើនជាងគេ គឺក្រសួងមហាផ្ទៃ ក្រសួងការពារជាតិ និងក្រសួងការបរទេស និងកិច្ចសហប្រតិបត្តិការអន្តរជាតិ។ ក្នុងចំណោមក្រសួងទាំងបីនេះ កញ្ញាបានបង្ហាញអាម្មណ៍ថា កញ្ញាមានបំណងចង់បម្រើការ ដោយឆ្លងកាត់ការប្រឡងចូលនៅក្នុងក្រសួងមហាផ្ទៃច្រើនជាងគេ។ មូលហេតុ ត្រូវបានកញ្ញាពន្យល់យ៉ាងខ្លីថា៖«ចង់ចូលរួមចំណែកជួយក្រសួងជាមួយនឹងចំណេះដឹងដែលកញ្ញាទទួលបានពីក្រៅប្រទេស»៕
Tag:
អប់រំ
© រក្សាសិទ្ធិដោយ thmeythmey.com
