អន្តរជាតិ
អ្នកនយោបាយជំនាន់ក្រោយថៃ ប្តេជ្ញាទប់ស្កាត់«វដ្តនៃរដ្ឋប្រហារម្តងហើយម្តងទៀត» ក្នុងសង្គមថៃ
×![]()
អ្នកនយោបាយជំនាន់ក្រោយ និងជាប្រមុខបក្សទើបបង្កើតថ្មីអនាគតឆ្ពោះទៅមុខ លោក Thanathorn Juangroongruangkit បានសន្យាកាត់បន្ថយគម្លាតសេដ្ឋកិច្ចរបស់ប្រជាជន និងធ្វើវិសោធនកម្មរដ្ឋធម្មនុញ្ញឆ្នាំ២០១៧ ឲ្យស្របតាមបែបលទ្ធិប្រជាធិបតេយ្យឡើងវិញ នៅពេលបក្សរបស់លោក បានដឹកនាំក្បាលម៉ាស៊ីនរដ្ឋាភិបាលក្នុងអាណត្តិក្រោយនេះ។ លោក ក៏ប្តេជ្ញាធានាមិនឲ្យមានរដ្ឋប្រហារកើតឡើងទៀតផងដែរ។
ក្នុងដំណើរចុះធ្វើយុទ្ធនាការរកសំឡេងគាំទ្រតាមខណ្ឌនៃរាជធានីបាងកកនៅថ្ងៃ៦ កុម្ភៈ លោក Thanathorn ប្រធានបក្សអនាគតឆ្ពោះទៅមុខ បានអះអាងថា ការធ្វើវិសោធនកម្មរដ្ឋធម្មនុញ្ញឆ្នាំ២០១៧ ដែលជារដ្ឋធម្មនុញ្ញធ្វើក្នុងអាណត្តិដឹកនាំរបស់របបសឹក គឺជារឿងដែលលោក ត្រូវធ្វើមុនគេ ហើយទិសដៅចម្បងដែលត្រូវពិនិត្យនោះគឺ អំណាចរបស់ព្រឹទ្ធសភា។
តាមការចុះផ្សាយរបស់សារព័ត៌មាន Bangkok Post ការណ៍ ដែលធ្វើឲ្យអ្នកនយោបាយជំនាន់ក្រោយរូបនេះ ចង់ធ្វើវិសោធនកម្មរដ្ឋធម្មនុញ្ញ ដោយសារលោក យល់ឃើញថា ការផ្តល់អំណាចឲ្យព្រឹទ្ធសភាក្នុងការជ្រើសរើសនាយករដ្ឋមន្ត្រី មិនសមស្របតាមប្រព័ន្ធប្រជាធិបតេយ្យ និងមិនមានតម្លាភាពឡើុ។ លោកព្យាករថា វាអាចនឹងមានរឿងចម្រូងចម្រាសស្មានមិនដល់កើតឡើងបន្ទាប់ពីការបោះឆ្នោត ដោយសារតែមាត្រាមានចែងក្នុងរដ្ឋធម្មនុញ្ញនេះ។
តែយ៉ាងណាក៏ដោយ ប្រមុខបក្សនយោបាយវ័យក្មេង ដែលបោះបង់មុខជំនួញធំមកប្រឡូកក្នុងនយោបាយរូបនេះ បានទទួលស្គាល់ថា ការធ្វើវិសោធនកម្មរដ្ឋធម្មនុញ្ញ មិនមែនជារឿងងាយស្រួលឡើយ។ ត្រង់ចំណុចនេះ លោកអះអាងថា ខ្លួនក៏មានផែនការធ្វើយុទ្ធនាការផ្សព្វផ្សាយឲ្យសាធារណជនបានដឹង និងគាំទ្ររូបលោកដែរ។
ក្រៅពីការសន្យាកែប្រែរដ្ឋធម្មនុញ្ញ លោក ក៏ប្តេជ្ញាកាត់បន្ថយគម្លាតសេដ្ឋកិច្ច ហើយមិនអនុញ្ញាតឲ្យប្រទេសស្គាល់ចលនារដ្ឋប្រហារមិនចេះចប់ ប្រឈមនឹងការតវ៉ាហិង្សាតាមដងផ្លូវ ដែលប៉ះពាល់សេដ្ឋកិច្ចជាតិទៀតឡើយ។ ការប្រឆាំងអំពើពុករលួយ ក៏ស្ថិតនៅក្នុងគោលការណ៍អាទិភាពរបស់លោកផងដែរ។
តាមគណៈកម្មាធិការរៀបចំការបោះឆ្នោតថៃ ទោះបីជាគណបក្សអនាគតឆ្ពោះទៅមុខទើបតែបង្កើតថ្មីក៏ដោយ គណបក្សនេះ ក៏ស្ថិតនៅក្នុងចំណោមគណបក្សលេចធ្លោ និងមានចំនួនសមាជិកសកម្មច្រើនផងដែរ នៃគណបក្សសរុបជាង១០០ ដែលចុះបញ្ជីចូលរួមប្រកួតប្រជែងការបោះឆ្នោតជាតិលើកដំបូងបន្ទាប់ពីរដ្ឋប្រហារយោធាឆ្នាំ២០១៤៕
Tag:
ថៃ
Thanathorn Juangroongruangkit
© រក្សាសិទ្ធិដោយ thmeythmey.com
