ជាតិ
អាជ្ញាធរ ចាប់ផ្តើមជួសជុលចិញ្ចើមផ្លូវបណ្តោយមហាវិថីសហព័ន្ធរុស្ស៊ី ចាប់ពីមហាវិថីព្រះនរោត្តមដល់មុខព្រលានយន្តហោះ រូបភាពពី ហ្វេសប៊ុករដ្ឋបាលរាជធានីភ្នំពេញ
× ភ្នំពេញ៖ រដ្ឋបាលរាជធានីភ្នំពេញ ចាប់ផ្តើមរៀបចំចិញ្ចើមផ្លូវនៅបណ្តោយមហាវិថីសហព័ន្ធរុស្ស៊ី ដែលអាជ្ញាធរថាមានសភាពចាស់ទ្រុឌទ្រោមចាប់ពីចំណុចមហាវិថីព្រះនរោត្តម ដល់មុខអាកាសយានដ្ឋានអន្តរជាតិភ្នំពេញ។ អាជ្ញាធរនឹងរៀបចំក្រាលការឺឡាថ្មី ការឺឡាសម្រាប់ជនពិការនៅលើចិញ្ចើមផ្លូវ រៀបចំខឿនចិញ្ចើមផ្លូវ និងខឿនស៊ុមដើមឈើ ដើម្បីកែលម្អសោភណភាព និងរៀបចំសណ្ដាប់ធ្នាប់ចិញ្ចើមផ្លូវសាធារណៈ។
រដ្ឋបាលរាជធានីភ្នំពេញ បានចាប់ផ្តើមគម្រោងក្រាលការឺឡាថ្មី ការឺឡាសម្រាប់ជនពិការនៅលើចិញ្ចើមផ្លូវ រៀបចំខឿនចិញ្ចើមផ្លូវ និងខឿនស៊ុំដើមឈើ នៅបណ្តោយមហាវិថីសហព័ន្ធរុស្ស៊ី ចាប់ពីមហាវិថីព្រះនរោត្តម ដល់មុខអាកាសយានដ្ឋានអន្តរជាតិភ្នំពេញ។ តាមសេចក្តីជូនដំណឹងរបស់រដ្ឋបាលរាជធានីភ្នំពេញ គម្រោងនេះធ្វើឡើងចាប់ផ្តើមពីថ្ងៃទី៨ ខែកុម្ភៈនេះ ដើម្បីកែលម្អសោភ័ណភាព និងរៀបចំសណ្ដាប់ធ្នាប់នៅលើចិញ្ចើមផ្លូវសាធារណៈ និងដើម្បីឲ្យស្របតាមបទដ្ឋានបច្ចេកទេស បន្ទាប់ពីអាជ្ញាធរមើលឃើញថា ចិញ្ចើមផ្លូវនៅបណ្តោយផ្លូវសហព័ន្ធរុស្ស៊ីនេះ មានសភាពចាស់ទ្រុឌទ្រោម ដោយសារប្រជាពលរដ្ឋ និងម្ចាស់អាជីវកម្មមួយចំនួន បានប្រើប្រាស់ធ្វើជាទីតាំងលក់ដូរ និងធ្វើចរាចរណ៍លើការឺឡាជាដើម។
ដើម្បីឲ្យការអនុវត្តដំណើរការដោយរលូន រដ្ឋបាលរាជធានីភ្នំពេញ បានប្រាប់ឲ្យម្ចាស់អាជីវកម្ម និងស្ថាប័នរដ្ឋ-ឯកជនទាំងអស់ដែលមានទីតាំងនៅតាមបណ្តោយផ្លូវដែលត្រូវជួលជុលនេះ រុះរើសំណង់របស់ខ្លួនដែលបានសាងសង់នៅលើចិញ្ចើមផ្លូវ និងស្នើឲ្យយោគយល់ចំពោះដំណើរចេញ-ចូលស្ថាប័ន ឬគេហដ្ឋានរបស់ខ្លួន៕
Tag:
ជួសជុលផ្លូវ
ចិញ្ចើមផ្លូវ
© រក្សាសិទ្ធិដោយ thmeythmey.com