ONE Championship
កីឡាជាតិ
ជាតិ
×![]()
ដោយ៖ Matias Andres
ចាន់ រតនា ខ្លាចាស់ក្នុងពិភពគុន កំពុងក្លាយជាកីឡាករប្រដាល់ក្នុងទ្រុង ONE Championship ដ៏មានប្រជាប្រិយភាព ហើយបន្តកសាងកេរ្តិ៍ឈ្មោះល្បី ដោយមិនមានការរាថយនោះឡើយ។ 
កាលពីដើមខែធ្នូ កន្លងទៅ ចាន់ រតនា បានធ្វើឲ្យកក្រើកទ្រុងធំ ONE: DESTINY OF CHAMPION តាមរយៈការបំបាក់ជើងខ្លាំងឥណ្ឌូណេស៊ី Abro Fernandes នៅក្នុងទឹក២។ តាមប្រវត្តិ Abro Ferandes មិនធ្លាប់ចាញ់អ្នកណាសោះពីមុនមក។
សមត្ថភាពដ៏ប៉ិនប្រសប់ខាងគុនខ្មែរ និងគុនចម្រុះរបស់ រតនា ត្រូវបានគេឃើញ និងស្ញប់ស្ញែងពេញប្រទេស និងដល់កម្រិតអន្តរជាតិ។ ប៉ុន្តែជីវិតក្រៅសង្វៀន របស់កីឡាករវ័យ៣២ឆ្នាំរូបនេះ ពុំសូវមានមនុស្សដឹងច្បាស់នោះឡើយ។
យើងបានសម្ភាសន៍ផ្ទាល់ជាមួយ ចាន់ រតនា ហើយយក៤ចំណុចដែលបងប្អូនជនរួមជាតិមិនទាន់ដឹងពីកីឡាកររូបនេះ៖
១. ចូលចិត្តមើលរឿងដាយណូស័រ និងរឿងសត្វចម្លែក
មិនចម្លើយឡើយបើ រតនា ចូលចិត្តមើលរឿងវាយកាប់ចាក់គ្នា ព្រោះគាត់នៅខាងក្បាច់គុនស្រាប់ តែគួរឲ្យភ្ញាក់ផ្អើល តាមពិត គាត់ចូលចិត្តមើលរឿងបែបតុក្កតាសត្វចម្លែក រឿងដាយណូស័រ ជាជាងរឿងវីរបុរសមែនទែនទៅវិញ។
អ្នកជំនាញគុនខ្មែររូបនេះ ប្រាប់ថាគាត់មិនសូវមានពេលអង្គុយមើលរឿងច្រើនទេ ប៉ុន្តែបើមានពេលទំនេរខ្លះវិញ គឺគាត់នឹងមើលរឿងប្រភេទទាំងនេះ ដោយគាត់ចូលចិត្តមើលតាំងពីនៅតូច។
«ខ្ញុំចូលចិត្តរឿងដាយណូស័រ ហើយរឿងតុក្កតាមួយនោះដែលមានសត្វចម្លែកធំៗវាយគ្នា។ ពីតូចចូលចិត្តមើល ដល់ឥឡូវក៏ចូលចិត្តមើលដែរ!»។
២. ស្រឡាញ់ស៊ុបពែរមែន
មានមនុស្សម្នាជាច្រើនចាត់ទុក រតនា ដូចជាវីរបុរសលើដីម្នាក់អីចឹង ប៉ុន្តែបើសួរទៅ រតនា ឲ្យគាត់ជ្រើសរើស វីរបុរសប្រចាំចិត្តគាត់វិញគឺគាត់ជ្រើសយក ស៊ុបពែរមែន (Superman)។
ហេតុផលសាមញ្ញបំផុតគឺ៖ «ខ្ញុំចង់បានដូចស៊ុបពែមែន មកពីគាត់ចេះគ្រប់យ៉ាង ចេះទាំងហោះ ទាំងកម្លាំងខ្លាំង និយាយទៅចង់មានទាំងអស់ដូចគាត់»។
៣. រៀនអ្វីក៏ឆាប់ចេះ
រតនា ជាកូនប្រុសម្នាក់ដែលមានឈាមជ័រក្នុងគ្រួសារក្បាច់គុនបុរាណខ្មែរ យុទ្ធគុនខម ដែលគាត់បានរៀនចេះដឹងក្បាច់គុននេះលោកឪពុកគាត់ផ្ទាល់។
ចាប់តាំងពីចាប់ហាត់ក្បាច់គុនពីកុមារភាពមក រតនា ខិតខំហាត់ក្បាច់ស្នៀតដូចសំលៀងអាវុធប្រយុទ្ធអីចឹង រហូតមកដល់សព្វថ្ងៃទទួលបានជោគជ័យខ្លាំងដូចបានដុះស្លាបហើរ ក្នុងពិភពក្បាច់គុនទាំងក្នុង និងក្រៅប្រទេស។
ភាពរីកចម្រើនខ្លាំងខាងក្បាច់គុននេះ គឺត្រូវអរគុណដល់សមត្ថភាពពិសេសរបស់គាត់ ដែលអាចចាប់អ្វី ឬរៀនអ្វីក៏អាចឆាប់ចេះរហ័សជាងគេ។
គាត់ថា៖ «ខ្ញុំរៀនឆាប់ចេះណាស់ ស្អីក៏ដោយ ពេលខ្ញុំឃើញគេធ្វើអ្វី ខ្ញុំអាចធ្វើតាមបានដូចគ្នាតែម្តង! ទាំងរៀបចាប់ក្លេរ ទាំងធ្វើម្ហូបក៏ដោយ ឃើញភ្លាមចេះធ្វើភ្លាម!»
៤. មោទកភាពធំជាងគេគឺការប្រកួតក្នុងទ្រុង ONE Championship
ចាន់ រតនា ធ្លាប់ប្រកួតជាលើកទីមួយនៅក្នុងស្ថាប័នក្បាច់គុនធំជាងគេគឺកាលពីខែកញ្ញា ឆ្នាំ២០១៤ នាព្រឹត្តិការណ៍ ONE: RISE OF THE KINGDOM ដែលកាលនោះគេធ្វើនៅរាជធានីភ្នំពេញ។
ប៉ុន្តែសម្រាប់គាត់ការប្រកួតម្តងទៀតនៅថ្ងៃទី២៥ ខែមីនា ទីក្រុងកូឡាឡាំពួរ ប្រទេសម៉ាឡេស៊ី ព្រឹត្តិការណ៍ ONE: AGE OF CHAMPIONS ដែលគាត់បានទទួលបានជ័យជម្នះដ៏អស្ចារ្យមួយទៀត ធ្វើឲ្យគាត់ភ្ញាក់ខ្លួនព្រើតពីអនាគតល្អដែលនឹងចាប់ផ្តើមបន្ទាប់ពីប្រកួតលើសង្វៀនពិភពលោកនេះទៅ។
«កាលឈ្នះប្រកួតនៅ ONE Championship លើកដំបូងនៅភ្នំពេញ ខ្ញុំមានអារម្មណ៍ដូចធម្មតា! ប៉ុន្តែដល់វាយឈ្នះ Ramon Gonzales នៅម៉ាឡេស៊ីវិញ ខ្ញុំមកផ្ទះវិញទាំងរំភើបផង និងសប្បាយខ្លាំងតែម្តង!»៕
Tag:
ចាន់ រតនា
© រក្សាសិទ្ធិដោយ thmeythmey.com
