អន្តរជាតិ
×![]()
សភាមីយ៉ាន់ម៉ា បានប្រកាសទទួលយកសំណើធ្វើវិសោធនកម្មរដ្ឋធម្មនុញ្ញ និងត្រៀមបង្កើតគណៈកម្មការមួយដើម្បីសិក្សា និងពិនិត្យពីដំណើរ និងនីតិវិធីផ្លាស់ប្តូរច្បាប់កំពូលរបស់ប្រទេសមួយនេះ។ ទោះមិនទាន់អាចឃើញពីលទ្ធផលផ្លែផ្កា នេះគឺជាក្តីសង្ឃឹមតូចមួយរបស់រដ្ឋាភិបាលស៊ីវិល លោកស្រី អ៊ុងសាន ស៊ូជី ក្នុងការផ្លាស់ប្តូររដ្ឋធម្មនុញ្ញដែលជាប់កម្អែលយោធាច្រើនឆ្នាំហើយនោះ។ 
ប្រធានសភាមីយ៉ាន់ម៉ា លោក T Khun Myat នៅថ្ងៃ៦ កុម្ភៈ បានឲ្យដឹងថា សភាមីយ៉ាន់ម៉ា នឹងបង្កើតគណកម្មការរួមមួយដើម្បីធ្វើការលើការងារវិសោធនកម្មរដ្ឋធម្មនុញ្ញ ដោយសមាជិកនៃគណៈកម្មការនេះ នឹងត្រូវជ្រើសរើសតាមសមាមាត្រនៃសមាជិកសភា ដែលកើតចេញពីការបោះឆ្នោត និងសមាជិកសភា ដែលកើតចេញពីការតែងតាំងពីយោធា។ នេះបើយោងតាមការចុះផ្សាយរបស់សារព័ត៌មាន Myanmar Times។
សេចក្តីប្រកាសបង្កើតគណៈកម្មការជាបន្ទាន់ដើម្បីពិនិត្យលើការធ្វើវិសោធនកម្មរដ្ឋធម្មនុញ្ញនេះ ធ្វើឡើង ក្រោយមួយសប្តាហ៍ បន្ទាប់ពី សមាជិកសភារបស់បក្សកាន់អំណាចនៃលោកស្រី អ៊ុងសាន ស៊ូជី បានដាក់សំណើនេះទៅកាន់សភា។ តាមប្រភពព័ត៌មានដដែលនោះ សភាមីយ៉ាន់ម៉ា នៅមិនទាន់អាចបញ្ជាក់ច្បាស់ពីកាលបរិច្ឆេទក្នុងការជ្រើសរើសសមាជិកនៃគណៈកម្មការ សិទ្ធិអំណាច និងលក្ខខណ្ឌ របស់សមាជិកនៅឡើយនោះទេ។
ក៏ប៉ុន្តែអ្វីដែលគួរឲ្យកត់សម្គាល់នោះ គ្រាន់តែសំណើនៃការធ្វើវិសោធនកម្មនេះចាប់ផ្តើមដល់តុរបស់សភាមីយ៉ាន់ម៉ាភ្លាម សមាជិកសភាកូតារបស់យោធា បានចាប់ផ្តើមប្រតិកម្មទៅហើយ ដោយក្នុងនោះ មានសមាជិកខ្លះ បានព្រមានធ្វើពហិកាចូលរួមពិភាក្សា និងខ្លះទៀត បានជំទាស់ទៅនឹងការចេញសេចក្តីសម្រេចឲ្យបង្កើតគណៈកម្មការ ដោយថែមទាំងចោទសំណួរពាក់ព័ន្ធនឹងការបែងចែកចំនួនសម្រាប់សមាជិក និងអំណាចរបស់គណៈកម្មការទៀតផង។
តាម Myanmar Times សភាទាំងពីរជាន់របស់មីយ៉ាន់ម៉ា មានសមាជិកសរុបទាំងអស់ ៦៦៤ រូប មកពីបក្សនយោបាយចំនួន ១៣, តំណាងយោធា និងក្រុមតំណាងឯករាជ្យមួយចំនួនផ្សេងទៀត។ សមាជិក ដែលជាតំណាងរបស់បក្សសម្ព័ន្ធជាតិដើម្បីប្រជាធិបតេយ្យ ដែលជាបក្សកាន់អំណាចស៊ីវិលរបស់លោកស្រីអ៊ុងសាន ស៊ូជី មានចំនួន ៣៨៣ តំណាងយោធាចំនួន ១៦៦ និងផ្សេងទៀត ជាតំណាងរបស់បក្សនយោបាយ និងតំណាងឯករាជ្យផ្សេងទៀត។
ជុំវិញសំណើវិសោធនកម្មនេះ នៅសប្តាហ៍មុនទីប្រឹក្សារដ្ឋ និងជាប្រមុខបក្សកាន់អំណាចលោកស្រី អ៊ុងសាន ស៊ូជី បានថ្លែងក្រើនរម្លឹកដល់សមាជិកសភាទាំងអស់ ដោយត្រូវដឹងថា សមាជិកសភា មិនត្រឹមតែទទួលខុសត្រូវតែការអនុម័តច្បាប់ពាក់ព័ន្ធនឹងប្រជាជនប៉ុណ្ណោះនោះទេ ក៏ប៉ុន្តែ ក៏ត្រូវទទួលខុសត្រូវលើការផ្លាស់ប្តូររដ្ឋធម្មនុញ្ញ ដែលលោកស្រី ចាត់ទុកជាកិច្ចការដ៏សំខាន់មួយរបស់សភាផងដែរ។
គួរជម្រាបផងដែរ រដ្ឋធម្មនុញ្ញដែលមីយ៉ាន់ម៉ា ប្រើប្រាស់បច្ចុប្បន្ន គឺជារដ្ឋធម្មនុញ្ញ ដែលធ្វើឡើងដោយក្រុមយោធាក្នុងឆ្នាំ២០០៨។ រដ្ឋធម្មនុញ្ញនេះ ផ្តល់អាសនៈ២៥ភាគរយទៅឲ្យសមាជិកដែលតែងតាំងចេញពីយោធា។ សម្រាប់លោកស្រី ស៊ូជី ការធ្វើវិនិសោធនកម្មច្បាប់នេះ គឺជាកិច្ចការអាទិភាពបំផុតរបស់រដ្ឋាភិបាលលោកស្រី ដើម្បីធ្វើឲ្យមីយ៉ាន់ម៉ាក្លាយជាប្រទេសប្រជាធិបតេយ្យពិតប្រាកដ៕
Tag:
មីយ៉ាន់ម៉ា
អាស៊ាន
រដ្ឋធម្មនុញ្ញ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
