រដ្ឋាភិបាលក្រុងហាណូយ កំពុងតែព្យាយាមអភិវឌ្ឍបច្ចេកវិទ្យារបស់ខ្លួនលើផ្នែកផ្កាយរណបទៅកាន់លំហអាកាស។ ការណ៍ដែលក្រុងហាណូយព្យាយាមអភិវឌ្ឍខ្លួនបែបនេះដើម្បីជាផ្នែកមួយនៃដំណោះស្រាយក្នុងការទប់ស្កាត់គ្រោះធម្មជាតិ ក៏ដូចជាដើម្បីធ្វើឲ្យវៀតណាម ក្លាយជាប្រទេសនាំមុខមួយក្នុងតំបន់លើផ្នែកបច្ចេកវិទ្យាផ្កាយរណប។
បើមិនមានការប្រែប្រួលនោះទេ នាពេលឆាប់ៗខាងមុខនេះ វៀតណាម នឹងក្លាយជារដ្ឋមួយក្នុងតំបន់នាំមុខគេផ្នែកបច្ចេកវិទ្យាផ្កាយរណប។ បច្ចុប្បន្ន ក្នុងតំបន់អាស៊ាន មានតែសិង្ហបុរី ម៉ាស៊ីឡេស៊ី និងឥណ្ឌូណេស៊ី ប៉ុណ្ណោះនោះទេ ដែលមានលទ្ធភាពអាចធ្វើផ្កាយរណបដើម្បីបញ្ជូនទៅកាន់លំហអាកាសបាន។ នេះបើយោងតាមការចុះផ្សាយរបស់សារព័ត៌មានវៀតណាម Vietnam Net នៅថ្ងៃ៨ កុម្ភៈ។
តាមប្រភពព័ត៌មានដដែលនោះ សាស្ត្រាចារ្យ និងជាអគ្គនាយកនៃមជ្ឈមណ្ឌលលំហវៀតណាម លោក Pham Anh Tuan បានលើកឡើង ការអភិវឌ្ឍបច្ចេកវិទ្យាផ្នែកលំហ គឺជានិមិត្តរូបដ៏សំខាន់មួយនៃភាពរឹងមាំរបស់ប្រទេស ហើយការប្រកួតប្រជែងគ្នាទៅកាន់លំហអាកាស គឺជាសកម្មភាពមួយ ដែលបង្ហាញពីសមត្ថភាពរបស់ជាតិផងដែរ។
នៅពេលដែលឆ្លើយនឹងសំណួរថាតើបើប្រៀបធៀបនឹងបណ្តាប្រទេសអាស៊ានដូចជាសិង្ហបុរី ម៉ាឡេស៊ី និងឥណ្ឌូណេស៊ី បច្ចេកវិទ្យាផ្កាយរណបវៀតណាម នៅចំណុចណា លោកសាស្ត្រាចារ្យ បានអះអាងថា បច្ចេកវិទ្យាវៀតណាម មិនទាន់អាចរំលងប្រទេសទាំងបីបានឡើយ ក៏ប៉ុន្តែអាចប្រកៀកប្រកិតគ្នាបាន។
តាមផែនការតម្រង់ទិស ដែលកំណត់ក្នុងគម្រោងរបស់មជ្ឈមណ្ឌលលំហវៀតណាម រដ្ឋាភិបាលវៀតណាម នឹងអនុវត្តផែនការតាមជំហានមួយៗ ពោលគឺវៀតណាម នឹងផលិតផ្កាយរណបពីទំហំមីក្រូ ទៅផ្កាយរណបតូចល្មម និងចុងក្រោយគេទៅជាផ្កាយរណបដែលមានបច្ចេកវិទ្យាខ្ពស់បំផុត ដែលមានភ្ជាប់ជាមួយនឹងប្រព័ន្ធបច្ចេកវិទ្យារ៉ាដា។
ក្នុងឆ្នាំ២០១៣ វៀតណាម ដំបូងឡើយបានផលិតផ្កាយរណបប្រភេទមីក្រូ ឈ្មោះថា PicoDragon មានទម្ងន់ប្រមាណ ១ គីឡូក្រាម ហើយអាចប្រតិបត្តិការបានរយៈពេលបីខែ។ ក្រោយមកទៀត ក្នុងឆ្នាំដដែលនោះ មជ្ឈមណ្ឌលលំហវៀតណាម បានអភិវឌ្ឍការផលិតផ្កាយរណប ដែលទម្ងន់ ៥០ គីឡូក្រាម ដែលឈ្មោះថា MicroDragon ក្រោមការបណ្តុះបណ្តាលពីជប៉ុន។
តាមភ្នាក់ងារព័ត៌មានវៀតណាម Vietnam Net នៅក្នុងផែនការបន្ទាប់ពីការផលិតផ្កាយរណបខ្នាតតូច និងមធ្យមបានជោគជ័យហើយ វៀតណាម នឹងបន្តអភិវឌ្ឍផ្កាយរណប ដែលមានទម្ងន់ ៥៧០ គីឡូក្រាម ដោយប្រើប្រាស់ប្រព័ន្ធបច្ចេកវិទ្យារ៉ាដាតម្រង់ផ្លូវចុងក្រោយបំផុត។ សម្រាប់វៀតណាម បើគម្រោងនេះបន្តទៅមុខ នោះវៀតណាម នឹងអាចមានលទ្ធភាពក្នុងការឆ្ពោះទៅកាន់លំហ និងអាចព្យាករអាកាសធាតុបានគ្រប់លក្ខខណ្ឌ។
គួរជម្រាបផងដែរថា វៀតណាម ក៏ស្ថិតនៅក្នុងចំណោមប្រទេស ដែលទទួលរងផលប៉ះពាល់ពីបម្រែបម្រួលអាកាសអាធាតុ។ រៀងរាល់ឆ្នាំ វៀតណាម រងការវាយប្រហារពីព្យុះទីហ្វុង ជំនន់ និងការបាក់ស្រុតដីជាដើម ដែលគ្រោះមហន្តរាយធ្វើឲ្យវៀតណាម ត្រូវទទួលរងការខាតបង់ថវិកាប្រមាណ ៣,២ ពាន់លានដុល្លារ ស្មើនឹង ១,៥ នៃផលិតផលក្នុងស្រុកសរុប៕