អត្ថបទ៖ Matias Andres
តារាគុនខ្មែរ ឡៅ ចិត្រា ថាការបោះជំហានចូលក្នុងអាជីពប្រដាល់មកដល់ថ្ងៃនេះ ដោយសារការគាំទ្រពីគ្រួសារ និងជាពិសេសមានការជ្រមជ្រែងពីសំណាក់បងប្រុសទាំងពីររបស់គេគឺ ឡៅ ចន្ទ្រា និងឡៅ ស៊ីណាត យ៉ាងខ្លាំង។
ថ្ងៃសៅរ៍ ទី១៦ ខែកុម្ភៈ ឆ្នាំ២០១៩ ខាងមុខ ចិត្រា ត្រូវប៉ះ Superlek Kiatmoo9 ជើងខ្លាំងរបស់ថៃ នៅក្នុងសង្វៀនប្រយុទ្ធ
ONE: CLASH OF LEGENDS ដែលស្ថិតក្នុងក្រុងបាងកក។
ការឡើងសង្វៀនធំរបស់ ចិត្រា ខាងមុខនេះ បងប្រុសធំរបស់គេ ឡៅ ស៊ីណាត នឹងតាមទៅឲ្យទឹក និងចាំផ្តល់កម្លាំងចិត្តផងដែរ។
ចិត្រា ពន្យល់ពីទំនាក់ទំនងបងប្អូនថា៖ «បងចន្ទ្រា និងបងប្រុសធំ ស៊ីណាត ពួកគាត់ចាំជួយខ្ញុំរហូតពេលខ្ញុំមានបញ្ហា ឬមានការអី។ មិនមែនតែខាងប្រដាល់មួយមុខទេ និយាយទៅគ្រប់បែបយ៉ាងទាំងអស់»។
ដ្បិតតែមានបងប្រុសជាអ្នកប្រដាល់ល្បីឈ្មោះស្រាប់មែន ប៉ុន្តែចិត្រា ដែលជាកូនប្រុសពៅនៅក្នុងគ្រួសារប្រាប់ថាបងប្រុសរបស់គេមិនបានដាក់សម្ពាធឲ្យខ្លួនចាប់យកអាជីពដូចគ្នានេះទេ។ កីឡាករដែលមានស្រុកកំណើត នៅខេត្តកំពង់ស្ពឺនេះបន្តថា។ ទោះនៅតូចក្រូចឆ្មាក្តី តែរូបគេមានចិត្តចង់ឡើងសង្វៀនប្រកួតដោយខ្លួនឯង។
«អត់មាននរណាដាក់ខ្ញុំឲ្យចូលអាជីពហ្នឹងទេ គឺខ្ញុំស្រលាញ់វាខ្លួនឯងតាំងពីក្មេងម្ល៉េះ ខ្ញុំចូលចិត្តប្រដាល់ខ្លាំងណាស់ ពេលបងស៊ីណាត គាត់ចាប់ផ្តើមឡើងវាយ ខ្ទង់១៥ឆ្នាំមុន កាលនៅតូចចូលចិត្តវាយគ្នារហូត ប៉ុន្តែវាយអត់ដែលឈ្នះគេទេ គេវាយយំរហូត»។
គួររំលឹកផងថា ពេលចិត្រា ចាប់ផ្តើមឡើងប្រកួតអាជីពដំបូង ត្រូវគេវាយសន្លប់យ៉ាងធ្ងន់ធ្ងរ ជាហេតុបង្ខំខ្លួបត្រូវពិចារណាឡើងវិញពីជម្រើសអនាគតកំពុងដើរនេះ។
«កាលប្រកួតលើកទី៧ ខ្ញុំបែកប្រហែល ១១ថ្នេរ ខ្ញុំសន្លប់តាំងពីភ្នំពេញរហូតដល់កំពង់ស្ពឺអត់ទាន់ដឹងខ្លួនផង។ បងស្រី និងម៉ាក់ថាឲ្យឈប់ទៅ ប៉ុន្តែខ្ញុំថាវាយដល់កម្រិតហ្នឹងហើយ ឲ្យឈប់មិចបាន ជ្រុលវាយហើយ វាយឲ្យដល់ត្រើយ»។
ក្នុងនាមជាប្អូនពៅក្នុងគ្រួសារ ចិត្រា ទទួលបានការជួយជ្រមជ្រែងពេញទំហឹងពីបងប្រុសស៊ីណាត និងចន្ទ្រា។ បងប្រុសទាំងពីរសុទ្ធតែជាអ្នកប្រដាល់ទាំងអស់ ប៉ុន្តែមានតែចិត្រាទេ បានឧកាសបញ្ចេញស្នាដៃមុនគេលើសង្វៀនពិភពលោកធំជាងគេដើម្បីតំណាងកម្ពុជា។
ថ្វីបើពីមុន ទាំងបងស្រី និងម្តាយ មិនសប្បាយចិត្ត ហើយមិនអនុញ្ញាតឲ្យចូលហាត់ប្រដាល់អាជីពក៏ពិតមែន សព្វថ្ងៃចិត្រាថាគ្រប់យ៉ាងបានប្រសើរជាងមុនបន្តិចហើយ។
ថ្ងៃសៅរ៍ ទី១៦ ខាងមុខនេះ អ្នកលេងគុនខ្មែរនឹងដើរចូលក្នុងទ្រុង ONE Championship ម្តងទៀត។ យ៉ាងណាក៏ដោយចិត្រាមិនភ្លេចរំលឹកគុណដល់អ្នកជួយជ្រមជ្រែងឲ្យបានជោគជ័យដល់សព្វថ្ងៃនេះដែរ។
«បងទាំងពីរនាក់គឺសំខាន់ខ្លាំងណាស់សម្រាប់ខ្ញុំ ពួកគាត់ជួយច្រើនមែនទែន ខ្ញុំគ្មានថ្ងៃហ្នឹងទេ បើអត់មានពួកគាត់»៕