តំណាងបក្សប្រជាធិបតេយ្យ និងសាធារណរដ្ឋឯកភាពលើកិច្ចព្រមព្រៀងថ្មីផ្តល់លុយត្រឹម ១,៤ ពាន់លានសម្រាប់សង់ជញ្ជាំង

អន្តរជាតិ

តំណាងបក្សប្រជាធិបតេយ្យ និងសាធារណរដ្ឋឯកភាពលើកិច្ចព្រមព្រៀងថ្មីផ្តល់លុយត្រឹម ១,៤ ពាន់លានសម្រាប់សង់ជញ្ជាំង

12, Feb 2019 , 9:19 pm

រូបភាព

ដោយ: ថ្មីៗ

សមាជិកសភាអាមេរិកបានបង្ហើបថា តំណាងក្រុមចរចាបានឯកភាពលើកិច្ចព្រមព្រៀងបឋមមួយហើយលើការធានាសន្តិសុខព្រំដែនដែលអាចបញ្ចៀសការបិទរដ្ឋាភិបាលសហព័ន្ធបាន។ កិច្ចព្រមព្រៀងនេះកំណត់កញ្ចប់ថវិកាត្រឹមជិត ១,៤ពាន់លានដុល្លារប៉ុណ្ណោះសម្រាប់ការសង់ជញ្ជាំងព្រំដែន។

សមាជិកព្រឹទ្ធសភាបក្សសាធារណរដ្ឋលោក Richard Shelby បានប្រាប់អ្នកសារព័ត៌មានថ្ងៃចន្ទទី ១១ ខែកុម្ភៈថា កិច្ចព្រមព្រៀងជាគោលមួយសម្រាប់ផ្តល់ហិរញ្ញវត្ថុគាំទ្រកម្មវិធីរក្សាសន្តិសុខព្រំដែនដល់ចុងខែ កញ្ញានោះ ត្រូវបានភាគីចរចាទទួលយកហើយ។

បើតាមការចុះផ្សាយរបស់ទីភ្នាក់ងារព័ត៌មាន AFP ថ្វីបើសមាជិកព្រឹទ្ធសភារូបនេះបង្ហើបពីការឯកភាពគ្នាលើចំណាត់ការគាំទ្រការបង្កើនសន្តិសុខព្រំដែន និងឈានទៅបញ្ចៀសការបិទរដ្ឋាភិបាលសហព័ន្ធជាថ្មីមែន វាគ្មានការផ្តល់ថវិកាក្នុងទំហំច្រើនសម្រាប់សង់ជញ្ជាំតាមលោក ត្រាំ ទារឡើយ។

លោក ត្រាំ ទាមទារថវិកាទំហំ ៥,៧ ពាន់លានដុល្លារសម្រាប់សង់ជញ្ជាំងព្រំដែនម៉ិកស៊ិក ប៉ុន្តែកិច្ចព្រមព្រៀងថ្មីនេះផ្តល់ថវិកាត្រឹម ១,៣៧៥ពាន់លានដុល្លារប៉ុណ្ណោះ។

ពេលសាកសួរថា តើលោក ត្រាំ នឹងចុះហត្ថលេខាលើកិច្ចព្រមព្រៀងផ្តល់កញ្ចប់លុយសន្តិសុខព្រំដែននេះឬទេ លោក Shelby បានបញ្ជាក់ថា តំណាងភាគីចរចាបន្តជជែកពិភាក្សាជាមួយតំណាងសេតវិមានរួចរាល់ដែរ។ សមាជិកព្រឹទ្ធរូបនេះមិននិយាយចំៗថា ប្រធានាធិបតីនឹងគាំទ្រចំណាត់ការនេះឬអត់ទេ ប៉ុន្តែលោកគ្រាន់តែបញ្ជាក់ថា លោកសង្ឃឹមថា លោក ត្រាំ នឹងគាំទ្រកិច្ចព្រមព្រៀងថ្មីនេះ។

ដោយឡែក តំណាងរាស្ត្របក្សប្រជាធិបតេយ្យ Nita Lowey ដែលស្ថិតក្នុងដំណើរការចរចាគ្នានេះដែរបានបញ្ជាក់ស្រដៀងគ្នាថា កិច្ចព្រមព្រៀងមួយអាចនឹងត្រូវសម្រេចបានជាផ្លូវការត្រឹមថ្ងៃពុធដែរ។

តំណាងភាគីចរចាទាំងអស់ចង់ឲ្យមានបញ្ចប់ការចរចា និងបញ្ជូនកិច្ចព្រមព្រៀងថ្មីនេះទៅកាន់រដ្ឋសភា និងព្រឹទ្ធសភាឲ្យបានឆាប់តាមដែលអាចធ្វើបានដើម្បីអនុម័ត មុននឹងបន្តដាក់ជូនទៅប្រធានាធិបតីដើម្បីចុះហត្ថលេខាត្រឹមថ្ងៃសុក្រ។ ប៉ុន្តែបើសិនជាលោក ត្រាំ មិនចុះហត្ថលេខាទេ ការបិទរដ្ឋាភិបាលសហព័ន្ធជាថ្មីនឹងកើតឡើងទៀតមិនខាន។

សូមបញ្ជាក់ថា ក្រោយរដ្ឋាភិបាលសហព័ន្ធដោយផ្នែកត្រូវបិទអស់ជាងមួយខែ នៅចុងខែមករាកន្លងទៅប្រធានាធិបតីលោក ដូណាល់ ត្រាំ បានឯកភាពបើកដំណើរការរដ្ឋាភិបាលទាំស្រុងឡើងក្នុងរយៈពេលបីសប្តាហ៍ដើម្បីយកពេលចរចាលើកញ្ចប់ថវិកាផ្គត់ផ្គង់លើការរក្សាសន្តិសុខព្រំដែន។ ប្រធានាធិបតីរូបនេះនៅតែទាមទារថវិកាសម្រាប់ការសាងសង់ជញ្ជាំងព្រំដែន ខណៈដែលមេដឹកនាំបក្សប្រជាធិបតេយ្យព្រមានជាមុនថា គ្មានលុយសម្រាប់សង់ជញ្ជាំងឡើយ៕