ONE Championship
កីឡាជាតិ
ជាតិ
កីឡាការិនីវាយក្នុងទ្រុង ឯម សុវណ្ណារី ប្រាប់របៀបប្រារព្ធថ្ងៃនៃក្តីស្រលាញ់ឲ្យមានន័យ
×![]()
អត្ថបទ៖ Matias Andres
កីឡាការិនីវាយក្នុងទ្រុងខ្មែរ-អាមេរិក ឯម សុវណ្ណារី បានបញ្ចេញថ្វីដៃដ៏អស្ចារ្យក្នុងការប្រកួតកក្រើកឆាកជាលើកដំបូងក្នុងព្រឹត្តិការណ៍ ONE: DESTINY OF CHAMPIONS នៅសង្វៀនធំ ONE Championship កាលពីដើមខែធ្នូ ឆ្នាំមុន។ មិនត្រឹមតែទទួលជោគជ័យខ្ពស់ក្នុងអាជីពប៉ុណ្ណោះទេ តែក្នុងជីវិតផ្ទាល់ខ្លួនរបស់នាង អាចនិយាយបានថាមានសុភមណ្គលល្អដូចគ្នាដែរ។
អ្នកលេងគុនចម្រុះ (MMA) ដែលមានរហស្សនាម «Sweet Savage» បានក្លាយជានារីដ៏រឹងមាំ និងមានទំនុកចិត្តម្នាក់ក៏ដោយសារមានមនុស្សជាទីស្រលាញ់របស់ខ្លួនគឺលោក Daniele Bolelli ដែលសព្វថ្ងៃជាអ្នកនិពន្ធមួយរូប។
គូស្នេហ៍មួយគូនេះ ចាប់ផ្តើមមានទំនាក់ទំនងជាមួយគ្នាតាំងពីឆ្នាំ ២០១២មកម្ល៉េះ ហើយបានចែករំលែករឿងរ៉ាវជាច្រើនហូហែរទៅវិញទៅមក ជាពិសេសខាងក្បាច់គុន និងចំណង់ចំនូលចិត្តលើម្ហូបអាហារ។
ដោយសារថ្ងៃនៃក្តីស្រលាញ់«Valentine’s Day» កាន់តែខិតជិតមកដល់នោះ សុវណ្ណារី បានចែករំលែកគន្លឹះល្អៗមួយចំនួនសម្រាប់គូស្នេហ៍នានានៅថ្ងៃ ១៤កុម្ភៈ។
១. មិនបាច់រៀបគំរោងធំពេកទេ
តាមពិតមនុស្សគ្រប់គ្នាតែងតែចង់ធ្វើរឿងរំភើបខ្លាំងមួយដើម្បីមនុស្សដែលយើងស្រលាញ់ ប៉ុន្តែពេលខ្លះវាល្អដែរ បើយើងចេះធ្វើរឿងសាមញ្ញៗ។ ជំនួសពីការទិញរបស់ថ្លៃៗជាកាដូ សុវណ្ណារី ជាមួយសង្សា យកពេលនេះទៅប្រឡែងគ្នាលេង និងនាំគ្នាធ្វើសកម្មភាពផ្សេងៗដែលពួកគេចូលចិត្តវិញ។
នាងរៀបរាប់ពីថ្ងៃនៃក្តីស្រលាញ់រាល់ឆ្នាំថា៖ «ពីរនាក់យើងអត់រៀបគម្រោងអីច្រើនទេ បើស្តាប់ទៅប្រហែលថាដូចគ្មានអ្វីសប្បាយ ប៉ុន្តែចំពោះពួកខ្ញុំគឺធ្វើអ្វីៗរៀងៗខ្លួន។ ប្រហែលយើងធ្វើម្ហូបប្លែកៗជាមួយគ្នា ឬក៏រកស្នៀតថ្មីវាយគ្នាលេងដែរ អ៊ីចឹងមានតែពីរទេ គឺធ្វើម្ហូប ឬក៏វាយគ្នា»។
២. រំលឹករឿងរ៉ាវស្នេហាដំបូង មកនិយាយលើកទឹកចិត្តគ្នា
សុវណ្ណារី និង Daniele មុននឹងមានចំណងស្នេហ៍ដល់ពេលនេះ គឺចាប់ផ្តើមដោយគ្រាន់តែជាអ្នកជិតខាងគ្នា រួចក៏បានក្លាយមិត្តភក្តិល្អ រហូតបង្កើតទំនាក់ទំនងស្នេហាចេញពីមិត្តភាព។
ចាប់តាំងពីផ្តើមស្នេហ៍ដំបូងមក ពួកគេបើកចិត្តទូលាយឲ្យគ្នាទៅវិញទៅមក ជាហេតុដែលធ្វើឲ្យចំណងស្នេហ៍នេះនៅថិតថេររហូតបានជាង៦ឆ្នាំមកហើយ។
កីឡាការិនីកូនកាត់រូបនេះ បង្ហើបថាគឺសង្សាខ្លួននេះហើយជាអ្នកណែនាំឲ្យនាងចាប់យកការហ្វឹកហាត់ប្រដាល់ នឹងជំរុញនាងរហូតបានក្លាយជាតារាក្បាច់គុនម្នាក់នៅ ONE Championship។
នាង រៀបរាប់ពីដំណើររឿងដូច្នេះថា៖ «ស្គាល់គ្នាដំបូងៗ គាត់ឧស្សាហ៍ហៅខ្ញុំមកលេងផ្ទះគាត់ ហើយឲ្យភ្លក់ម្ហូបប្លែកៗ ពិសេសម្ហូបអ៊ីតាលីហ្នឹង ហើយពេលផ្តើមស្រលាញ់គ្នា យើងចូលចិត្តដើរទៅសមុទ្រជាមួយគ្នា ពេលខ្លះយើងសមាធិ ឬក៏ប្រដាល់គ្នាជាដើម។ ដោយសារអ៊ីចឹងហើយទើបខ្ញុំចាប់ផ្តើមអាជីពប្រដាល់ ក្រោយៗមក យើងចូលចិត្តនៅជិតគ្នា ហើយគ្រប់យ៉ាងវារីកដុះដាលតាមហ្នឹងទៀតទៅ»។
៣. បង្កើតក្តីស្រម៉ៃជាមួយគ្នា
សុវណ្ណារី ប្រាប់ថានាងចូលចិត្តទៅលេងសមុទ្រ រីឯ Daniele ថាចូលចិត្តដើរឡើងភ្នំជាង។ នាងរៀបរាប់ថា ប្រសិនបើពួកគេមានពេលវេលា និងប្រាក់កាសគ្រប់គ្រាន់ នាងចង់ធ្វើឲ្យសង្សាខ្លួនភ្ញាក់ផ្អើល ដោយទិញសំបុត្រយន្តហោះដើរកម្សាន្តឲ្យឆ្ងាយៗ។
សុវណ្ណារី ប្រាប់ទាំងស្នាមញញឹមថា៖ «យើងធ្លាប់គិតចង់ទៅលេង ប៊ូតង់ កន្លែងដែលយើងស្រម៉ៃចង់ទៅថ្មីៗនេះ ខ្ញុំក៏ចង់ទៅកម្ពុជា និងថៃជាមួយគាត់ដែរ ប៉ុន្តែប់ឥឡូវទៅប៊ូតង់ មុនសិន។ ប៊ូតង់ជាទឹកដីដ៏សែនស្អាត ហើយមិនសូវមានសេវាអ៊ីនធឺណែតទេ ដូចនេះយើងអាចផ្ចង់អារម្មណ៍ជាមួយធម្មជាតិបានច្រើន រីឯម្ហូបប្រទេសនេះ មើលទៅគួរឲ្យឆ្ញាញ់ណាស់»។
សុវណ្ណារី បន្ថែមទៀតថាអ្វីដែលសំខាន់នោះ គឺយើងត្រូវប្រើពេលវេលាដ៏មានន័យនេះជាមួយមនុស្សដែលយើងស្រលាញ់ និងឲ្យតម្លៃយើង ថែមទាំងជាមនុស្សចេះផ្តល់ភាពកក់ក្តៅឲ្យយើងផងដែរ។
«គាត់ធ្វើដូចសព្វដង អ៊ីចឹងអារម្មណ៍ល្អធម្មតាមិនច្របូកច្របល់ អាចថាបើនរណាម្នាក់ភិតភ័យឬមានទឹកមុខខុសធម្មតា យើងអាចដឹងតែម្តង។ សម្រាប់ពួកខ្ញុំគឺតែងតែលេងឲ្យគ្នាសើច និងផ្តល់ស្នាមញញឹមឲ្យគ្នាគ្រប់ពេលវេលាទាំងអស់។ ឥឡូវខ្ញុំដូចទំនើងបន្តិចហើយ»។ សុវណ្ណារី និយាយទាំងអស់សំណើច៕
Tag:
ឯម សុវណ្ណារី
© រក្សាសិទ្ធិដោយ thmeythmey.com
