ជាតិ
សម្ដេច ស ខេង ប្រាប់ឲ្យអាជ្ញាធរចេញមុខដោះស្រាយរាល់បញ្ហាពលរដ្ឋភ្លាមៗ ដោយមិនបាច់រង់ចាំចំណាត់ការពីក្រសួងឡើយ
× ភ្នំពេញ៖ រាល់បញ្ហារបស់ពលរដ្ឋ ដែលកើតមានឡើងនៅតាមមូលដ្ឋាននោះ អាជ្ញាធរទាំងអស់ត្រូវចេញមុខដោះស្រាយភ្លាម ដោយមិនចាំបាច់រង់ចាំចំណាត់ការណាមួយ ពីក្រសួងឡើយ។ នេះជាការបញ្ជារបស់សម្ដេច ស ខេង រដ្ឋមន្ត្រីក្រសួងមហាផ្ទៃ។
ថ្លែងក្នុងពិធីបើកសន្និបាតត្រួតពិនិត្យលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ សម្ដេច ស ខេង បានប្រាប់ឲ្យមន្ត្រី និងអាជ្ញាធរពាក់ព័ន្ធ ត្រូវតាមដានរាល់ប្រភពព័ត៌មានផ្សព្វផ្សាយនានា តាមរយៈទូរទស្សន៍ វិទ្យុ កាសែត និងព័ត៌មានអនឡាញជាដើម ដើម្បីចេញមុខឆ្លើយតប និងបកស្រាយរាល់ការពិតទៅនឹងបញ្ហាពលរដ្ឋ និងរឿងរ៉ាវណាដែលជាប់ព័ន្ធជាមួយអង្គភាព ឬស្ថាប័នខ្លួន។
ត្រង់ចំណុចនេះ សម្ដេច ស ខេង សង្កត់ធ្ងន់ថា ក្នុងករណីមានព័ត៌មានណាមួយដែលប៉ះពាល់ដល់អង្គភាព ឬទាក់ទងនឹងដែនសមត្ថកិច្ចរបស់ខ្លួន ត្រូវប្រជុំពិភាក្សាគ្នា និងតាមដានស៊ើបអង្កេតរកដើមចមនូវបញ្ហាទាំងនោះ ដើម្បីរកចំណុចដោះស្រាយជូនពលរដ្ឋ។ បើតាមសម្ដេច ស ខេង ស្ថាប័នរដ្ឋ និងរដ្ឋបាលខេត្តមួយចំនួន នៅមានការយឺតយ៉ាវក្នុងការបកស្រាយឆ្លើយតបទៅប្រជាពលរដ្ឋ ក៏ដូចជាដោះស្រាយបញ្ហាជាដើម។
បន្ថែមពីនេះសម្ដេច ស ខេង ក៏បានផ្ដាំឲ្យមន្ត្រីអនុវត្តច្បាប់ទាំងអស់ ត្រូវចេះដោះស្រាយបញ្ហាដោយសន្តិវិធី ប្រសើជាងប្រើកម្លាំងបាយលើពលរដ្ឋផងដែរ។ «សាលដីរបស់តុលាការ បើយើងមិនធ្វើតាមគឺខុសហើយ ប៉ុន្តែយើងទៅធ្វើឲ្យមានព្យុះសនកម្ម ច្បាប់ក៏អនុញ្ញាតឲ្យយើងដកខ្លួនសិន ដើម្បីពិចារណារកវិធីដោះស្រាយ។ ហើយយើងមិនធ្វើបែបនេះ បែរទៅ(អនុវត្ត)ទាំងកម្រោលហ្មង ឲ្យទៅម៉េចក៏ទៅៗ។ ក្នុងស្ថានភាព ស្ថានការណ៍បែបនេះ យើងលេងរបៀបនេះមិនបានទេ ហើយទៅមុខក៏រឹតតែមិនបានទៀត»។ នេះជាការលើកឡើងរបស់រដ្ឋមន្ត្រីក្រសួងមហាផ្ទៃ៕
© រក្សាសិទ្ធិដោយ thmeythmey.com