អន្តរជាតិ
វិបត្តិជនភៀសខ្លួនមីយ៉ាន់ម៉ា៖ ជប៉ុន មិនជាន់ពន្លិចមីយ៉ាន់ម៉ា តែពិចារណាផ្តល់ជំនួយអភិវឌ្ឍន៍បន្ថែម
×![]()
រដ្ឋាភិបាលក្រុងតូក្យូ បានបង្ហាញពីគោលជំហរគាំទ្រ និងជ្រោមជ្រែងរដ្ឋាភិបាលក្រុងណៃពិដោរក្នុងការអភិវឌ្ឍសេដ្ឋកិច្ច ដើម្បីជាផ្នែកមួយនៃដំណោះស្រាយបញ្ចប់បញ្ហា និងជម្លោះនៅក្នុងប្រទេសមីយ៉ាន់ម៉ា ជាពិសេសនោះនៅក្នុងតំបន់រ៉ាខាន ( Rakhine) តែម្តង។ ក្រុងតូក្យូ យល់ឃើញថា មានតែការអភិវឌ្ឍសេដ្ឋកិច្ចប៉ុណ្ណោះនោះទេ ដែលជាដំណោះស្រាយសក្តិសមបំផុតនៅក្នុងជម្លោះរដ្ឋ រ៉ាខាន។
ខុសពីសម្ព័ន្ធមិត្តរបស់ខ្លួនអាមេរិក រដ្ឋាភិបាលជប៉ុន នៅតែមានគោលនយោបាយការបរទេសនឹងធឹងជាមួយនឹងរដ្ឋាភិបាលមីយ៉ាន់ម៉ាក្នុងកិច្ចសហប្រតិបត្តិការដៃគូ និងជាពិសេសក្នុងពេលដែលមីយ៉ាន់ម៉ា កំពុងតែរងការស្តីបន្ទោស និងសម្ពាធពីសហគមន៍អន្តរជាតិ ដោយសារតែវិបត្តិជនភៀសខ្លួន និងជម្លោះនៅក្នុងរដ្ឋ រ៉ាខាន ។
តាមការចុះផ្សាយរបស់សារព័ត៌មានមីយ៉ាន់ម៉ា Myanmar Times នៅថ្ងៃ១០ កុម្ភៈ អគ្គរាជទូតជប៉ុនប្រចាំមីយ៉ាន់ម៉ាលោក Ichiro Maruyama បានផ្តល់អនុសាសន៍សម្រាប់ជាដំណោះស្រាយលើវិបត្តិក្នុងរដ្ឋរ៉ាខាន ដោយលោក អះអាងថា មានតែការអភិវឌ្ឍសេដ្ឋកិច្ចគ្រប់ជ្រុងជ្រោយនោះ ដែលជាដំណោះស្រាយដ៏សក្តិសិទ្ធសម្រាប់បញ្ហានេះ។
លោកអគ្គរាជទូត បានលើកឡើងថា អ្វីដែលគេស្គាល់មុនគេបង្អស់អំពីរដ្ឋ រ៉ាខាន គឺជាជម្លោះ តែម្តង ដែលចំណុចនេះ លោក យល់ឃើញថា គួរតែដល់ពេលត្រូវបញ្ចប់ការគិត និងបញ្ហានេះហើយ។ លោក សង្កត់ធ្ងន់ថា ការអភិវឌ្ឍសេដ្ឋកិច្ច គឺជាការងារចាំបាច់បំផុតសម្រាប់បញ្ហានេះ។ នេះបើយោងតាមការចុះផ្សាយរបស់សារព័ត៌មានដដែល។
បេសកជនជាន់ខ្ពស់របស់ជប៉ុនរូបនេះ បានបញ្ជាក់ថា គោលបំណងធំបំផុតរបស់រដ្ឋាភិបាលជប៉ុន និងក្រុមហ៊ុនជនជាតិជប៉ុន គឺការអភិវឌ្ឍគ្រប់ជ្រុងជ្រោយនៅក្នុងប្រទេសមីយ៉ាន់ម៉ា ដែលរាប់បញ្ចូលនយោបាយ និងសេដ្ឋកិច្ចជាដើម។ លោក ក៏បានសន្យា ផ្តល់ជំនួយអភិវឌ្ឍសេដ្ឋកិច្ចបន្ថែម ជាពិសេសនោះលើការតភ្ជាប់ផ្លូវ និងអគ្គិសនីឲ្យបានគ្រប់ទីកន្លែង។
អ្វីដែលគួរឲ្យកត់សម្គាល់នោះ រដ្ឋាភិបាលជប៉ុន មិននិយាយត្រឹមតែមាត់នោះឡើយ។ ជាក់ស្តែងនោះ នៅថ្ងៃ២១ ដល់២៣ កុម្ភៈខាងមុននេះ រដ្ឋាភិបាលជប៉ុន និងសហការជាមួយនឹងរដ្ឋាភិបាលមីយ៉ាន់ម៉ា នឹងរៀបចំពិព័រណ៍វិនិយោគធំមួយនៅក្នុងរដ្ឋ រ៉ាខាន ដើម្បីផ្សព្វផ្សាយ និងទាក់ទាញអ្នកវិនិយោគ ជាពិសេសក្រុមហ៊ុនជប៉ុន ឲ្យទៅបណ្តាក់ទុននៅទីនោះតែម្តង។
គួរជម្រាបផងដែរថា វិបត្តិក្នុងរដ្ឋរ៉ាខាន ដែលជាតំបន់ក្រីក្របំផុតមួយរបស់មីយ៉ាន់ម៉ា និងជាទម្លាប់មានការប៉ះទង្គិចគ្នារវាងសហគមន៍ពុទ្ធសាសនិក និងសហគមន៍ជនជាតិភាគតិតឥស្លាម បានអូសបន្លាយអស់រយៈពេលជាងមួយឆ្នាំហើយ។ ខណៈដែលប្រជាជនក្នុងតំបន់នោះរាប់សិបម៉ឺននាក់ បានភៀសខ្លួនចេញទៅកាន់ប្រទេសជិតខាងដោយសារតែការប៉ះទង្គិចប្រដាប់អាវុធរវាងអាជ្ញាធរ និងក្រុមឧទ្ទាម រដ្ឋាភិបាលមីយ៉ាន់ម៉ា នៅមិនទាន់ស្តារស្ថានភាពដើមបាននៅឡើយនោះទេ។
កន្លងមករដ្ឋាភិបាលមីយ៉ាន់ម៉ា ត្រូវបានសហគមន៍អន្តរជាតិពិសេសនោះប្រទេសលោកខាងលិចដែលអាមេរិកនាំមុខគេ បានថ្កោលទោស និងដាក់ទណ្ឌកម្មមួយចំនួន ដោយចោទមីយ៉ាន់ម៉ា មិនបានគិតគូរពីស្ថានភាពសិទ្ធិមនុស្សរបស់ប្រជាជន និងបណ្តែតបណ្តោយឲ្យប្រជាជនរស់នៅក្នុងស្ថានភាពលំបាក៕
Tag:
មីយ៉ាន់ម៉ា
ជប៉ុន
© រក្សាសិទ្ធិដោយ thmeythmey.com
