អន្តរជាតិ
នាយករដ្ឋមន្ត្រីឡាវ បញ្ជាឲ្យកាត់បន្ថយស្ថាប័នរដ្ឋសំពីងសំពោងនិងចំនួនមន្ត្រីស៊ីវិល
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីឡាវ ថងលួន ស៊ីសូលីត នៅថ្ងៃទី១៣ ខែកុម្ភៈ បានបង្គាប់ឲ្យក្រសួងមហាផ្ទៃពន្លឿនការកាត់បន្ថយអង្គភាពរដ្ឋ និងចំនួនបុគ្គលិកនៅតាមស្ថាប័ននានាដែលមានច្រើនសំពីងសំពោង។ លោក ថងលួន អះអាងថា ចំនួនមន្ត្រីច្រើនពេក បែរធ្វើឲ្យការបំពេញការងារមិនមានប្រសិទ្ធភាព មិនចំគោលដៅ និងខ្ជះខ្ជាយថវិការដ្ឋទៀតផង។ លើសពីនេះ នាយករដ្ឋមន្ត្រីឡាវក៏ប្រាប់ឲ្យរឹតបន្តឹងការជ្រើសរើសមន្ត្រីក្របខណ្ឌរដ្ឋថ្មីដែរ។
ចំនួនមន្ត្រីស៊ីវិល១៨៤៨៧១នាក់ ស្មើនឹង២,៨ភាគរយនៃចំនួនប្រជាជនសរុប ជាតួលេខដ៏ច្រើនសម្រាប់នាយករដ្ឋមន្ត្រីឡាវ ថងលួន ស៊ីសូលីត ដែលបានប្រាប់ឲ្យក្រសួងមហាផ្ទៃឡាវកាត់បន្ថយចំនួនមន្ត្រីដ៏ច្រើននេះឲ្យបានលឿន។ បរិមាណច្រើនបែបនេះ ធ្វើឲ្យឡាវក្លាយជាប្រទេសលំដាប់ទីពីរមានបុគ្គលិកស៊ីវិលច្រើនជាងគេបន្ទាប់ពីព្រុយណេក្នុងចំណោមប្រទេសអាស៊ានផ្សេងទៀត។
តាមពិតទៅ នាឆ្នាំថ្មីៗនេះ ស្ថាប័នរដ្ឋនៅឡាវជាច្រើនក៏ត្រូវបង្កើតថ្មី ឬពង្រីកខ្លួនដើម្បីបង្កើតការងារសម្រាប់មន្ត្រីរដ្ឋដ៏ច្រើនលើសលប់។ ក្រៅពីមន្ត្រីក្របខណ្ឌ ស្ថាប័នរដ្ឋនានាក៏ជួលមន្ត្រីក្នុងក្របខណ្ឌកិច្ចសន្យាទៀតផង។ លោក ថងលួន មិនសូវពេញចិត្តឡើយនឹងសកម្មភាពបែបនេះ។ ក្នុងកិច្ចប្រជុំការងាររបស់ក្រសួងមហាផ្ទៃនៅថ្ងៃទី១៣ ខែកុម្ភៈ នាយករដ្ឋមន្ត្រីឡាវរូបនេះបានណែនាំឲ្យក្រសួងនិងស្ថាប័នទាំងអស់សម្រេចឲ្យបានរចនាសម្ព័ន្ធរដ្ឋដែលមានតម្លាភាព រឹងមាំ និងអាចបម្រើការបានល្អ។
បើតាមកាសែតឡាវ Vientiane Times លោក ថងលួន បានរំឭកមន្ត្រីទាំងអស់ពីបទបញ្ជាលេខ០៣ ដែលលោកបានដាក់ចេញកាលពីឆ្នាំ២០១៨ ដែលតម្រូវឲ្យមានការកាត់បន្ថយ ឬច្របាច់បញ្ចូលស្ថាប័នរដ្ឋនៅថ្នាក់ក្រោមណាដែលមានបេសកកម្មដូច ឬស្រដៀងគ្នា។ ប្រមុខរដ្ឋាភិបាលឡាវអះអាងថា មន្ត្រីមិនចាំបាច់ទាំងនេះ ធ្វើឲ្យខ្ទង់ចំណាយរដ្ឋកាន់តែធំដូចជាការផ្ដល់ប្រាក់ខែ និងប្រាក់ឧបត្ថម្ភផ្សេងៗ។
អនុវត្តតាមបញ្ជានាយករដ្ឋមន្ត្រីឆ្នាំ២០១៨ រដ្ឋាភិបាលឡាវបានកាត់បន្ថយចំនួនបុគ្គលិករដ្ឋដែលត្រូវជ្រើសរើសថ្មី ដោយកាត់បន្ថយពីចំនួន១ម៉ឺននាក់នៅឆ្នាំ២០១៧ មកត្រឹម៣ពាន់នាក់នៅឆ្នាំ២០១៨ និងចំនួន១៥០០នាក់សម្រាប់ឆ្នាំ២០១៩ នេះ។ លោក ថងលួន បានប្រាប់មន្ត្រីក្នុងកិច្ចប្រជុំខាងលើថា រដ្ឋត្រូវបានប្រើប្រាស់បុគ្គលិកឲ្យមានប្រសិទ្ធភាពបំផុត និងជ្រើសរើសមន្ត្រីដែលអាចបំពេញការងារបានច្រើនមុខ។
ទន្ទឹមគ្នានឹងការកំណត់ចំនួនបុគ្គលិករដ្ឋនេះ នាយករដ្ឋមន្ត្រីឡាវក៏ប្រាប់ឲ្យមន្ត្រីពាក់ព័ន្ធរើសមន្ត្រីថ្មីដែលមានសមត្ថភាព និងគុណសម្បត្តិគ្រប់គ្រាន់តាមរយៈដំណើការជ្រើសរើសដែលម៉ត់ចត់។ ការកំហិតកូរ៉ុមនេះទៀតសោត ក៏មានន័យថា មន្ត្រីស្ម័គ្រចិត្ត និងមន្ត្រីជាប់កិច្ចសន្យាជាច្រើន នឹងមិនត្រូវបញ្ចូលជាមន្ត្រីក្របខណ្ឌឡើយ។ លោក ថងលួន បានលើកឡើងពីលទ្ធភាពដែលរដ្ឋបណ្ដុះបណ្ដាលពួកគេដើម្បីអាចធ្វើការនៅក្រុមហ៊ុនឯកជន ឬបើកររបររកស៊ីខ្លួនឯង៕
Tag:
ឡាវ
ថងលួន ស៊ីសូលីត
© រក្សាសិទ្ធិដោយ thmeythmey.com
