កីឡាជាតិ
ជាតិ
លោក សំ វ៉ាន់ដេត អតីតគ្រូបង្វឹកក្លិបព្រះខ័នរាជស្វាយរៀង
×![]()
អតីតគ្រូបង្វឹកក្រុមព្រះខ័នរាជស្វាយរៀងលោក សំ វ៉ាន់ដេត អាចកាន់តួនាទីជានាយកបច្ចេកទេស ឬជំនួយការគ្រូបង្វឹករបស់ក្លិបបាល់ទាត់អាស៊ីអឺរ៉ុបយូណាយធីត។ នេះបើតាមការអះអាងរបស់លោក ម៉ែន ពិសិដ្ឋ អគ្គលេខាធិការក្លិបបាល់ទាត់មួយនេះ។ 
ក្រោយបាត់មុខពីវិស័យកីឡាបាល់ទាត់មួយរយៈ គេសង្កេតឃើញលោក សំ វ៉ាន់ដេត អតីតគ្រូបង្វឹកក្រុមព្រះខ័នរាជស្វាយរៀងបង្ហាញខ្លួនជាមួយក្លិបបាល់ទាត់អាស៊ីអឺរ៉ុបយូណាយធីតក្នុងជំនួបមិត្តភាពជាមួយក្លិបព្រះខ័នរាជស្វាយរៀង កាលពីថ្ងៃទី១៣ កុម្ភៈ ឆ្នាំ២០១៩។ ការបង្ហាញខ្លួននេះ ធ្វើឲ្យមហាជនពិសេសអ្នកគាំទ្រកីឡាបាល់ទាត់លើកជាចម្ងល់ថា គ្រូបង្វឹករូបនេះទំនងជាចូលរួមជាមួយក្លិបអាស៊ីអឺរ៉ុបនៅឆ្នាំ២០១៩នេះ។
ពាក់ព័ន្ធបញ្ហានេះ លោក ម៉ែន ពិសិដ្ឋ អគ្គលេខាធិការក្លិបបាល់ទាត់អាស៊ីអឺរ៉ុបយូណាយធីតទទួលស្គាល់ថា លោក សំ វ៉ាន់ដេត ពិតជាចូលរួមជាមួយក្លិបរបស់លោកនៅរដូវកាលឆ្នាំ២០១៩ ពិតប្រាកដមែន។ ប៉ុន្តែសម្រាប់តួនាទីក្នុងក្លិបមិនទាន់ជាក់លាក់នៅឡើយទេ ដោយលោកអាចកាន់តួនាទីជានាយកបច្ចេកទេស ឬជាជំនួយការគ្រូបង្វឹករបស់លោក សុក វាសនា។
អគ្គលេខាធិការរូបនេះបានបញ្ជាក់យ៉ាងដូច្នេះថា៖«គាត់(លោក សំ វ៉ាន់ដេត)បានមកចូលរួមជាមួយក្លិបជាបណ្តោះអាសន្ន ប៉ុន្តែយើងមិនទាន់ហ៊ានប្រកាសជាផ្លូវការនៅឡើយទេ។ ឥឡូវយើងមានតួនាទី២ ដែលយើងបម្រុងឲ្យគាត់ ទី១ជានាយកបច្ចេកទេស និងទី២ជាជំនួយការរបស់គ្រូ សុក វាសនា»។
លោកបានបន្ថែមថា បច្ចុប្បន្នក្លិបកំពុងពិភាក្សាគ្នា ដើម្បីជ្រើសរើសតួនាទីមួយក្នុងចំណោមតួនាទីទាំងពីរខាងលើ។ ប៉ុន្តែលោកអះអាងថា អតីតគ្រូបង្វឹកជួយឲ្យក្លិបព្រះខ័នរាជស្វាយរៀងលើកពានសម្តេច ហ៊ុន សែន ឆ្នាំ២០១៧រូបនេះ អាចមានភាគរយខ្ពស់កាន់តួនាទីជានាយបច្ចេកទេស ព្រោះលោកមានសញ្ញាបត្រគ្រូបង្វឹកខ្ពស់ជាងលោក សុក វាសនា។
បច្ចុបគ្រូបង្វឹកដែលចាកចេញពីក្លិបព្រះខ័នរាជស្វាយរៀងនៅឆ្នាំ២០១៧រូបនេះ កាន់សញ្ញាបត្រគ្រូបង្វឹកកម្រិត B-License ខណៈលោក សុក វាសនា ក៏កាន់សញ្ញាបត្រកម្រិតនេះផងដែរ។ ប៉ុន្តែលោក សំ វ៉ាន់ដេត គ្រោងនឹងបញ្ចប់វគ្គគ្រូបង្វឹកកម្រិត A-License នៅអំឡុងឆ្នាំ២០១៩នេះ។ ក្លិបនឹងបង្ហាញតួនាទីរបស់លោក សំ វ៉ាន់ដេត ក្នុងពេលឆាប់ៗខាងមុខនេះ៕
Tag:
ម៉ែន ពិសិដ្ឋ
សំ វ៉ាន់ដេត
បាល់ទាត់
© រក្សាសិទ្ធិដោយ thmeythmey.com
