សង្គមអន្តរជាតិ
អន្តរជាតិ
«Parent 1» និង «Parent 2» អាចជំនួសពាក្យ «ឪពុក» និង «ម្តាយ» សម្រាប់កូនរបស់គ្រួសារ LGBT
× បារាំងនឹងមានទម្រង់បែបបទថ្មីមួយទៀតសម្រាប់ការចុះឈ្មោះនៅសាលារៀនរបស់កុមារដែលស្ថិតក្នុងក្រោមការបីបាច់របស់អាណាព្យាបាលដែលស្រឡាញ់ភេទដូចគ្នា (LGBT)។ ជាទូទៅ គេត្រូវបំពេញឈ្មោះ «ឪពុក» និង «ម្តាយ» នៅលើសំណុំបែបបទ ប៉ុន្តែនាពេលខាងមុខ ពាក្យទាំងនេះ នឹងជំនួសដោយ «ឪពុកម្តាយ ១» (Parent 1) និង «ឪពុកម្តាយ ២» (Parent 2)។
លោកស្រី Valérie Petit សមាជិកសភាពីគណបក្សកាន់អំណាច LREM បានផ្តើមគំនិតលើសេចក្តីស្នើច្បាប់ឲ្យមានការពិភាក្សាលើការបំពេញបែបបទសម្រាប់ការសិក្សារបស់កុមារ ត្រង់ចំណុចឈ្មោះ «ឪពុក» និង «ម្តាយ»។ សម្រាប់ឯកសាររបស់កុមារដែលស្ថិតក្នុងគ្រួសារអ្នកស្រឡាញ់ភេទដូចគ្នា (LGBT) គេតែងតែសង្កេតឃើញការទើសទាល់ក្នុងការប្រើប្រាស់ពាក្យ «ឪពុក» និង «ម្តាយ»។
កាលពីពេលថ្មីៗកន្លងមកនេះ សភាជាតិបារាំង បានអនុម័តដំណាក់កាលដំបូងតាមសំណើររបស់លោកស្រី Valérie Petit មុននឹងឈានដល់កិច្ចពិភាក្សាទ្រង់ទ្រាយធំ។
កាលពីឆ្នាំ២០១៣ បារាំងក្លាយជាប្រទេសទី១៤ក្នុងពិភពលោក ដែលបានអនុញ្ញាតឲ្យមានអាពាហ៍ពិពាហ៍ស្របច្បាប់នៃអ្នកមានភេទដូចគ្នា។ ទោះបីជាយ៉ាងណាក៏ដោយ ទម្រង់បែបបទមួយចំនួនរបស់រដ្ឋនៅតែមានលក្ខណៈទូទៅ និងផ្តល់ភាពស្មើគ្នាសម្រាប់អ្នកស្រឡាញ់ដូចគ្នានោះឡើយ។
យោងតាម AFP រដ្ឋាភិបាលបារាំង បង្ហាញឆន្ទៈរបស់ខ្លួនក្នុងការលើកកម្ពស់ដល់អាណាព្យាបាលគ្រប់រូប តាមរយៈការស្នើច្បាប់ស្តីពី «សាលារៀនបប្រកបដោយទំនុកចិត្ត»។ លោក Jean-Michel Balnquer រដ្ឋមន្ត្រីក្រសួងអប់រំ និងលោកស្រី Anne-Christine Lang សមាជិកសភាបក្ស LREM មើលឃើញពីផលវិជ្ជមានក្នុងសង្គមទាក់ទងនឹងសេចក្តីព្រាងច្បាប់នេះ។
ជាមួយគ្នានេះផងដែរ សមាជិកសភាមួយចំនួន ជាពិសេសលោក Xavier Breton ពីគណបក្សសាធារណរដ្ឋ និងលោក Joaquim Pueyot ពីគណបក្សសង្គមនិយម វាយតម្លៃថា សេចក្តីស្នើច្បាប់នេះ ជាការមើលឃើញតែជ្រុងម្ខាង ដោយមិនបានបញ្ជាក់ពីតថភាពនោះឡើយ។ ពួកលោកចោទជាសំណួរថា ហេតុអ្វីបានជាកុមារត្រូវមានការផ្តល់តម្លៃខុសគ្នាក្នុងសង្គម?
© រក្សាសិទ្ធិដោយ thmeythmey.com