អត្ថបទ៖ Matias Andres
ព្រឹត្តិការណ៍ ONE: CLASH OF LEGENDS នៅក្រុងបាងកក ប្រទេសថៃ ថ្ងៃសៅរ៍ ទី១៦ ខែកុម្ភៈនេះ នឹងបង្ហាញមុខជើងខ្លាំងទូទាំងពិភពលោកចំនួន ១២គូ ក្នុងនោះមាន ២គូតំណាងឲ្យកម្ពុជា។
ឡៅ ចិត្រា ជើងឯកប្រដាល់ប្រចាំទូរទស្សន៍បាយ័ន និងជាកីឡាករចំណូលថ្មី ONE Championship ត្រូវប្រកួតជាមួយ Superlek ជើងឯក Muay Thai World Champion របស់ថៃ។ មួយគូនេះនឹងប្រកួតវគ្គ ONE Super Series ប្រភេទទម្ងន់ ៦២គីឡូក្រាម។
នៅសន្និសីទកាសែត ដែលធ្វើនៅសណ្ឋាគារ W នៅទីក្រុងបាងកក ចិត្រា បានបង្ហាញខ្លួន និងបានឈរទល់មុខគ្នាជាមួយ Superlek រួចរាល់ហើយដែរ។
នាង Rika អំឡុងពលហ្វឹកហាត់
Superlek បច្ចុប្បន្នជាកីឡាករល្បីល្បាញ ដែលត្រូវបានជនរួមជាតិថៃចាត់ទុកដូចជានិមិត្តរូបខាងក្បាច់គុន Muay Thai តែយ៉ាងណារូបគេប្រាប់ថាត្រូវតែប្រយ័ត្នបន្តិចពីជំនាញប្រដាល់របស់ ចិត្រា ព្រោះមិនអាចមើលស្រាលបានទេ។
Superlek និយាយពី ចិត្រាថា៖ «គាត់ជាកីឡាករល្អម្នាក់ ប៉ុន្តែខ្ញុំមានបទពិសោធន៍ច្រើនជាង។ ខ្ញុំដឹងថាគាត់ប្រើកែងល្អ ហើយទាត់ជើងឆ្វេងខ្លាំងទៀត អ៊ីចឹងខ្ញុំត្រូវប្រយ័ត្នត្រង់នោះបន្តិច ក្រៅពីនេះចាំស្ទាបស្ទង់មើលពេលវាយលើសង្វៀន»។
រីឯកីឡាការិនី នៅ ស្រីពៅ ដែលជាប់ឈ្មោះ អ្នកប្រដាល់នារីប្រចាំឆ្នាំ របស់កម្មវិធីប្រដាល់ក្បាច់គុនមីយ៉ាន់ម៉ា Lethwei ក៏បានបង្ហាញខ្លួនចំពោះមុខអ្នកសារពត៌មានមកពីប្រទេសនានា ហើយក៏បានជួបមុខគ្នាផ្ទាល់ជាមួយតារាប្រដាល់ស្រីថៃ Rika "Tinydoll" Ishige ផងដែរ។
នាងរៀបរាប់ពីអារម្មណ៍ថា៖ «អត់ភ័យទេ តែរំភើបខ្លាំងពេក ឃើញអាដលស្អាតណាស់ តែសំខាន់ឥឡូវធ្វើម៉េចឲ្យឈ្នះសិន»។ ស្រីពៅ និង Rika ត្រូវប្រកួតក្នុងតារាងគូបឋម ប្រដាល់គុនចម្រុះប្រភេទទម្ងន់ ៤៧គីឡូក្រាម។
ដោយមានកីឡាករ ឡៅ ចិត្រា និងនៅ ស្រីពៅ ប្រកួតនៅទីក្រុងបាងកកលើកនេះ អាចនិយាយបានថាកម្ពុជាធ្វើឲ្យមានការចាប់អារម្មណ៍ច្រើនពីសង្វៀនធំ ONE Championship ក៏ដូចជាពីឆាកពិភពគុនទូទៅផងដែរ។
ម្ចាស់ក្លិប Cambodian Top Team លោក ហ៊ុន ចាន់រាជ ក៏បានធ្វើដំណើរទៅបាងកក ដើម្បីជួយនិងលើកទឹកចិត្តដល់កីឡាកររបស់ខ្លួនផងដែរ។
ចាន់រាជ ពោលថា៖«សន្និសិទកាសែតម្សិលមិញល្អណាស់ ហើយស្រីពៅ នាងរំភើបខ្លាំង។ លើកទីមួយហើយដែលនាងមានអារម្មណ៍ថាខ្លួននាងសំខាន់ ហើយមានគេទទួលស្គាល់ពិតប្រាកដ»។
ចាន់រាជ បន្ថែម៖ «ទាំងស្រីពៅ និងចិត្រា ពួកគាត់រំភើបរីករាយខ្លាំងណាស់នៅពេលបានប្រកួតនៅសង្វៀន ONE Championship នឹងក្លាយជាការប្រកួតដ៏អស្ចារ្យ ដែលយើងមិនធ្លាប់ជួបពីមុនមកឡើយ»៕