ជាតិ
សេដ្ឋកិច្ច
២៥ខេត្ត/រាជធានី
ចប់អនុបណ្ឌិតពីហូឡង់ កញ្ញា វន ថារី ច្នៃស្រកីដូងទៅជាឧបករណ៍ចម្រោះទឹកកខ្វក់
×![]()
ដោយ: ភួង វ៉ាន់ថា
SUDrain ជាគម្រោងអាជីវកម្មដែលផលិតឧបករណ៍ចម្រោះទឹកកខ្វក់ ដោយប្រើប្រាស់ស្រកីដូង ដែលធ្វើការស្រាវជ្រាវរកឃើញដោយសហគ្រិនវ័យក្មេងកម្ពុជាមួយក្រុម ដើម្បីជួយសម្អាតប្រភពទឹកសាបក្នុងប្រទេសកម្ពុជា។ ឧបករណ៍ចម្រោះទឹកកខ្វក់នេះបង្កើតឡើងសម្រាប់ប្រើប្រាស់ក្នុងសហគ្រាសធនតូច និងមធ្យម ដើម្បីចម្រោះទឹកឲ្យស្អាតមុននឹងបង្ហូរចូលទៅក្នុងប្រភពទឹកសាប ដូចជាបឹង ប្រឡាយ និងទន្លេវិញ។
គម្រោងអាជីវកម្ម SUDrain មួយនេះ បង្កើតឡើងដោយនិស្សិតសាកលវិទ្យាល័យពីររូប ដើម្បីចូលរួមក្នុងការប្រកួតប្រជែងគម្រោងអាជីវកម្មរបស់ Smart Spark និង Impact Hub Phnom Penh នាពេលថ្មីៗនេះ ហើយគម្រោងអាជីវកម្មនេះក៏ទទួលបានជ័យលាភីលេខ១ ផងដែរ។
កញ្ញា វន ថារី ស្ថាបនិក SUDrain និងជាអ្នកស្រាវជ្រាវផលិតឧបករណ៍ចម្រោះទឹកកខ្វក់នេះ បានប្រាប់មូលហេតុដែលជំរុញឲ្យកញ្ញា និងក្រុមការងារសម្រេចចិត្តជ្រើសរើសយកគម្រោងអាជីវកម្មនេះ ព្រោះចង់ជួយដោះស្រាយបញ្ហាបំពុលទឹកក្នុងប្រទេសកម្ពុជា។ កញ្ញា ថារី បានរកឃើញថា ការបំពុលទឹកនៅកម្ពុជា ជាពិសេសក្នុងរាជធានីភ្នំពេញ កំពុងប្រឈមខ្លាំង ព្រោះសហគ្រាសធុនតូច និងមធ្យម និងក្រុមហ៊ុនសាងសង់ បានបង្ហូរទឹកកង្វក់ ឬទឹកដែលមានសារជាតិពុលផ្សេងៗ ចូលទៅកាន់ប្រភពទឹកដោយមិនបានឆ្លងកាត់ការសម្អាតត្រឹមត្រូវ ដូច្នេះបើមិនរួមគ្នាដោះស្រាយទេ វានឹងមានបញ្ហាធ្ងន់ធ្ងរនៅថ្ងៃអនាគត។
សហគ្រិនវ័យក្មេងដែលទើបបញ្ចប់ថ្នាក់អនុបណ្ឌិតផ្នែកបរិស្ថានពីប្រទេសហូឡង់រូបនេះ បានអះអាងថា ឧបករណ៍ ឬហៅអាងចម្រោះទឹកកង្វក់ដែលធ្វើពីស្រកីដូងនេះ មានសមត្ថភាពអាចច្រោះទឹកកខ្វក់បានស្ទើតែ១០០ភាគរយ។ សហគ្រិនវ័យក្មេងរូបនោះ បន្ថែមទៀតថា គម្រោងនេះពិតជាសាកសមសម្រាប់សហគ្រាសធនតូច និងមធ្យម ព្រោះមានតម្លៃធូរថ្លៃ និងអាចប្រើបាសបានរយៈពេលយូរ (អាយុ៥ឆ្នាំ) រួមទាំងមានទំហំសមនឹងតម្រូវការរបស់សហគ្រាស។ បច្ចុប្បន្នក្រុមហ៊ុនដែលផ្គត់ផ្គង់សម្ភារចម្រោះទឹកកខ្វក់នៅកម្ពុជា ដែលមានទំហំធំលើសតម្រូវការរបស់សហគ្រាស និងមានតម្លៃថ្លៃ។
ស្ថាបនិក SUDrain ដែលកំណើតនៅខេត្តក្រចេះរូបនេះ បាននិយាយថា៖« នៅស្រុកគេ គេប្រើប្រាស់បច្ចេកទេសទំនើបក្នុងការសម្អាតទឹកកខ្វក់ ដូច្នេះវាមានតម្លៃថ្លៃ និងត្រូវការអ្នកជំនាញ។ គំនិតរបស់ខ្ញុំ ខ្ញុំចង់ដោះស្រាយបញ្ហាទឹកកខ្វក់ដែរ ដោយប្រើប្រាស់សម្ភារដែលមាននៅក្នុងស្រុក ដោយមិនចាំបាច់ប្រើប្រាស់របស់ទំនើប ម៉ាស៊ីនធំៗ ដែលចំណាយថាមពលច្រើន និងមានតម្លៃថ្លៃផងដែរ។ ខ្ញុំក៏បានធ្វើការសិក្សាស្រាវជ្រាវច្រើនក៏រកឃើញថាអត្ថប្រយោជន៍នៃស្រកីដូង ដែលអាចសម្អាតទឹកកខ្វក់បានល្អ»។
ចំពោះសហគ្រាសដែលមានបំណងចង់ប្រើប្រាស់ឧបករណ៍ចម្រោះទឹកកង្វក់នេះ គឺជំហានដំបូងក្រុមការងាររបស់កញ្ញានឹងចុះទៅពិនិត្យបរិមាណទឹកកខ្វក់ដែលសហគ្រាសបញ្ចេញក្នុងមួយថ្ងៃ, ជំហានបន្ទាប់សិក្សាប្រភេទនៃទឹកកខ្វក់នោះ, ការដំឡើងឧបករណ៍, និងការចុះទៅពិនិត្យរៀងរាល់ខែ។ គម្រោងអាជីវកម្ម SUDrain ក៏កំពុងរកដៃគូរសហការណ៍លើការពង្រីកប្រតិបត្តិការអាជីវកម្ម និងគាំទ្របន្តែមផងដែរ។រីឯតម្លៃឧបករណ៍នេះ គឺប្រែប្រួលទៅតាមទំហំនៃបរិមាណទឹកកខ្វក់ ដែលសហគ្រាសផលិតក្នុងមួយថ្ងៃ។
«ឥឡូវនេះពួកយើងកំពុងស្វែងរកដៃគូរសហការលើការវិនិយោគ ក៏ដូចជាអ្នកគាំទ្រទាំងអស់ ព្រោះថាពិតជាត្រូវការពួកគាត់ ដើម្បីឲ្យអាជីវកម្មមួយនេះ ដើរទៅមុខ ដើម្បីដោះស្រាយបញ្ហាបរិស្ថាន ជាពិសេសទឹកកខ្វក់ នៅក្នុងប្រទេសកម្ពុជារបស់យើង»។ នេះជាការរៀបរាប់របស់ កញ្ញា ថារី ដែលបច្ចុប្បន្នកញ្ញាបានបង្កើតកន្លែងពិសោធន៍មួយនៅ វិទ្យាស្ថានបច្ចេកវិទ្យាកម្ពុជា (Institute of Technology of Cambodia) ដើម្បីសិក្សារទៅលើលក្ខណៈនៃសារធាតុពុលផ្សេងៗក្នុងទឹកកខ្វក់៕
© រក្សាសិទ្ធិដោយ thmeythmey.com
