ជាតិ
បទសម្ភាសន៍
២៥ខេត្ត/រាជធានី
«ដុំថ្មអច្ឆរិយ»មិនលិចទឹក នៅតាមផ្លូវទឹកទៅរមណីយដ្ឋានជីផាត
× ភ្នំពេញ៖ នៅក្នុងបទសម្ភាសជាមួយក្រុមការងារកម្មវិធី «Mercedes-Benz និងកំណប់អាថ៌កំបាំង» លោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា ប្រសិនបើធ្វើដំណើរទៅសហគមន៍អេកូទេសចរណ៍ជីផាតនៃស្រុកថ្មបាំង ខេត្តកោះកុង ដោយប្រើមធ្យោបាយតាមផ្លូវទឹក នឹងឃើញមានដុំថ្មអណ្តែតមួយកន្លែង បើទោះជាទឹកឡើងខ្ពស់យ៉ាងណាក៏មិនលិចដែរ។ លោករដ្ឋមន្ត្រីដែលធ្លាប់បានធ្វើដំណើរតាមផ្លូវទឹកទៅទស្សនកិច្ចនៅជីផាត បានបញ្ជាក់យ៉ាងដូច្នេះថា នៅលើថ្មអណ្តែតនោះមានអាស្រមអ្នកតា ហើយថ្មនេះជាអច្ឆរិយមួយដែលគេឆ្ងល់គ្រប់គ្នា។
សូមអញ្ជើញទស្សនាវីដេអូខ្លី ដែលលោករដ្ឋមន្ត្រីក្រសួងទេចរណ៍បានផ្តល់បទសម្ភាសដល់ក្រុមការងារកម្មវិធី «Mercedes-Benz និងកំណប់អាថ៌កំបាំង» ដែលក្រុមការងារនឹងធ្វើដំណើរទៅស្វែងរក និងគាស់កកាយកំណប់ទេសចរណ៍នៅតំបន់អេកូទេសចរណ៍ជីផាតបន្ថែមទៀត នៅថ្ងៃទី១៨-២០ ខែកុម្ភៈ ឆ្នាំ២០១៩ ខាងមុខនេះ ដូចតទៅ៖
«ជីផាត» ជាតំបន់ទេសចរណ៍ធម្មជាតិដ៏ល្អមួយដែលស្ថិតនៅក្នុងខេត្តកោះកុង។ សហគមន៍អេកូទេសចរណ៍ជីផាត ជាទីកម្សាន្តបែបធម្មជាតិស្ថិតនៅទិសនិរតីនៃប្រទេសកម្ពុជា ដែលអមដោយសម្រស់ទឹកជ្រោះ, ជិះទូកគយគន់ថ្ងៃលិច, អំពិលអំពែក និងសត្វស្លាបតាមដងព្រែកសមុទ្រ, ល្អាងប្រចៀង, ទីឈ្វេងយល់ពាងបុរាណ និងផ្នូរបុរាណដែលមានអាយុកាលជាង៥០០ឆ្នាំ។ល។ ទាំងនេះ គឺជាគោលដៅនៃបេសកកម្មលើកទី៤ ដែលក្រុមការងារត្រៀមទៅផ្តិតយកទស្សនីយភាពនៃសក្តានុពលអេកូទេសចរណ៍ជីផាតដ៏ល្អឯក នេះ ផ្សព្វផ្សាយជូនប្រិយមិត្តដែលតាមដានកម្មវិធី «Mercedes-Benz និងកំណប់អាថ៌កំបាំង» នៅថ្ងៃទី១៨-២០ ខែកុម្ភៈ ឆ្នាំ២០១៩ ខាងមុខនេះ។
សូមរម្លឹកថា កម្មវិធី «Mercedes-Benz និងកំណប់អាថ៌កំបាំង» ផ្តួចផ្តើមឡើងដោយក្រុមហ៊ុន Star Auto Cambodia សហការជាមួយសារព័ត៌មានអេឡិចត្រូនិក ThmeyThmey.com និង Fresh News និងគាំទ្រដោយក្រសួងទេចរណ៍ ដើម្បីចូលរួមលើកកម្ពស់វិស័យទេសចរណ៍នៅទូទាំងកម្ពុជា ស្វែងរក និងគាស់កកាយតំបន់ទេសចរណ៍ ដែលគេមិនសូវស្គាល់តំបន់ទេសចរណ៍សក្តានុពល ដែលត្រូវគេមើលរំលង, ពង្រីកសក្តានុពលតំបន់ទេសចរណ៍ដែលមានស្រាប់ឲ្យកាន់តែមានសកម្មភាពរស់រវើក និងផ្សព្វផ្សាយតំបន់ទេសចរណ៍ទាំងនោះឲ្យកាត់តែល្បីល្បាញមួយកម្រិតទៀត៕
© រក្សាសិទ្ធិដោយ thmeythmey.com