កីឡាជាតិ
ជាតិ
AFF U22៖ ជំនួបសំខាន់សម្រាប់ឥណ្ឌូណេស៊ី ម៉ាឡេស៊ី និងមីយ៉ាន់ម៉ា ខណៈកម្ពុជាចង់រក្សាកំណត់ត្រាឈ្នះ
គ្រូម៉ាឡេស៊ី លោក Ong Kim Swee គ្រូមីយ៉ាន់ម៉ា លោក Velizar Popov គ្រូឥណ្ឌូណេស៊ី លោក Indra Syafri និង គ្រូកម្ពុជា លោក Felix Dalmas។ រូបថត FFC
×![]()
ដោយ: ធឿន បញ្ញាឬទិ្ធ
ភ្នំពេញ៖ ក្រុមជម្រើសជាតិអាយុក្រោម២២ឆ្នាំ កម្ពុជា ត្រូវជួបជាមួយក្រុមឥណ្ឌូណេស៊ី ខណៈក្រុមជម្រើសជាតិម៉ាឡេស៊ីត្រូវតទល់ជាមួយមីយ៉ាន់ម៉ា នៅក្នុងពូល Bនៃព្រឹត្តិការណ៍ AFF U22 Championship ។ វាជាជំនួបសំខាន់ចុងក្រោយសម្រាប់ឥណ្ឌូណេស៊ី ម៉ាឡេស៊ី និងមីយ៉ាន់ម៉ា ដែលត្រូវការឈ្នះរៀងខ្លួន ដើម្បីឡើងទៅវគ្គ១/២ ផ្ដាច់ព្រ័ត្រជាមួយក្រុមជម្រើសជាតិកម្ពុជា។
ជំនួបចុងក្រោយសម្រាប់កាត់សេចក្តីនៅក្នុងពូលB ដែលប្រព្រឹត្តទៅនៅថ្ងៃទី២២ កុម្ភៈនេះ នឹងមានការប្រកួតចំនួន២គូ រវាងក្រុមជម្រើសជាតិអាយុក្រោម២២ឆ្នាំ កម្ពុជា និងក្រុមឥណ្ឌូណេស៊ី ខណៈក្រុមជម្រើសជាតិម៉ាឡេស៊ីត្រូវតទល់ជាមួយមីយ៉ាន់ម៉ា។ កម្ពុជា ដែលមាន៦ពិន្ទុក្នុងដៃ បានកក់កៅអីឡើងទៅវគ្គបន្តរួចហើយ នៅឡើយតែក្រុមចំនួន៣ទៀត ដែលត្រូវប្រកួតយកឈ្នះដាច់ខាត ដើម្បីទទួលបានឱកាសឡើងទៅវគ្គ១/២ផ្ដាច់ព្រ័ត្រ។
ក្រុមជម្រើសជាតិឥណ្ឌូណេស៊ី ដែលមានពីរពិន្ទុក្នុងដៃ ក្រោយប្រកួត២លើក ស្មើជាមួយម៉ាឡេស៊ី ២ទល់២ និងសូន្យស្មើជាមួយមីយ៉ាន់ម៉ានោះ ត្រូវការឈ្នះកម្ពុជា ឲ្យខាងតែបាន ដើម្បីឆ្លងទៅប្រកួតវគ្គបន្ត។ ប៉ុន្តែបើក្រុមឥណ្ឌូណេស៊ី ប្រកួតបានត្រឹមស្មើជាមួយកម្ពុជា នៅប្រកួតចុងក្រោយទៀតនោះ គឺក្រុមនេះ នឹងមាន៣ពិន្ទុក្នុងដៃ ហើយត្រូវរង់ចាំអ៊ុតមើលលទ្ធផលការប្រកួតរវាងម៉ាឡេស៊ីនិងមីយ៉ាន់ម៉ា។ នោះក៏ព្រោះតែក្រុមទាំងពីរនេះ ក៏នៅមានឱកាសប្រជែងគ្នា យកកៅអីវគ្គ១/២ ដែរ។
បច្ចុប្បន្ននេះ ក្រុមម៉ាឡេស៊ី មាន១ពិន្ទុក្នុងដៃ ស្ថិតនៅលេខរៀងទី៣ ក្នុងពូលB ក្រោយប្រកួតចាញ់កម្ពុជា ១ទល់០ និងបានត្រឹមស្មើជាមួយឥណ្ឌូណេស៊ី ២ទល់២ ទាំងប្រផិតប្រផើយ នាការប្រកួតនៅកីឡដ្ឋានជាតិអូឡាំពិក កាលពីថ្ងៃទី២០ កុម្ភៈកន្លងមក។ ចំណែកក្រុមមីយ៉ាន់ម៉ាវិញ ក៏មាន១ពិន្ទុក្នុងពូលដែរ បន្ទាប់ពីប្រកួតបានត្រឹមស្មើជាមួយឥណ្ឌូណេស៊ី និងចាញ់កម្ពុជា២ ទល់០ ។ ដូច្នេះសរុបមក ក្រុមទាំង៣ នៅក្នុងពូលB នេះ សុទ្ធតែត្រូវការ៣ពិន្ទុរៀងខ្លួន ។
ថ្វីត្បិតតែកម្ពុជា ទទួលបានចំណាត់ថ្នាក់លេខមួយក្នុងពូលដោយស្វ័យប្រវត្តិ ហើយត្រៀមជួបថៃ នៅវគ្គពាក់កណ្តាលផ្តាច់ព្រ័ត្រក៏ដោយ ប៉ុន្តែក្រុមដែលដឹកនាំដោយគ្រូបង្វឹកអាហ្សង់ទីន លោក Felix Dalmas ចង់បង្កើតប្រវត្តិសាស្ត្រថ្មី ជាមួយនឹងជ័យជម្នះទាំងបីប្រកួតនៅក្នុងពូល ឬឈានដល់ការរារាំងមិនឲ្យមានការស៊ុតបាល់បញ្ចូលទីលើខ្លួន (Cleansheet)។
សម្រាប់ការប្រកួតកាត់សេចក្តីចុងក្រោយនៅក្នុងពូលBនេះ គឺក្រុមជម្រើសជាតិអាយុក្រោម២២ឆ្នាំកម្ពុជា ជួបក្រុមឥណ្ឌូណេស៊ី នៅកីឡដ្ឋានជាតិអូឡាំពិក ស្របពេលក្រុមមីយ៉ាន់ម៉ា ត្រូវតទល់ជាមួយក្រុមម៉ាឡេស៊ី នៅកីឡដ្ឋាន RSN ។ ការប្រកួតទាំងពីរគូនេះ នឹងប្រព្រឹត្តទៅនៅម៉ោង៦ និង៣០ នាទីល្ងាចដូចគ្នា៕
Tag:
AFF U22
កម្ពុជា
ឥណ្ឌូណេស៊ី
កីឡា
© រក្សាសិទ្ធិដោយ thmeythmey.com
