ជាតិ
គោលដៅទេសចរណ៍របស់ពលរដ្ឋបារាំង៖ជប៉ុន កម្ពុជា ក្រូអាស៊ី នូវែលសេឡង់ តង់ហ្សានី
ទិដ្ឋភាពរាជធានីភ្នំពេញពីលើអាកាស
×![]()
ដោយ: ធីតា
ការសិក្សាមួយនៅបារាំង បានបង្ហាញឲ្យឃើញថា កម្ពុជាស្ថិតក្នុងចំណោមគោលដៅទេសចរណ៍ឆ្នាំ២០១៩ សម្រាប់ជនជាតិបារាំងនាអំឡុងវិស្សមកាល។ បើតាមការផ្សាយរបស់សារព័ត៌ មានបារាំង Le Progrès ការសិក្សានេះ ស្ទង់មតិទៅលើជនជាតិបារាំង ១២០៣នាក់ កាលពីអំឡុងខែវិច្ឆិកា ឆ្នាំ២០១៨។
ក្នុងចំណោមអ្នកដែលត្រូវបានសម្ភាស ៦៩ភាគរយ បានប្រាប់ពីគម្រោងរបស់ខ្លួនក្នុងការចាកចេញពីប្រទេសបារាំង សម្រាប់ដំណើរទេសចរណ៍កម្សាន្តពេលវិស្សមកាល ដោយភាគច្រើន ចង់ទៅតំបន់ក្រៅពីអឺរ៉ុប។
តំបន់អាស៊ី ជាគោលដៅទេសចរណ៍ដ៏ធំក្នុងក្តីសុបិនរបស់ជនជាតិបារាំង។ ៣០ភាគរយ បានដាក់គោលដៅទៅកាន់ប្រទេសជប៉ុន បន្ទាប់ពីប្រទេសនេះ បានធ្វើយុទ្ធនាការផ្សព្វផ្សាយជាច្រើន ដូចជាការរៀបចំពីព្រឹត្តិការណ៍បាល់ឱបពិភពលោក និងកីឡាអូឡាំពិកជាដើម។
ចំណែកកម្ពុជា ត្រូវបានជនជាតិបារាំងចាត់ទុកជាគោលដៅស្វែងយល់វប្បធម៌ប្រវត្តិសាស្ត្រដ៏ធំ ដោយមានរហូតដល់ទៅ១៩ភាគរយ ខណៈកាលពីឆ្នាំ២០១៨ មានតែក្នុងរង្វង់១០ភាគរយប៉ុណ្ណោះ ដែលប៉ងមកកាន់ដែនដីអច្ឆរិយៈមួយនេះ។
បន្ទាប់ពីអាស៊ី អាមេរិកខាងជើង នៅតែជាគោលដៅទេសចរណ៍ទីពីររបស់ជនជាតិបារាំង ក្នុងនោះរួមមាន សហរដ្ឋអាមេរិក កាណាដា និងគុយបា ជាដើម ប៉ុន្តែតួលេខមិនមានការប្រែប្រួលច្រើនឡើយ បើប្រៀបធៀបទៅនឹងឆ្នាំ២០១៨។
ឆ្នាំ២០១៩ នេះ ជនជាតិបារាំង១៤ភាគរយក្នុងចំណោមអ្នកដែលត្រូវបានស្ទង់មតិ ក៏មិនមើលរំលងតំបន់អាមេរិកឡាទីននោះដែរ។ អាហ្សង់ទីន និងបូលីវី ជាទីតាំងដែលពួកគេចង់ទៅដល់ជាងគេ។
នៅតំបន់អូសេអានី នូវែលសេឡង់ ក្លាយជាគោលដៅដ៏ទាក់ទាញទេសចរណ៍បារាំង ជាងអូស្ត្រាលីទៅទៀត។ រីឯនៅតំបន់អាហ្វ្រិក តង់ហ្សានី មានប្រៀបជាងអេហ្ស៊ីប ដែលតែងតែប្រឈមនឹងការវាយប្រហារភេរវកម្មផ្សេងៗនារយៈពេលចុងក្រោយនេះ។
ទោះបីជាយ៉ាងណាក៏ដោយ ជនជាតិបារាំង ក៏មិនចោលគោលដៅទេសចរណ៍នៅតំបន់អឺរ៉ុបនោះដែរ។ ក្រូអាស៊ី ជាគោលដៅចម្បងគេ ដែលមានអ្នកចង់ទៅឡើងដល់១៩ភាគរយ ខណៈឆ្នាំ២០១៨ មានតែ៩ភាគរយប៉ុណ្ណោះ។
របាយការណ៍ដែលផ្សាយនៅលើ Le Progrès ក៏បានបង្ហាញផងដែរថា ៧៧ភាគរយនៃជនជាតិបារាំងជាង១២០០នាក់ដែលត្រូវបានសម្ភាស ជ្រើសរើសការធ្វើដំណើរតាមយន្តហោះ និង១៩ភាគរយ តាមរថភ្លើង។
គ្មានអ្វីដែលគួរឲ្យភ្ញាក់ផ្អើលនោះឡើយ លទ្ធផលស្ទង់មតិឲ្យដឹងផងដែរថា ៦៩ភាគរយ ចូលចិត្តទៅតំបន់សមុទ្រ ១២ភាគរយទៅតំបន់ភ្នំ និង៩ភាគរយប៉ុណ្ណោះដែលចង់ធ្វើដំណើរកម្សាន្តនៅតំបន់ទីក្រុង៕
Tag:
ទេសចរណ៍
© រក្សាសិទ្ធិដោយ thmeythmey.com
